1Ali yachanaca, paipaj huasitami shayachirca.
Llajllashpa rurashca canchis pilarcunahuanmi shayachirca.
2Jatun micuita charingapaca, animalcunata huañuchishpami,
vinotapash chapushpa, mezatapash alichirca.
3Chai jipaca, paipajta ruraj huarmicunatami,
pueblo muyundi pirca jahuacunamanda caparichun cacharca.
4“Maijambash nara ali yachajushcacuna caiman shamuichi” nijunmi.
Na aliguta yarishpa causajcunataca, cashnami nijun:
5“Ñuca micunata micuj shamuichi.
Ñuca chapushca ali vinota ufiaj shamuichi.
6Yangata causanata saquishpaca, alimi causanguichi.
Ali yuyaihuan purina ñambimi purina canguichi” nijunmi.
7Na cazushpa asij runata, ali tucuchun rimashpaca fiñai tucunguimi.
Diosta na cazuj runata jarcashpa rimashpapash, fiñashpa rimai tucunguimi.
8Na cazushpa asij runataca, canda ama fiñachun na rimanachu cangui.
Ashtahuangarin, ali yachajushca runata rimajpica, paica canda juyangami.
9Alipacha yachajushca runaman yuyaita cujpica, ashtahuanmi yachajunga.
Alitalla ruraj runata yachachijpica, paica ashtahuanmi yachajunga.
10Alipacha yachajushpa callaringapaca,
Mandaj Diostami manllashpa causana.
Jucha illaj Diosta rijsingapaca, ali yuyaitami charina.
11Ñucamandami, can causana punllacunaca ashtahuan miranga.
Can causana huatacunapash, ashtahuanmi miranga.
12Can alipacha yachajushca cashpaca, canbajllatami ali canga.
Na cazushpa asijun cashpapash, canllatami llaquichi tucungui.
13Juizu illaj huarmica, shimi cacharishcata rimaj huarmimi.
Paica imatapash na yachaj yangapachami.
14Paipaj huasi pungupimi tiyajun.
Paipaj huasica, pueblo ashtahuan jahuapimi shayajun.
15Paica, ñanda yalijcunata cayangapami, chashna tiyajun.
Paica, ali ñanda purijcunatami chashna cayajun.
16“Maijambash nara ali yachajushca runataca, caiman shamui” nijunmi.
Na ali yarishpa causajcunatapash, cashnami nijun:
17“Shuhuashca yacuca mishquimari,
tandata pacalla micunaca alipachamari” nijurcami.
18Ashtahuangarin, chaiman rishpaca huañuiman rinataca na yachanllu.
Pai cayashcacuna, Seol ucuman rishcatapash, na yachanllu.
Who We AreWhat We EelieveWhat We Do
2025 by iamachristian.org,Inc All rights reserved.
