JUECES 6 - Quichua Imbabura 2016

Gedeón shuti runata, Dios cayashcamanda

1Israelcunaca, Mandaj Diospaj ñaupajpica, na alitami ruranajurca. Chaimandami Mandaj Diosca, canchis huatacaman llaquichi tucunajuchun, Madián llactamanda gentecunapaj maquipi churarca.

2Madián llactamanda gentecunaca, ashtahuan ashtahuanmi Israelcunataca llaquichinajurca. Chai gentecunata manllashpami Israelcunaca, lomacunapi utujucunata allashpa, jatun pircacunata muyundi ruranajurca.

3Israelcuna imatalla tarpushcataca, Madián shuti, Amalec shuti llactacunamanda gentecuna, indi llujshimujman causaj gentecuna shamushpami, llaquichinajuj carca.

4Paicunaca macanajungapa shamushpami, carpacunata shayachishpa, pambacunapi fucushcacunata, Gaza shuti pueblo chayanacaman tucuchinajun carca. Israel llactapica, llamacunapaj, huagracunapaj, burrucunapaj micunatallapash na saquinllu carca.

5Paicunaca, animalcunandi, paicunapaj carpacunandi, ashtaca gentecuna vichai shamushpami, langosta jurucunashna jundanajurca. Paicunapash, paicunapaj camellocunapash, maitapash na yupai ushanalla shamushpami tucuita tucuchij carca.

6Chashnami Israelcunaca, Madián llactamanda gentecunapaj jahua, imagupash illaj saquirinajurca. Chaimandami Israelcunaca, Mandaj Diosta caparishpa mañanajurca.

7Madián llactamanda gentecuna llaquichinajujpi, Israelcuna, Mandaj Diosta mañanajujpimi,

8Mandaj Diosca, shuj profeta runaguta, Israelcunapajman cachamurca. Chai runagumi cashna nirca: “Israelcunata Mandaj Taita Diosca, cashnami nin: ‘Ñucami cangunataca, Egipto llactapi gañan causanajujta llujchishpa pushamurcani.

9Egipto llacta runacunapaj maquimandami cacharichircani. Shinallata, tucui llaquichijcunapaj maquimandapashmi cacharichircani. Paicunataca, cangunapaj ñaupajmanda llujchishpa cachashpami, paicunapaj llactataca cangunaman cararcani.

10Cangunataca, cashnami nircani: Ñucami, cangunata Mandaj Taita Dios cani. Canguna causanajuj llactamanda amorreo gentecunapaj dioscunataca, na manllanachu canguichi’ nircanimi. Ashtahuangarin, ñuca chashna nishcataca na cazushpami causanguichi ninmi” nircami.

11Mandaj Diospaj ángel shamushpaca, Ofra shuti pambapi shayajuj jatun quiru ucupimi tiyarirca. Chai pambaca, Abiezer shuti runamanda mirai Joás runapajmi carca. Chai Joás runapaj churi Gedeón shuti runami, Madián llacta gentecunamanda pacajushpa, uvata cutana pushtupi trigota pacalla huairachijurca.

12Chaipimi, Mandaj Diospaj ángel ricurishpa cashna nirca:

“Ninan shinlli, imatapash na manllaj runami cangui. Mandaj Diosca canhuanmi” nircami.

13Shina nijpimi Gedeón runaca, cashna nirca:

“Ñucata mandajlla. Mandaj Dios ñucanchihuan cajpica ¿imashpata tucui cai jatun llaquicunaca shamushcayari? Ñucanchi taitacunaca: ‘Mandaj Diosmi ñucanchitaca, Egipto llactamanda llujchimurca’ ninajurcami. Chai tucui juyailla villashcacunaca, ¿imata tucushcayari? Ashtahuangarin cunanga, Mandaj Diosca ñucanchitaca jichushpa saquishpami, Madián llactamanda gentecunapaj maquipi churashca” nircami.

14Mandaj Diosca, paipaj ñavita ricushpami cashna nirca:

“Israelcunataca, cambaj tucui ushaihuan shinlli tucushpa, Madián llactamanda gentecunapaj maquimanda llujchigrilla. Ñucami candaca cachajuni” nircami.

15Shina nijpimi Gedeón runaca, cashna nirca:

“Ñucata mandajlla. Ñucaca, ¿imahuanda Israelcunataca quishpichishayari? Ñuca ayllucunaca, Manasespaj ayllupurapica, imagutapash na charijcunamari. Ñuca taitapaj huasi ucupurapica, ñucami tucuicunapaj jipa capani” nircami.

16Shina nijpimi Mandaj Diosca:

“Na llullashpami canhuan casha. Madián llactamanda gentecunataca, shujlla runata mishajshnami mishangui” nirca.

17Shina nijpimi Gedeón runaca, cashna nirca:

“Cambaj ñaupajpi ñuca ali ricurishca cajpica, Can ñucahuan rimashcata yachangapa, imatallapash rurashpa ricuchihuailla nipanimi.

18Ñuca, Canman caranata apamushpa, Cambaj ñaupajpi churangacaman, caimandaca amara ripanguichu” nircami.

Shina nijpimi, angelca:

“Can tigramungacaman, caipi shuyajushallami” nirca.

19Gedeón runaca, huasiman yaicushpami, shuj maltun chivota huañuchishpa yanurca. Shinallata, ishcai chunga ishcai kilota pezaj jacuta japishpami, levadura illaj tandata rurarca. Aichataca, shuj canastapi churashpa, caldotaca shuj mangapi churashpami, jatun quiru ucuman apamurca.

20Ña apamujpimi Taita Diospaj angelca cashna nirca:

“Aichatapash, levadura illaj tandatapash, cai jatun rumipi churashpa, caldotapash chai jahuapillata talilla” nishpa mandajpimi, Gedeonga chashna rurarca.

21Mandaj Diospaj angelca, chai aichatapash, levadura illaj tandatapash, pai charijuj caspi pundahuanmi tacarirca. Shina tacarijpimi, chai rumimanda nina llujshishpa aichatapash, levadura illaj tandatapash tucuillata rupachirca. Chai jipaca, Mandaj Diospaj angelca, pai ricujujtami ñapash chingarirca.

22Mandaj Diospaj ángel cajta yachashpami, Gedeón runaca:

“Mandaj Jatun Dioslla. Mandaj Diospaj angeltamari, ñavi ñavi ricushcani” nishpa caparirca.

23Shina nijpimi, Mandaj Diosca:

“Ali causaita charipai. Ama manllaichu, na huañunguichu” nirca.

24Chaimandami Gedeón runaca, Mandaj Diosman shuj altarta chaipi rurashpaca: “Ali causaita caraj Mandaj Diosmi” nishpa shutichirca. Chai altarca, Abiezer shuti runapaj miraicuna causanajuj Ofra shuti pueblopimi, cunangaman tiyajun.

25Mandaj Diosca, chai tutallatami Gedeón runataca cashna nirca:

“Cambaj taitapaj huagracunamanda, canchis huatata charij huagrata japingui. Shinallata, Baal shuti diosman cambaj taita rurashca altartapash urmachishpa, Asera shuti huarmi diosman rijchajtapash faquingui.

26Chai jipaca, maipi ali canata ricushpa, canda Mandaj Taita Diosman cai jatun rumi jahuapi shuj altarta shayachingui. Chaipica, chai huagrata huañuchishpa Ñucaman cushpa, Asera shuti huarmi diosman rijchajta faquishca yamdahuan, tucuilla rupachingui” nircami.

27Shina nijpimi Gedeonga, paipajta ruraj chunga runacunata pushashpa, Mandaj Dios mandashcata rurarca. Ashtahuangarin, paipaj taitapaj ayllucunata, pueblopi causajcunata manllashpami, tutayajpi chashna rurajurca.

28Chai pueblopi causajcuna, cayandi tutamanda jatarishpaca, Baal shuti diospaj altartapash urmachishcata, chai altar quimiriapillata Asera shuti huarmi diosman rijchajtapash faquishcatami ricunajurca. Shinallata, Gedeón runa rurashca altarpica, huagrata huañuchishpa tucuillata rupachishcatapashmi ricunajurca.

29Chaita ricushpami, caishuj chaishuj: “¿Pita caitaca chashna rurashcanga?” nishpa tapurinajurca. Tucuicunata ali tapuchishca jipami: “Joás shuti runapaj churi Gedeonmi chaita rurashca” ninajurca. Chaimandami chai pueblopi causajcunaca, Joás runataca cashna ninajurca:

30“Cambaj churita huañuchingapa llujchimui. Paimi, Baal shuti diospaj altartapash urmachishpa, chai altar quimiriapi Asera shuti huarmi diosman rijchajtapash faquishca” ninajurcami.

31Shina ninajujpimi Joás runaca, tucuilla gentecunata cashna nirca:

“¿Baal diosmandaca, cangunachu shayarishun ninguichi? ¿Cangunachu paipaj randi macanajujgringuichi? Maijambash paimanda shayaringapa munajcunaca, cunanllatami huañunga. Paipaj altarta urmachishca runataca, dios cashpaca, paillata llaquichijuchun saquichilla” nircami.

32Gedeondaca, chai punllallatami, Jerobaal shutita shutichirca. Chai shutica, Baal shuti diospaj altarta urmachishcamandaca: “Baal shuti diosllata macanajungapa shayarichun” nijunmi.

33Ashtahuangarin, Madián llacta gentecuna, Amalec llactamanda gentecuna, indi llujshimujmanda gentecunapashmi, tucuilla shujllashnalla tandanajurca. Paicunaca, Jordán yacuta chimbamushpami, Jezreel shuti pugru pambapi carpacunata shayachishpa tiyanajurca.

34Shinamandami Mandaj Diospaj Espíritu, Gedeón runapajman shamujpi, cachuta pai huacachijpica, Abiezer runapaj miraicunaca paihuan tandanajuj shamurca.

35Manasés ayllumambash villachun cachajpimi, paicunapash tandanajumurca. Shinallata Aser, Zabulón, Neftalí shuti ayllucunamambash villachun cachajpimi, paicunapash shamunajurca.

36Chai jipami Gedeón runaca, Taita Diosta cashna nirca: “Can nishcashna, Israelcunataca ñuca maquihuan quishpichina cajpica,

37cai trillana pambapimi llama milmata churagripani. Caya tutamandapaca, chai milmatalla jamzi paramuhuan mutiyachishpa, chai muyundi alpaca chaquishca pacarijpica, can nishcashnallata, Israelcunataca ñuca maquihuan quishpichinatami yachasha” nircami.

38Cayandi tutamanda jatarishpa, chai milmata capijpica, milma mutiyashcamandaca, shuj jatun tasta junda yacumi llujshirca.

39Shina cajpimi Gedeonga, Taita Diostaca cashna nirca: “Ama ninanda fiñaripanguichu. Cai llama milmahuanga, cutinmi shuj mañaita ruragripani. Cunan tutaca, chai muyundi alpataca jamzi paramuhuan mutiyachishpa, milmatalla chaquishcata pacarichipangui nipanimi” nircami.

40Chai tutapash Taita Diosca, Gedeón runa mañashcashnami rurarca. Llama milmallami chaquishca pacarirca. Muyundi tucuilla alpaca, mutiyashcami carca.