1Jatun mandajca, Amán runata pushashpami, jatun mandaj Ester rurashca micuiman rirca.
2Cayandi punllapi vinota ufiashpa tiyajushpami jatun mandajca, Estertaca cashna tapurca:
“Jatun mandaj Ester, ¿imatata mañahuangui? Imata mañajpipash cushallami. ¿Imatata nihuangui? Ñuca mandajuj llactacunamanda, chaupitapash cushallami” nirca.
3Shina tapujpimi jatun mandaj Esterca, cashna nirca:
“Jatun mandajlla, can jatun mandajpaj ñaupajpi ñuca ali ricurishca cajpi, can jatun mandajpaj ali cana cajpica, ñucatapash, ñuca llacta gentecunatapash, ama huañuchipanguichu nishpami mañapani.
4Huañuchishpa tucuchi tucungapami, ñucapash, ñuca llacta gentecunapash jatui tucushcanchi. Jaricunatapash, huarmicunatapash, gañan cachun jatushca cajpica, na imatapash nipaimanllu carcani. Ñucanchita huañuchijpica, can jatun mandajpajpash, napacha alichu capanga” nircami.
5Jatun mandaj Asuero runaca, jatun mandaj Estertaca, cashnami nirca:
“¿Pita jatun tucushpa, chashnatapacha rurasha nijun? ¿Chai runaca maipita?” nishpami tapurca.
6Shina tapujpimi, Esterca:
“Ñucanchita fiñashpa na ricunayachij runaca, cai Amán shuti runami” nirca.
Shina nijpimi, Amán runaca, jatun mandajcunapaj ñaupajpi ninanda manllarishpa musparijurca.
7Chai jipami jatun mandajca, micujushca ucumandaca, ninanda fiñarishpa jatarishpa, mandashpa tiyajuna huasi huertaman llujshirca. Amán runaca, paita huañuchinapacha cashcata ricushpami, jatun mandaj Estertaca, paipaj causaimanda mañangapa chaipillata saquirirca.
8Jatun mandaj, chai huertamanda tigramushpaca, micujushca ucuman yaicushpami Amán runataca, jatun mandaj Ester tiyajuj pushtupi cungurishca tiyajujta ricurca. Chaita ricushpami Amán runataca:
“¿Ñuca huarmi jatun mandajtachu, ñuca huasipillata na alita rurangapa munangui?” nirca.
Jatun mandaj chashna nijhuanmi, paipajta rurajcunaca Amán runataca ñavita quilparca.
9Shina rurashpami, jatun mandajpajta ruraj Harbona shuti eunuco runaca:
“Amán runapaj huasipica, Mardoqueota huarcungapami, ishcai chunga ishcai metro chaupita rurashca jatun caspi shayajun. Chaitaca, Amán runallatami rurachirca. Mardoqueoca, can jatun mandajta shujcuna huañuchingapa munanajujpipash, villashpa quishpichircami” nirca.
Shina nijpimi, jatun mandajca:
“Amán runataca chaipillata huarcugrichi” nishpa cacharca.
10Mardoqueota huarcushpa sipingapa pai rurachishca caspipillata, Amán runata huarcujpimi, jatun mandajca ninanda fiñarishcataca yalichirca.
Who We AreWhat We EelieveWhat We Do
2025 by iamachristian.org,Inc All rights reserved.
