1Levadura illaj tandata, pascua punllapi micungapaca ishcai punllallami illarca. Chaipimi, sacerdotecunata mandajcunapash, mandashca Shimita yachachijcunapash, imashna Jesusta umachishpa, japishpa huañuchingapa parlarinajurca.
2Paicunaca:
“Gentecuna jatarishpa, ñucanchita ama caparinajuchunmi, cai cushijui punllacunapica na japina canchi” ninajurcami.
Betania pueblopimi, mishquilla ashnajujta Jesuspaj umapi talishpa javishca(Mat. 26:6-13; Juan 12:1-8)3Jesusca, Betania pueblopimi, lepra ungüihuan huañujushca Simonbaj huasipi carca. Chaipi, micungapa mezapi tiyajujpimi, shuj huarmica, ashtaca culquipaj jatuna mishquilla ashnajun, nardo yuramanda llujchishcata, alabastro uchilla fundupi apashpa shamurca. Chai alabastro uchilla funduta faquishpami, Jesuspaj umapi talirca.
4Chaita ricushpami, huaquingunaca paicunapaj yuyaipi fiñarishpa, cashna ninajurca:
“¿Imashpata chai mishquilla ashnajujtaca, chashna yangata tucuchijunyari?
5Chaitaca, quimsa patsaj yali denario culquipaj jatushpami, imagutapash na charijcunaman carashpa ali canman carca” nishpami, chai huarmitaca ninanda na alicachinajurca.
6Chaimandami Jesusca, cashna nirca:
“¿Imashpata cai huarmitaca chashna llaquichinajunguichi? saquichilla. Paica, Ñucapaj ali cachunmari, chashna rurashca.
7Imagupash illajcunaca, cangunapurapica tiyangallami. Paicunaman carangapa munashpaca, ima punllapash caranguichillami. Ashtahuangarin, Ñucami cangunahuanga na unaicaman causajushalla.
8Paica, pai imata rurai ushashcatallami rurashca. Cai huarmica, Ñuca huañushpa pambai tucunalla cachunmi, cai mishquillagu ashnajujtaca, Ñuca umapi talishpa javingapa shamushca.
9Na llullashpami, cangunataca cashna nini: Cai pachapica, maipi cashpapash quishpirinamanda villanajushpaca, cai huarmita yarichumbashmi, pai imata rurashcatapash villanajunga” nircami.
Jesustaca, Judas runami japichishallami nishca(Mat. 26:14-16; Luc. 22:3-6)10Chai jipami, chunga ishcai yachajujpuramanda Judas Iscarioteca, Jesusta japichingapa, sacerdotecunata mandajcunapajman rirca.
11Chashnata uyashpami, paicunaca ninanda cushijushpa: “Culquita cushunllami” ninajurca. Shinamandami Judasca, imashna japichinatapash yariaj purijurca.
Apunchi Jesusca, Pai huañushcata yarishpa micuchunmi callarichishca(Mat. 26:17-29; Luc. 22:7-23; Juan 13:21-30; 1 Cor. 11:23-26)12Levadura illaj tandata micuna callari punllapica, pascua punllata yarishpa llamaguta huañuchinami carca. Chaipimi, Paipaj yachajujcunaca:
“Pascua punllapi micungapaca, ¿maipita alichigrichun munangui?” ninajurca.
13Shina tapujpimi Jesusca, Paipaj ishcai yachajujcunata cashna nishpa cacharca:
“Puebloman ripaichi. Chaiman chayashpaca, yacu funduta aparishca shuj runagutami tuparinguichi. Paitaca catinguichilla.
14Pai maiman yaicujpipash, huasiyuj taitataca cashna ninguichi: ‘Ñucanchita Yachachijmi: Pascua punllapi micunataca, ¿maijan ucupita, Ñuca yachajujcunandi micuna capanchi? nishpa tapuchunmi cachamun’ ninguichi.
15Shina tapujpimi, chai huasiyuj taitaca, jahua altibajopi ña alichishcalla shuj jatun ucuta cangunaman ricuchinga. Chai ucupica, ñucanchi micungapa alichinguichilla” nishpami cacharca.
16Chai puebloman Paipaj yachajujcuna chayashpaca, Jesús imashna nishcashnami tarigrirca. Chaipimi, pascua punllapi micungapaca alichinajurca.
17Ña tutayashcapimi Jesusca, Paipaj chunga ishcai yachajujcunandi, chai huasiman shamurca.
18Ña micungapa tiyanajushpami Jesusca, Paipaj yachajujcunataca cashna nirca:
“Na llullashpami cangunataca cashna nini: Ñucahuan micushpa tiyanajuj, cangunapuramanda shujmi, Ñucataca japichigrihuan” nircami.
19Shina nijpimi paicunaca, ninanda llaquirishpa:
“¿Ñucachu capani? caishujpash ¿Ñucachu capani?” nishpa, shuj shuj tapunajurca.
20Shina tapujpimi Jesusca, paicunata cashna nirca:
“Chunga ishcaipuramanda shujmi, cai platopi mutiyachishpa Ñucahuan micushpa tiyajunllata japichigrihuan.
21Runa Aichayuj tucushca Ñucamanda, quilcashcapi villashcami pactanapacha. Runa Aichayuj tucushca Ñucata japichij runaca ¡aij, imachari tucunga! Chai runaca, na huacharishca cashpachari ali canman carca” nircami.
22Ña micunajushpami, Jesusca tandata japishpa, Diosta pashi nishpa mañarca. Chai tandata chaupishpa Paipaj yachajujcunaman carashpaca:
“Japishpa micuichi. Caica Ñuca cuerpomi” nircami.
23Shinallata, copatapash japishpa, Diosta pashi nishca jipami, paicunaman curca. Shina cujpimi tucuicuna ufianajurca.
24Paicunataca cashnatapashmi nirca:
“Caica, mushujta ari nishcata pactachina Ñuca yahuarmi. Cai yahuarca ashtaca gentecunamandami jicharinga.
25Na llullashpami, cangunataca cashna nini: Taita Dios mandajuj llactapi, shuj mushuj vinota ufiangacamanmi, cai uva vinotaca cutinga na ufiasha” nircami.
Jesusca, Pedrotaca: “Na rijsinichu nihuanguimi” nishcami(Mat. 26:30-35; Luc. 22:31-34; Juan 13:36-38)26Paicunaca, candanaguta candashca jipami, Olivo lomaman rinajurca.
27Shina rinajushpami Jesusca, Paipaj yachajujcunata cashna nirca:
“Cunan tutallatami cangunaca, Ñucata na crishpa tucuicuna pandarigringuichi. Quilcashcapica cashnami nijun: ‘Michijtaca chugrichishami, shina cajpimi llamacunaca, caita chaita calpanga’ nijunmi.
28Ashtahuangarin, Ñuca causarishpami, cangunata ñaupashpa, Galilea llactaman risha” nircami.
29Shina nijpimi Pedroca cashna nirca:
“Canda na crishpa tucuicuna pandarinajujpipash, Ñucaca napacha pandarishachu” nircami.
30Shina nijpimi Jesusca cashna nirca:
“Na llullashpami candaca cashna nini: Cunan tutallatami canga, gallopash nara ishcaicaman candajpillata, Ñucataca quimsacaman na rijsinichu nigringui” nircami.
31Shina nijpimi Pedroca, cutin cashna nirijurca:
“Canhuan huañuchi tucunapacha cashpapash, na rijsinichutaca, napacha nishachu” nijurcami.
Caishuj yachajujcunapash, tucuillami chashnallata ninajurca.
Jesusca, Getsemanipimi Diosta mañashca(Mat. 26:36-46; Luc. 22:39-46)32Getsemaní shuti pushtuman rinajushpami Jesusca, Paipaj yachajujcunataca:
“Diosta Ñuca mañangacaman cangunaca, caipi tiyanajuichilla” nirca.
33Shina nishpami, Pedrotapash, Jacobotapash, Juandapash, pushashpa rirca. Ña rinajushpami Jesusca ninan llaquipacha tucurca.
34Shina cashpami, Jesusca cashna nirca:
“Ñuca almapimi, huañungashna ninanda llaquirini. Cangunaca, ama puñushpa caipi shuyaichilla” nircami.
35Shina nishpaca ashaguta rishpallami, alpapi cungurishpa, Diostaca cashna nishpa mañarca:
“Imashnallapash cai llaquicunata na apashpa yalinalla cajpica, yalichihuailla” nijurcami
36Shinallata, cashnatapashmi nijurca: “Ñuca juyashca Taitalla, cambajca tucuita rurai ushanallami capan. Llaquita apana cai copataca anchuchipailla. Shina cashpapash, ama Ñuca munashcata rurapaichu, ashtahuangarin Cambaj munaita pactachipai” nircami.
37Chai jipa tigramushpaca, puñunajujtami japij shamurca. Chaimandami Pedrotaca cashna nirca:
“Simón, ¿puñujunguillachu imata? ¿Ashagutallapash nachu rijchariya caita ushangui?
38Na alita rurana munai ama japij shamuchunga, rijchariashpa Diosta mañaichi. Cangunapaj espirituca, Diosta mañangapa munangami. Ashtahuangarin cuerpomi shaijunlla” nircami.
39Jesusca cutin tigrashpami, pundalla ima nishpa mañashcashnallata mañajurca.
40Mañashpa tigramushpaca, cutin puñunajujtami japij shamurca. Paicunaca, ninan puñuihuan cashpami, ñavita pascaitapash na ushanajurca. Chaimandami imata tigrachitapash na ushanajurca.
41Quimsacaman rishpa tigramushpaca, cashnami nirca:
“Cunanga, puñushpa samaichilla. Ña caicamanllami cashca, Ñuca japi tucunaca ñami chayamushca. Ricuichi, Runa Aichayuj tucushca Ñucami, juchayu runacunapaj maquipi churai tucugrini.
42Jatarishpa ucha jacuchi. Ricuichi, Ñucata japichij runaca ñami chayamujun” nircami.
Jesusta prezu apangapa japichishcamanda(Mat. 26:47-56; Luc. 22:47-53; Juan 18:2-11)43Shina nijujpillatami, chunga ishcaipuramanda Judas runaca ñapash chayamurca. Paihuanga, ashtaca gentecunami espadacunahuan, caspicunahuan shamunajurca. Paicunaca, sacerdotecunata mandajcuna, mandashca Shimita yachachijcuna, chai pueblomanda mandaj ancianocuna cachamujpimi chashna shamunajurca.
44Jesusta japichingapa shamujuj runami, paihuan shamunajuj runacunataca, cashna nishpa yachachishcalla carca:
“Maijandami ñuca muchani, chai runami canga. Paita japishpaca, huatashpa apanguichilla” nishcami carca.
45Jesuspajman ñapash quimirimushpaca:
“Yachachij, Yachachij” nishpami mucharca.
46Shinamandami, Jesustaca prezu apangapa ñapash japinajurca.
47Ashtahuangarin, chaipi shayanajujpuramanda shuj runaca, ñapash espadata llujchishpami, sacerdotecunata mandajpajta ruraj runataca rinrita fitirca.
48Shina rurajpimi Jesusca cashna nirca:
“Cangunaca ¿shuhuatashnachu espadacunahuan, caspicunahuan japingapa shamunguichi?
49Punllandimi, Diospaj huasipica cangunapash ricujta yachachijurcani. Chaipica, Ñucataca na japihuarcanguichu. Ashtahuangarin Dios quilcachishca Shimipi nijuj pactachunmi, cashna shamushcanguichi” nircami.
50Chaipimi Jesuspaj yachajujcunaca, Paitalla saquishpa, tucuilla pacajushpa calpanajurca.
Shuj chaira viñai huambrami pacajushpa calpashca51Ashtahuangarin, chairalla viñai shuj huambrapash, fachata pillurishcalla catijujpimi, paitapash prezu japinajurca.
52Ashtahuangarin chai huambraca, fachata saquishpami, lluchulla pacajushpa calparca.
Mandajpuralla tandanajushcapaj ñaupajmanmi, Jesustaca apashca(Mat. 26:57-68; Luc. 22:54-55,63-71; Juan 18:12-14,19-24)53Jesustaca, sacerdotecunata mandajpajmanmi apamunajurca. Chaipimi, sacerdotecunata mandajcuna, mandaj ancianocuna, mandashca Shimita yachachijcuna, tucuilla tandanajunajurca.
54Ashtahuangarin Pedroca, sacerdotecunata mandajpaj huasi patiocamanmi, caru carulla catijurca. Chaiman yaicushpaca, huasita ricuj chapajcunahuanmi, ninapi cunushpa tiyajurca.
55Chaipica, sacerdotecunata mandajcuna, mandajpuralla tandanajuj runacunapashmi tiyanajurca. Paicunaca, Jesusta huañuchingapa, llullashpa juchachijcunata mascanajushpapash na tarircachu.
56Ashtacacunami, Jesusta fiñashpa, llullashpa juchachinajurca. Ashtahuangarin, shujta, shujta ninajushpami chashnapacha cajtaca na ricuchi usharca.
57Chaipica, huaquin runacuna shayarishpami, Jesusta fiñashpa, llullashpa cashna ninajurca:
58“Ñucanchica, cai runataca cashna nijujtami uyarcanchi: ‘Ñucaca, runacunapaj maquihuan rurashca, Diosta yarina cai huasitaca urmachishpami, shuj huasita quimsa punllapi shayachisha. Chaitaca, na maquihuan rurashcachu canga’ nijujtami uyarcanchi” ninajurcami.
59Chashna ninajushpapash, chashnapacha cajtaca na ricuchi ushanajurcachu.
60Shina ninajujpimi, sacerdotecunata mandajca tucuicunapaj chaupipi jatarishpa Jesustaca cashna nishpa tapurca:
“Caicuna, canda chashna ninanda juchachinajujpipash, ¿nachu imallatapash tigrachina cangui?” nircami.
61Ashtahuangarin Jesusca, imatapash na tigrachishpa, upalla shayajurcallami. Shinamandami, sacerdotecunata mandajca:
“¿Canllu, ninanda alicachi tucujuj Diospaj Churi Cristo cangui?” nishpa cutin tapurca.
62Shina nijpimi Jesusca, cashna nirca:
“Ari, Ñucami cani. Runa Aichayuj tucushca Ñucataca, ninan ushaita charij Taita Diospaj ali maquiman tiyajujtami, ricuhuanguichi. Jahua pachamanda, fuyupi shamujtapashmi ricuhuanguichi” nircami.
63Shina nijpimi, sacerdotecunata mandajca, paipaj churajushcata liquishpa, cashna nirca:
“¿Ashtahuan shuj villajcunata tapunarachu canchi?
64Diosta na ali shimicunata rimajujtaca, ñami uyanguichi. Cangunaca ¿ima ninguichita?” ninajurcami.
Shina ninajujpimi, paicunaca:
“Cai runaca, llaquichi tucushpa huañunapachami” ninajurca.
65Chashna nishpami huaquingunaca, ñavipi t'ucai callarirca. Paipaj ñavita huatashpami:
“¿Pita huajtanajunchi yachanguichu?” ninajurca.
Huasita ricuj chapajcunapash, ñavipimi huajtanajurca.
Pedroca, Jesusta na rijsinichu nishcami(Mat. 26:69-75; Luc. 22:56-62; Juan 18:15-18,25-29)66Pedroca, ucu patiopi cajpimi, sacerdotecunata mandajpajta rurajcunamanda shuj cuitsa shamurca.
67Ninapi Pedro cunujujta ricushpami:
“Cambashmari Nazaret pueblomanda Jesushuan purijurcangui” nirca.
68Ashtahuangarin paica, na rijsinichu nishpami cashna nirca:
“Chai runataca, rijsitapash na rijsinichu. Can imata nijujtapash na yachanichu” nishpa punguman llujshijhuanmi galloca candarca.
69Chai cuitsaca, Pedrota cutin ricushpami:
“Cai runaca, paipurapachamari” nishpami, chaipi tucuillaman villajurca.
70Ashtahuangarin Pedroca cutinmi:
“Napacha rijsinichu” nirca.
Chai jipallami, canllapi shayajcunapash Pedrotaca, cutin cashna ninajurca:
“Canga, paipurapachamari cangui. Galilea llactamanda cashpami, chai llacta rimaita rimajungui” ninajurca.
71Shina nijpimi Pedroca:
“Chai runataca, rijsitapash na rijsinichu” nishpa, ninanda na alicachishpa juramentui callarirca.
72Chashna nijhuanmi galloca, cutin candarca. Shinamandami Pedroca, Jesús villashca shimicunata yarirca. Jesusca, cashnami nishca carca: “Narapash gallo ishcaicaman candajpillatami canga, quimsacaman Ñucataca na rijsinichu nihuangui” nishcami carca. Chaita yarishpami ninanda huacajurca.
Who We AreWhat We EelieveWhat We Do
2025 by iamachristian.org,Inc All rights reserved.
