GÁLATAS 4 - Quichua Imbabura 2016

1Cashnatapashmi ningapa munani: Herenciata japina cashpapash, huahuara cashpaca, tucui imalla tiyashcata japina punllacaman gañanshnallatami causan.

2Taita carasha nishca punlla chayangacamanmi, huahuataca shujcuna yachachishpa, mandashpa charin.

3Shinallatami ñucanchipash, huahuacunashna cashpaca, cai pachapi imata ruranatalla catishpa, pundaca gañanshna causarcanchi.

4Ashtahuangarin, ña punllacuna pactajpimi, Taita Diosca, Paipaj Churita cachamurca. Paitaca, shuj huarmigumi ungurca. Paica, mandashca shimicuna mandajpimi causajurca.

5Chai mandashca shimicuna mandajpi causajcunata cacharichingapami Paica shamurca. Shitashca huahuacunata churita rurajshna chasquichunmi, chashna shamurca.

6Diospaj huahuacuna cajpimi, Taita Diosca Paipaj Churipaj Espirituta cangunapaj shunguman cachamurca. Chai Espiritumi: “¡Ñuca Taitalla!” nishpa mañachun yarichijun.

7Shina cashcamandami, na ashtahuan gañanshna cashpa, ashtahuangarin, Diospaj huahuacunapacha canguichi. Paipaj huahuacuna cashpami, Taita Dios carashcataca, Cristomanda japigringuichi.

Crijcuna ama pandarichun shinllita rimashcamanda

8Pundaca, Taita Diosta nara rijsishpami, napash dioscunatara catishpa causarcanguichi.

9Ashtahuangarin cunanga, Taita Diosta rijsijpimi, Taita Diospash, cangunataca rijsin. Shina cashpapash, ¿imashpata ima ushaitapash na charij, rurashcalla yanga dioscunata catishpa, cutin gañanshna causangapa munanguichi?

10Cangunaca, cushijuna punllacunata, quillacunata, pachacunata, huatacunata ninanda yarishpami causanguichi.

11Cangunaman ñuca imata yachachishcapash, yangallata canatami manllajuni.

12Juyashca crijcuna, cangunataca ñucashnalla causachunmi ninanda mañani. Ñucapash cangunahuan cashpaca, cangunashnallatami carcani. Shinallata, cangunaca ima na alitapash na rurashcata yarinichu.

13Quishpirinamanda cangunaman punda villajushpaca, ñuca huañujushpa shamuimandami villajurcani. Chaitaca, alimi yachanguichi.

14Shina huañujushpa llaquipacha cajpipash, ñucataca na millanayachishpa, na fiñashpami charihuarcanguichi. Ashtahuangarin, Taita Diospaj angeltashna, Cristo Jesustashnami chasquihuarcanguichi.

15Chashna ninan juyaihuan causanajushcapash, ¿imata tucurca? Cangunaca, cangunapaj ñavita surcushpa, ñucaman cunalla cajpica, surcushpa cunguichimanmi carca. Chaitaca alipachami yachani.

16Na llullashpa cashna nijushpaca, ¿cangunata fiñachingapachu cashna nijuni?

17Caishuj yachachijcunaca, na ali shunguta charishpami, paicunatara catichun munanajun. Ñucanchimanda anchurishpa, paicunata juyashpa catichunmi munanajun.

18Shujcunapaj ali cachun, juyaimanda imata ruranaca alimi. Shina cashpapash ñuca cangunahuan cajllapica na chashna ruranachu canguichi.

19Ñuca huahuacunalla, canguna Cristoshna causaita charichun munashpami, huahuata ungungapa nanachijuj huarmishna llaquita apajuni.

20Cunanllata cangunahuan chaipi cashpachari ali caiman yanimi. Chaipi cashpami, ima cajtapash ali yachashpa imatallapash niman.

Sara shuti, Agar shuti huarmicunamanda parlashcami

21Mandashca shimicunata pactachingapa munajcuna tiyashpaca, villahuaichi. Mandashca shimicuna ima nijujtapash, ¿nachu uyarcanguichi?

22Quilcashcapica: “Taita Abrahamga, ishcai churitami charirca” nijunmi. Shuj churitaca, gañan huarmihuan, caishuj churitaca paipaj huarmihuanmi charirca.

23Paipajta ruraj huarmihuanga, paipaj munaimandallami charirca. Ashtahuangarin, paipaj huarmihuanga, Dios carashapachami nishcamandami charirca.

24Chai huarmicunaca, ishcaipi ari nirishcata yarichingapami chashna tucushca. Shujtaca, Sinaí urcupimi Diosca cushca. Chaica, Agar huarmimanda miraicunaca, gañan tucushpa causanatami ricuchijun.

25Agar huarmica, Arabia llactapi tiyajuj Sinaí urcushna cashcatami ricuchijun. Chai urcuca, cunanbi Jerusalén imashna tiyajujtami ricuchijun. Chai puebloca, chaipi causajcunandimi gañanshna tucushca.

26Ashtahuangarin, jahua pachapi tiyajuj Jerusalenga, pipajpash na gañan cashpami, tucuicunapaj mamashnalla tiyajun.

27Ashtahuangarin cashnami quilcashcapica tiyajun:

“Huahuata huachanata na yachaj huarmi cashcamanda, ninanda cushijuilla.

Huachangapa nanachinatapash na yachashcamandaca,

ninanda cushijushpa caparilla.

Jichushca huarmimi, cusayuj huarmitapash yali,

huahuacunataca charinga” nijunmi.

28Juyashca crijcuna, ñucanchica, “Dios carashapachami” nishca, Isaacpaj huahuacunami canchi.

29Ashtahuangarin, paipaj munaimandallata charishca churimi, Diospaj Espiritupaj munaimanda huacharishca churitaca, catiriyashpa llaquichijun cashca. Shinallatami cunambash tucujun.

30Ashtahuangarin Dios quilcachishcapica, ¿ima nijundayari? “Gañan huarmitaca, paipaj churindi llujchishpa cachangui. Chai huarmipaj churica, huarmipajpacha churihuanga, taita ima charishcatapash na chaupiringachu” nijunmi.

31Juyashca crijcuna, ñucanchica gañan huarmipaj huahuacunashnaca na cashpami, huarmipajpacha huahuacuna canchi.