Psalms 104 - Quichua Imbabura 2016

Taita Diosca, Pai rurashcataca tucuitami ricujun

1Mandaj Diostaca, tucui shunguhuanmi alicachijusha.

Ñucata Mandaj Taita Dioslla,

Canga ninan ushaita charijmi capangui.

Canga, punchapamba, ninan ushaihuanmi ricuringui.

2Canga, michata churajushcashnami punchapamba cangui.

Jahua pachataca, telata mandajshnami churangui.

3Can causanataca, yacu chaupicunapimi churangui.

Canga, fuyupimi carretapishna purijungui.

Canga, huairapimi purijungui.

4Huairatami Canmanda villachun cachangui.

Rayuca, Cambajta rurajmi.

5Canmi cai pachataca, rumi jahuapi callarichircangui.

Ama cuyurichunmi chashna rurarcangui.

6Cai pachataca, mama cucha yacuhuan churachinshnami churarcangui.

Urcucunatami, yacucunaca quilparca.

7Can rimajpica anchurircallami.

Cambaj ninan ushaihuan rimajta uyashpaca, anchurircallami.

8Yacuca, lomacunaman rishpami, pugru pambacunapipash jundagrirca.

Can maipi churashca pushtumanmi rirca.

9Maicamanlla tiyachun Can mandashcataca, na yalingachu.

Na cutinga alpataca quilpangachu.

10Canmi, pugyu yacutapash, larcapi cachajungui.

Chai yacuca, urcu chaupicunatami rijun.

11Chai yacutami, pambapi tiyaj tucui animalcunaca ufianajun.

Sacha burrucunapash, chai yacutami ufianajun.

12Chai yacu rijuj manñacunapimi, jahuata rij alasyu animalcunaca causanajun.

Quiru malqui ucucunapimi candanajun.

13Pai causana jahua pachamandami, urcucunapica tamiachin.

Cai pachapi causajcunaca, Can fucuchishcatami micunajun.

14Paimi, animalcuna micuchun jihuata viñachijun.

Gentecunapaj ali cachumbashmi, jihuata viñachijun.

Gentecuna micuchunmi, pambapi fucuchijun.

15Cushijuchunmi vinotapash caran.

Ñavita alichij aceitetapashmi caran.

Micunatapash carashpami charin.

16Mandaj Dios churashca quirucunaca, yacusapa quirucunami.

Líbano urcupi Pai viñachishca cedro quirucunaca chashnapachami.

17Chaicunapimi, alasyu animalcunaca tazinda ruranajun.

Cigüeña angacunapash, chaipimi causanajun.

18Jatun urcucunataca, sacha chivocuna causachunmi rurashca.

Jaca rumi ucupimi, conejocunapash causan.

19Lunataca, ima pachacuna cajta yachangapami churashca.

Indica, ima pachapi huashajunatapash yachanmi.

20Tuta tiyachumbash, Canmi churashcangui.

Tutayajpimi, tucuilla sacha animalcunaca calpariyanajun.

21Maltun leongunaca, micunamandami huacanajun.

Taita Dios micunata carachunmi huacanajun.

22Indi llujshijpica, paicuna causana utujuman yaicunllami.

Chaipimi puñushpa saquirin.

23Runacunaca, punllayajpica imatapash rurangapa llujshinllami.

Chishangacamanmi, alpapi tarpushpa tucuita ruranajun.

24¡Mandaj Dioslla,

Can rurashcacunaca, ashtacapachami!

Cambaj ninan ushaihuanmi tucuita rurashcangui.

Cai pachaca, Can juyailla rurashcacunahuan jundami.

25Jatun mama cuchatapash Canmi rurashcangui

Chaipica, na yupai ushanalla animalcunami causan.

Uchilla animalcunapash, jatun animalcunapashmi chaipica causan.

26Chai yacupimi, jatun barcocunapash purinajun.

Can churashca leviatán animalpash, chaipimi pujllashpa purijun.

27Chai tucui animalcunaca, Candami shuyanajun.

Can micunata carachunmi shuyanajun.

28Can micunata carajpimi micunajun.

Ashtaca micunata carajpimi, na ushangacaman micunajun.

29Can micunata na carajpica, ninandami manllarinajun.

Can samaita quichujpica, huañushpami alpaman tigran.

30Can Samaita cujpimi, causaita charin.

Shinami, cai alpapi ashtaca miranajun.

31Mandaj Diospaj ninan ushaica, causaita causaicamanmi canga.

Mandaj Diosca, Pai rurashcacunahuan cushijuita charichun.

32Pai urai ricujpica, alpaca chujchunmi.

Urcucunapi Pai tacarijpica cushni llujshinllami.

33Mandaj Diostami, tucui causaipi candajusha.

Ñuca causaicamanga, Taita Diostami salmocunahuan candajusha.

34Paita yarishpa causanaca juyaillagumi.

Mandaj Dioshuanmi ninanda cushijushpa causasha.

35Juchata rurajcunaca, cai pachamanda anchuchi tucushca cachun.

Jatun na alita rurajcunaca, tucuilla tucurishca cachun.

Mandaj Diostallami ñucaca alicachisha.

¡Aleluya!