DEUTERONOMIO 25 - Quichua Imbabura 2016

1Cangunapura fiñanajushca cashpaca, ali ricushpa alichinajuchunmi juezcunapajman rina canguichi. Paicunami, alitalla ruraj runataca cacharishpa, na alita ruraj runataca llaquichinga.

2Na alita ruraj runa asti tucuna cajpica, juezmi alpapi chutachishpa, paipaj ñaupajpi astichinga. Chai runa imashna na alita rurashcata ricushpami, mashnata astina cajpipash astichinga.

3Chuscu chunga yalitaca na astinachu canguichi. Chaita yalishpa astishpa chugrichishpaca, cambaj huauquitami yangapi churangui.

4Trillajuj huagrataca ama shimita huatanguichu.

5Chai huasipillata huauquipura causanajushpa, maijan huauquipash, churita nara charishpallata huañujpica, chai huañushcapaj huarmica, na rijsishca shuj jarihuanga na cazarai ushangachu. Chai huarmipaj cusapaj huauquillata cazarashpami, paihuan pacta causashpa mandashcapi nijujtaca pactachinga.

6Chai huarmihuan charishca punda churitaca, huañushca huauquipaj shutitami shutichinga. Huañushca huauquipaj shuti, Israelpuramanda ama chingachunmi chashna ruranga.

7Huauquipaj huarmihuan cazarangapa na munajpica, huauquipaj huarmica puebloman yaicuna pungupi tiyanajuj mandaj ancianocunapajman rishpami: ‘Ñuca huañuj cusapaj huauquica, paipaj huauquipaj shuti, Israelpurapi tiyachun na munashpami, ñucahuan cazarangapaca na munahuan’ nishpami villagringa.

8Shina villajpimi, pueblopi mandaj ancianocunaca, na cazarangapa munaj runata cayashpa rimanga. Shina rimajpipash: ‘Napacha cazarangapa munanichu’ ningami.

9Shina nijpica, paipaj huauquipaj huarmica, mandaj ancianocunapaj ñaupajpimi, chaquipi churajushcata quichushca jipaca, ñavipi t'ucashpa: ‘Huauquipaj huasi ucupuracuna tiyachun na munaj runataca, cashnami rurana’ ninga.

10Shina cajpimi Israelpurapica: ‘Lluchu chaqui runapaj huasi ucupurami’ nishpa shutichinga.

11Maijangunapash randimanda macanajunajujpi, maijambaj huarmi cashpapash, paipaj cusata mitsangapa quimirishpa, caishuj runapaj na tacarinalla pushtupi tacaringapashchari.

12Shina rurajpica, chai huarmipaj maquitaca napacha llaquishpami fitina cangui.

13Cambaj muchilapica, ali pezanatapash, shuhuashpa pezanatapash ishcanditaca na charinachu cangui.

14Cambaj huasipica, efa shuti pezanataca, ali pezanatapash, na ali pezanatapash, ishcanditaca na charinachu cangui.

15Ashtahuangarin, pezangapaca chashnatapacha pezajtallami charina cangui. Shinallata, efa pezanatapash, chashnatapacha pezanatami charina cangui. Chashna rurashpami, canda Mandaj Taita Dios carashca llactapica unaicaman causangui.

16Canda Mandaj Taita Diosca, maijambash chashna jatun na alita rurashpa umachijcunataca millanayachishpami ricun.

Amalec runapaj miraicunata tucuchinajuchun mandashcamanda

17Egiptomanda llujshishpa ñanda shamujujpi, Amalec runapaj miraicuna imata rurashcataca yarinami cangui.

18Ñambi chapashpa, huashata catimunajun, imatapash na rurai ushajcunata llaquichishcatapash yarinami cangui. Cangunataca, ninanda shaijushcacuna cajpimi, paicunaca, Taita Diostapash na manllajcuna cashpa chashna llaquichirca.

19Canda Mandaj Taita Dios, cangunata fiñajcunata tucuillata tucuchishpa, Mandaj Taita Diosllata cangunapaj cachun carashca alpaman chayashpaca, tucuilla Amalec runapaj miraicunatami, cai pachamandaca chingachina canguichi.