1 SAMUEL 30 - Quichua Imbabura 2016

Amalec gentecunata, David mishashcamanda

1Davidca, quimsa punlla jipami paita catijcunandi, Siclag shuti puebloman chayamurca. Chaipimi Amalec gentecunaca, Neguev shuti jichushca pambata rishpa, Siclag shuti pueblotaca, rupachishpa tucuillata tucuchishcata ricurca.

2Amalec gentecunaca, huarmicunata, tucui chaipi causajcunatami, uchillacunamanda callarishpa, rucucaman, shujllatapash na huañuchishpa prezu apashca carca.

3Davidca, paita catijcunandi chai puebloman chayamushpaca, tucuillata rupachishpa huarmicunatapash, huahuacunatapash prezu apashcatami ricunajurca.

4Chaita ricushpami Davidpash, paita catijcunapash, ninanda caparishpa, na ushangacaman huacanajurca.

5Jezreel pueblomanda Ahinoam shuti huarmitapash, Carmel shuti pueblomanda Nabal runapaj huarmi cashca Abigailtapashmi apashca carca. Paicunami Davidpaj ishcai huarmicuna carca.

6Chai runacunapaj huahuacunata prezu apashca cashcamandami, ninanda fiñarishpa, Davidtaca rumicunahuan huañuchishun ninajurca. Chaimandami Davidca, ninandapacha llaquirishpa, Mandaj Dioshuan ninanda shinlli tucujurca.

7Chai jipami Davidca, Ahimelecpaj churi sacerdote Abiatartaca: “Efod churajunata apamupai” nijpi, efod churajunata Davidman apamurca.

8Chaipimi Davidca, Mandaj Diosta cashna nishpa tapurca: “¿Chai shuhua runacunataca catishpa llaquichigrishachu? ¿Catishpa, japi ushanachu?” nirca. Shina nijpimi Taita Diosca: “Catishpa rilla. Paicunata japigrishpa, tucui prezu apashcacunata cacharichi ushanguipachami” nirca.

9Shina nijpimi Davidca, paita catij sucta patsaj runacunandi rishpa, ninanda jatarijuj Besor shuti yacu manñaman chayagrirca. Chaipimi huaquingunaca shuyanajurca.

10Davidca, chuscu patsaj runacunahuanmi catishpa rirca. Ashtahuangarin, ishcai patsaj runacunaca, ninanda shaijushca cashpami, Besor shuti yacuta na yali ushashpa saquirirca.

11Shuj pambata ña rinajushpami, Egipto llactamanda shuj runata tuparishpa, Davidpajman pushamunajurca. Chai runamanmi, tandatapash, yacutapash caranajurca.

12Shinallata higocuna chaquishcata rurashca tandatapash, ishcai malqui uvatapashmi cararca. Paica, quimsa punllata, na micushca, yacutapash na ufiashca cashpami, chaita carajpica yuyai japishpa shinlli tucurca.

13Chai jipami Davidca: “¿Pita cambaj amu? ¿Maimandata cangui?” nirca. Shina tapujpimi, egiptomanda huambraca, cashna nirca: “Ñucaca, Amalec llactamanda runapajta rurajmi cani. Chai runami, ñuca huañujujpi shitashpa saquihuarca. Cunan punllahuanga, ñami quimsa punllata cashna cani.

14Ñucanchimi, Neguev shuti pambapi causanajuj cereteo runacunatapash, Judá llactapi causajcunatapash, Neguev pambapillata causanajuj, Caleb runapaj miraicunatapash llaquichircanchi. Shinallata Siclag shuti pueblopica, ninatami japichircanchi” nircami.

15Shina nijpimi, Davidca: ¿Chai shuhua runacunapajman nachu ñucanchita pushanguiman? nirca. Shina nijpimi chai runaca: “Ñucata na huañuchingapa, ñuca amupaj maquipi na saquigringapa, Mandaj Diospaj ñaupajpi juramentujpica, pushashallami” nirca.

16Chai runa pushashpa chayagrijpica, filisteocunapaj llactamanda, Judá llactamanda, shuhuashpa imatalla apashcahuanmi ninanda cushijushpa, micushpa, ufiashpa, caipi, chaipi tiyanajurca.

17Chaipimi Davidca, chai tutamanda callarishpaca, cayandi punlla chishangacaman huañuchishpa tucuchirca. Chai runacunataca, shujllatapash na saquircachu. Ashtahuangarin chuscu patsaj huambracunallami camellocunapi tiyarishpa pacajushpa calparca.

18Shinami Davidca, Amalec runacuna imatalla apashcatapash, paipaj ishcandi huarmitapash cacharichishpa aparca.

19Tucui imatalla shuhuashpa apashcatami cutin apamurca. Shinallata huahuacunatapash, tucui ima shuhuashcacunatami, Davidca cutin quichumurca.

20Shinallata, llamacunata, huagracunatapashmi, Davidca quichumurca. Chaicunata, ñaupachishpa shamunajujpimi: “Caicunatami, Davidca quichumushca” ninajurca.

21Davidca, ishcai patsaj runacuna, ninanda shaijushca cashpa saquirishca, ninanda jatarij Besor shuti yacumanmi shamurca. Chai runacunaca Davidtapash, paihuan tigramunajuj runacunatapash tuparingapami llujshimurca. Chaipimi Davidca, “cushijui causaita charichi” nirca.

22Ashtahuangarin, Davidhuan macanajuiman rishca runacunamanda, na ali shunguta charij runacunaca cashnami ninajurca: “Paicuna ñucanchihuan chai macanajuiman na rishcamandaca, imatalla ñucanchi quichumushcacunataca, na cushunllu. Ashtahuangarin paicunapaj huarmicunata, huahuacunatalla apashpa richun” ninajurcami.

23Shina ninajujpimi Davidca, cashna nirca: “Ñuca huauquicunalla, na chashna ruranachu canguichi. Caicunataca, Mandaj Diosmi ñucanchiman cararca. Paillatami, ñucanchitapash huacaichishpa, ñucanchita llaquichingapa shamushca, chai na ali shuhua runacunatapash, ñucanchi maquipi churarca.

24Shina cashcamanda, canguna chashna ninajujtaca, ¿pita uyangapa munangayari? Macanajuiman rishcacunapash, tucuita ricungapa caipi saquirishcacunapash, tucuicunami chashnallata japinata charin” nircami.

25Chai mandashca shimicunaca, Israel llactapica, chashna pactachinajuchun, cunan punllacamanmi mandashca tiyajun.

26Siclag shuti puebloman David chayashpaca, macanajushpa imatalla quichumushcatami, Judá llactapi causanajuj pai rijsishca mandaj rucucunaman, cashna nishpa saquigrichun cacharca: “Mandaj Diosta fiñajcunata quichumushcatami saquichun cachamupani” nichunmi cacharca.

27Chaicunataca, Bet-el shuti pueblopi, Neguev shuti jichushca pambapi tiyajuj Ramot shuti pueblopi, Jatir shuti pueblopi mandajcunapajmanmi cacharca.

28Shinallatami, Aroer, Sifmot, Estemoa,

29Racal shuti pueblocunapi causajcunamambash, Jerameel shuti runapaj miraicuna causanajuj pueblocunamambash, ceneo gentecuna causanajuj pueblocunamambash cacharca.

30Shinallatami Horma, Corasán, Atac,

31Hebrón shuti pueblocunapi causajcunamambash carachun cacharca. Davidca, paita catij runacuna maipilla causanajuj pueblocunapipash saquigrichunmi cacharca.