JEREMÍAS 28 - Quichua Imbabura 2016

Llulla Profeta Hananías runamanda

1Judá llactata jatun mandaj Sedequías runa chuscu huata picha quillata mandajujpimi, Gabaón shuti pueblopi causajuj Azur shuti runapaj churi profeta Hananiasca, ñucata rimangapa shamurca. Paica, Mandaj Diospaj huasipimi, sacerdotecunapaj, tucui gentecunapaj ñaupajpi, cashna nihuarca:

2“Tucuita Mandaj, Israelcunapaj Taita Diosca, cashnami nihuarca: ‘Babilonia llactata jatun mandaj cangunata llaquichishpa charijushcamandaca cacharichishami.

3Mandaj Dios Ñuca, huasipi tucui ima charishcacunata, Babilonia llactata jatun mandaj Nabucodonosor runa apashcacunataca, cunanmanda ishcai huatapimi, cai pushtumanllata tigrachimugrini.

4Shinallata, Judá llactata jatun mandaj, Joacim runapaj churi Jeconías runatapash, Judá llactamanda Babilonia llactaman prezu apai tucushca gentecunatapashmi, cai pushtumanllata tigrachimugrini. Ñucallatami, Babilonia llactata jatun mandaj cangunata llaquichishpa charijushcamandaca cacharichisha’ ninmi Mandaj Diosca” nihuarcami.

5Shina nijpimi, profeta Jeremiasca, Mandaj Diospaj huasipi tandanajushca sacerdotecunapaj ñaupajpi, tucui gentecunapaj ñaupajpi, profeta Hananías runataca rimarca.

6Profeta Jeremiasca, cashnami nijurca:

“Chashna cachun. Can villashcataca, Mandaj Diosca, pactachishpami ali canman. ‘Mandaj Diospaj huasipi imalla tiyashcacunata apashcatapash, tucui prezu apai tucushcacunatapash, Babilonia llactamandaca cai pushtumanllata tigrachimungami’ nishpami villarcangui. Shina nishpa can villashcata, Mandaj Dios pactachishpaca alimi canga.

7Shina cajpipash cunanga, cambash uyajta, tucui gentecunapash uyajta, ñuca rimashcataca ali uyaichi.

8Punda huatacunapica, cambash, ñucapash nara tiyajpillatami, shuj profetacuna tiyashca. Paicunaca, ashtaca llactacunapi, jatun llactacunapi jatun macanajuicuna, ninan llaquicuna, jatun ungüicuna tiyanatami villanajushca.

9Maijan profetapash, ali causai tiyanata villajpica, pai nishcashna pactajpillami, Mandaj Dios na llullashpa villachun cachamushca cajtaca ricunguichi” nijurcami.

10Shina nijpimi, profeta Hananías runaca, profeta Jeremiaspaj huasha cungapi churarishca yuguta quichushpa faquirca.

11Chai jipaca Hananías runaca, tucui gentecunapaj ñaupajpimi, cashna nirca:

“Mandaj Diosca, cashnami nin: ‘Babilonia llactata jatun mandaj Nabucodonosor runa, tucui llactacunapi causajcunata llaquichishpa charijushcataca, cunanmanda ishcai huatapica, cai yugutashnallatami faquigrini’ ninmi” nijpica, Jeremiasca llujshishpa rircallami.

12Profeta Jeremiaspaj cunga huashapi yuguta japishpa, profeta Hananías runa faquishca jipallami, Mandaj Diosca Jeremiastaca cashna nijurca:

13“Hananías runataca, cashna ningapa rilla: Mandaj Diosca, cashnami nin: ‘Caspi yugucunataca faquircanguimi. Cunanga, chaicunapaj randica jirru yugucunata rurangui’ ninmi.

14Tucuita Mandaj, Israelcunapaj Taita Diosca, cashnatapashmi nin: ‘Babilonia llactata jatun mandaj Nabucodonosor runapajta rurashpa causanajuchunga, tucui cai llactacunapaj cunga huashapimi, jirru yuguta churarcani. Tucuicunami, paipajta rurashpa causanajunga. Sacha animalcunatapashmi, pai munashcata rurachun, paipaj maquipi churarcani’ ninmi nigri” nijurcami.

15Shinamandami profeta Jeremiasca, profeta Hananías runataca cashna nijurca:

“Hananías, cunanga caita uyai. Mandaj Diosca, candaca na villachun cachamujpitami, gentecunataca cashna llullashpa umachishcangui.

16Shinamandami Mandaj Diosca, cashna nin: ‘Canga Mandaj Dios Ñucata fiñachingapami, chashna llullashpa villashcangui. Shinamandami candaca, cai pachamandaca anchuchigrini. Cai huatallatami huañungui’ ninmi” nijurcami.

17Hananías runaca, chai huatapaj canchis quillapimi huañurca.