JEREMÍAS 32 - Quichua Imbabura 2016

Hanameel shuti runapaj alpata, Jeremías randishcamanda

1Nabucodonosor runaca, Babilonia llactataca chunga pusaj huatatami ña mandajurca. Chai huatacunapimi, jatun mandaj Sedequías runaca, Judá llactataca ña chunga huatata mandajurca. Chai huatacunapimi, Mandaj Diosca cai shimicunata Jeremiasman villarca.

2Chai huatapica, Babilonia llactata jatun mandajpaj macanajuj runacunaca, Jerusalén pueblotaca, muyundi chaupipi churashcami carca. Chai punllacunapica, profeta Jeremiasca, Judá llactata jatun mandajpaj huasi ñaupajpimi, prezu tiyajurca.

3Paitaca, Judá llactata jatun mandaj Sedequiasmi, cashna nishpa prezu churashca carca: “¿Imashpata canga, cashna nishpa villangui?: Mandaj Diosca, cashnami nin: ‘Ñucami, cai pueblotaca Babilonia llactata jatun mandajpaj maquipi churani. Paimi, cai pueblotaca mishashpa quichunga.

4Judá llactata jatun mandaj Sedequiasca, caldeo llactamanda macanajuj runacunapaj maquimandaca napacha quishpiringachu. Paica, Babilonia llactata jatun mandajpaj maquipi churai tucungapachami. Chai mandajpajman apajpimi, chimbapura ricurishpa parlanga.

5Sedequiastaca, Babiloniamanmi apachun mandanga. Ñucallata cutin ricugringacamanmi, chaipi causajunga. Caldeo runacunahuan macanajushpaca, ashtahuanmi llaquichi tucunguichi ninmi Mandaj Diosca’ nishpami villajungui” nijurcami.

6Jeremiasca cashnami nirca: Mandaj Diosmi, ñucataca cashna nihuarca:

7“Cambaj taitapaj huauqui Salum shuti runapaj churi Hanameel shuti runami, cambajman shamunga. Paica: ‘Anatot shuti pueblopi ñuca alpata randihuai. Chai alpataca, canmi randi ushangui’ ningapami shamunga” nihuarcami.

8Mandaj Dios villashcashna, ñuca taitapaj huauquipaj churi Hanameel runaca, prezuna huasi patioman shamushpami, cashna nihuarca: “Cunanga, Benjamín ayllucunapaj alpapi tiyajuj, Anatot shuti pueblopi ñuca charishca alpataca, can randihuailla. Ñuca taita carashca alpataca, chai alpa ama shujcunapaj tucuchunga, cambaj cachun, canmi randina cangui” nihuarcami. Shina nijpimi, chai alpata randichunga, Mandaj Diosllata mandashcata yacharcani.

9Chaimandami, Hanameel shuti runa, Anatot shuti pueblopi charishca alpataca randircani. Chai alpamandaca, chunga canchis siclo culquitami curcani.

10Chai jipaca, randishcata ricuchij quilcashca fangata, tucuicunapaj ñaupajpi sellachishpami, culquitapash pezashpa curcani.

11Chai jipami, alpata randishcata ricuchijuj quilcashca fangataca shujta rurachircani. Chaitaca, imashna rurana cashcashnami rurachircani.

12Chai quilcashca fangataca, Nerías shuti runapaj churi Baruc shuti runamanmi, Hanameel shuti runapaj ñaupajpi curcani. Nerías runaca Maasías runapaj churimi carca. Chashna rurajujtaca, randijta ricujcunapash, Judá llactapi causajcuna, chai prezu churana huasi patiopi shayanajujcunapashmi ricunajurca.

13Tucuicunapaj ñaupajpimi, Baruc shuti runamanga cashna nishpa curcani:

14“Tucuita Mandaj, Israelcunapaj Taita Diosca, cashnami nin: ‘Jatushcata ricuchijuj cai quilcashca fangacunata, sellashcatapash, na sellashcatapash alpa mangapi alichingui’. Chashna rurajpimi, chai fangacunaca unaicaman tiyanajunga” nijunmi.

15Tucuita Mandaj, Israelcunapaj Diosca, cashnami nin: “Cai llactapica, huasicunatapash, alpacunatapash, uva chagracunatapash, randina tiyangarami ninmi” nircanimi.

16Jatushcata ricuchij quilcashca fangataca, Nerías runapaj churi Baruc shuti runaman cushca jipami, Mandaj Diostaca cashna nishpa mañarcani:

17“¡Jatun Mandaj Dioslla. Jahua pachatapash, cai pachatapash, Cambaj maquihuan, Cambaj ninan ushaihuanmi rurarcangui! Taita Dioslla, Canga tucuitami rurai ushangui.

18Canga, huaranga huaranga gentecunatapash llaquijmi cangui. Taitacuna jatun na alita rurashcamandaca, jipa huahuacunatami llaquichingui. Jatun ninan ushaita charij Taita Dioslla, Cambaj shutica tucuita Mandaj Diosmi.

19Shinallata, aligutapacha yarichijpash, tucuita ali rurajpashmi cangui. Huañuna aichayuj runacuna imashna causanajujtaca, tucuitami ricujungui. Imashna causashcamanda, imatalla rurashcamanda, tucuicunaman chashnallata cungapami ricujungui.

20Canmi, Egipto llactapica, pipash na rurai ushanallacunata rurashpa ricuchircangui. Cunangamanmi Israel llactapipash, tucui gentecunapaj ñaupajpipash, chaicunataca rurashpa catijungui. Cunan punllacunapipash, Canga tucuicuna rijsishcami cangui.

21Can agllashca Israelcunataca, pipash na rurai ushanallacunata ricuchishpami, Egipto llactamandaca llujchimurcangui. Ninan ushaita charij cambaj maquihuanmi, tucuicunata ninanda manllachishpa llujchimurcangui.

22Chai jipaca, paicunapaj ñaupa taitacunaman carashapachami nishpa juramentushca cai llactatami cararcangui. Cai llactaca, lechepash, balun mishquipash ashtacapacha tiyaj llactami.

23Paicunaca, cai llactaman yaicumushpami, ninanda cushijunajurca. Ashtahuangarin Can rimashcatapash, Can mandashcatapash na cazunajurcachu. Imatalla rurachun Can mandashcataca, imatapash na pactachircachu. Shinamandami, cai tucui llaquicunata paicunamanga cachamurcangui.

24Caldeo runacunaca cai pueblota mishashpa japingapami, tucui muyundicunapi chacanacunata churarca. Cai puebloca, paicunahuan macanajungapa shamuj caldeo runacunapaj maquipimi churai tucugrin. Can villashcashnami, espadahuan, yarjaihuan, jatun ungüihuan, cai puebloca llaquichi tucunga. Chaitaca Can Diosllata ricujunguimi.

25¡Mandaj Jatun Dioslla! ¿Cai llactataca, caldeo runacunapaj maquipi churana cashpatachu ñucataca: ‘Alpata culquipaj randi. Chai randishcata ricuchunga, shuj ricujcunata churai’ nihuarcangui?” nishpami, Diosta mañarcani.

26Chai jipami Mandaj Diosca, Jeremiastaca cashna nijurca:

27“Ñucaca tucui cai pachapi causajcunata Mandaj Diosmi cani. Ñucapaca, ¿Imapash na rurai ushanalla tiyangachu?

28Shinamandami Mandaj Dios Ñucaca, cashna nini: Cai pueblotaca caldeo runacunapaj maquipi, Babilonia llactata jatun mandaj Nabucodonosor runapaj maquipi, Ñucallata churajpimi, mishashpa quichunga.

29Cai pueblota llaquichinajuj caldeo runacuna yaicumushpami, tucuillata rupachinga. shinallata, Baal shuti rurashcalla diosman inciensota carashpa cushnichinajushca huasicunatapashmi rupachinga. Rurashcalla dioscunamambash, vinota talishpa cushpami, Ñucataca ninanda fiñachircanguichi.

30Israelcunapash, Judá llactapi causajcunapash, tucui paicunapaj causaipimi, Ñuca ñaupajpi na alita rurashpa, Ñucata ninanda fiñachishpa causanajurca. Mandaj Dios Ñucami, chashna nini.

31Cai pueblopi causajcunaca, callarimandapachami, cunangaman Ñucata fiñachishpalla causanajushca. Chaimandami, Ñuca ñaupajmanda anchuchigrini.

32Israelcunapash, Judá llactapi causajcunapash, jatun mandajcunapash, cati mandajcunapash, sacerdotecunapash, profetacunapash, tucui na alita rurashpa Ñucata fiñachishpa causashcamandami, paicunataca anchuchigrini. Judá llacta runacunapash, Jerusalenbi causajcunapashmi, Ñucataca fiñachihuarca.

33Paicunaca, Ñucata na cazushpami fiñachihuarca. Ñucaca, pundamandapachami ali causachun yachachijurcani. Ashtahuangarin, Ñuca yachachishcataca napacha cazurcachu.

34Shinallata, Ñucata mañana huasipipash, rurashca dioscunata churashpami ninanda mapayachinajurca.

35Hinom shuti runapaj churipaj pugru pambapipash, Baal shuti rurashcalla diospaj altarcunata rurashpami, Judá llactapi causajcunataca, juchata rurachinajurca. Paicunapaj churicunata, ushicunatapash, Moloc shuti diosman carashpa rupachingapami, chashna ruranajurca. Chashna na alicuna cangataca, yaitallapash na yarcanichu” nijurcami.

36Shina cajpipash, Israelcunata Mandaj Taita Diosca, cashnami nin: “Cangunaca, cai pueblotaca: ‘Jatun macanajuihuan, yarjaihuan, jatun ungüihuan tucuchijuchunmi, Babilonia llactata jatun mandajpaj maquipi churagrin’ ninguichimi.

37Ashtahuangarin Ñucaca, ninandapacha fiñarishpa, llujchishpa cachashcacunataca, tucui llactacunamandami cutin tandachimusha. Imatapash na manllashpa, caipi causanajuchunmi chashna pushamusha.

38Paicunaca, Ñucapajlla agllashca gentecunami canga. Ñucapash, paicunapaj Taita Diosmi casha.

39Shinallata, paicunapaj causaipi Ñucata manllashpa causachunmi yachachisha. Paicunapash, paicunapaj jipa miraicunapash, ali causaita charichunmi chashna yachachisha.

40Shinami paicunaman causaita causaicaman alita rurangapa ari nijusha. Paicuna Ñucamanda ama anchurichunga, Ñucata manllana yuyaitami, paicunapaj shungupi churasha.

41Ñucaca, paicunaman alita rurashpami, paicunahuan cushijusha. Cai llactataca, cutinga na tucuchingapami, ninanda llaquishpa, aliguta ricuriashpa charisha” ninmi.

42Mandaj Diosca, cashnatapashmi nin: “Cai llactapi causajcunaman, tucui cai llaquita apamushcashnami, paicunaman tucui alicunata apamusha nishcataca pactachishami.

43Cangunaca: ‘Cai llactapica, gentecunapash, animalcunapash illaj, jichushcami saquirishca. Cunanga, caldeo runacunapaj maquipimi’ ninajunguichimi. Canguna chashna ninajushca llactataca cutin japishpami chaipi causanguichi.

44Ashtahuangarin caimanda prezu apai tucushcacunataca, Ñucami tigrachimusha. Paicunami, alpacunataca culquipaj randinajunga. Randishcata ricuchij quilcashca fangacunatapashmi ruranajunga. Chaicunataca, randijta ricujcunata quilcachishpami sellachinajunga. Benjamín llactapi, Jerusalén muyundi llactacunapi, Judá llactapillata tiyaj caishuj pueblocunapi, urcucunapi tiyaj pueblocunapi, Sefela shuti pamba pueblocunapi, Neguev pamba pueblocunapipashmi, alpacunataca chashna randinajunga” ninmi Mandaj Diosca.