RUT 2 - Quichua Imbabura 2016

Rut huarmigu, Booz runapaj pambapi cebadata pallajujushcamanda

1Noemica, paipaj cusamandami, shuj aylluta charirca. Paipaj cusa Elimelec runagupaj aylluca, Booz shuti ninan charij runami carca.

2Moab llactamanda, Rut huarmiguca, Noemitaca cashnami nirca: “Pambapi pallajungapa richun cachahuai. Maijambaj ñavipipash ali ricurishpaca, paipaj huashata catishpa pallajushallami” nijpimi Noemica: “Rilla, ñuca huahualla” nirca.

3Shina nijpi rishpami, cebadata cuchunajujta catishpa pallajushpa purijurca. Chai pambaca, Elimelecpaj ayllu, Booz shuti runapajmi carca.

4Booz shuti runaca, Belén pueblomanda chayamushpami, cebadata cuchuj runacunataca: “Mandaj Dios, cangunataca bendiciachun” nirca. Shina nijpimi paicunaca: “Mandaj Diosca, candapash bendiciapachun” ninajurca.

5Booz shuti runaca, cebadata cuchujcunapaj mayordomo paipajta ruraj runatami: “¿Caica, pipaj cuitsaguta?” nishpa tapurca.

6Shina tapujpimi, mayordomo runaca, cashna nirca: “Paica, Moab llactamanda cuitsagumi. Moab pambacunamandami, Noemí huarmiguhuan tigramurca.

7Paimi, ñucataca: ‘Cebadata cuchujcunata catishpa tandachijuchun, marcai cebada churashcamanda jicharishcata tandachijuchun saquihuai nipanimi’ nihuarca. Tutamandata callarishpami, ashagullatapash na samashpa, cunangaman pallajushpa purijun” nircami.

8Shina nijpimi Booz shuti runaca, Rut huarmigutaca cashna nirca: “Ñuca huahualla. Shuj alpacunapi pallajungapaca, ama ringuichu. Caimandaca ama yalinguichu, ñucaman imatalla ruraj huarmicunahuan caipi pacta purijunguilla.

9Pambapi cebadata maipi cuchunajujta ricushpa catinguilla. Ñucapajta rurajcunataca, canda ama imatapash nichun mandarcanimi. Can yacunayachishpaca, paicuna llujchimushca yacuhuan tiyanajuj funducunamanda, japishpa ufiagringuilla” nircami.

10Shina nijpimi, Rut huarmiguca, urai cumurishpa, alpapi cungurishpa, cashna nirca: “Ñucaca, shuj llactamanda cashpapash can alicachishpa ricuchunga, ¿imashpata cambaj ñaupajpica alipi ricuripashcani?” nircami.

11Shina nijpimi Booz shuti runaca, cashna nirca: “Cambaj cusa huañushca jipa, cambaj cusapaj mamamanda, tucui imatalla rurashcatapash yachanimi. Cambaj taitata, mamatapash, can huacharishca llactatapash saquishpami, napacha rijsishca llactaman shamushcangui.

12Can chashna rurashcamandaca, Mandaj Diosllata candapash bendiciapachun. Canmanga, Israelcunata Mandaj Taita Diosllata tucui imatapash carashpa ali canmanmi. Dios huacaichijpi causangapami shamushcangui” nircami.

13Shina nijpimi, Rut huarmiguca, cashna nirca: “Ñucata mandajlla, cambaj ñaupajpica ali ricurishpami ali capaiman. Cam rimashca shimicunapash cushichihuanmi. Canman ruraj huarmicunamanda, maijan huarmishnallapash na capanichu. Chashna cajpipash, ali shimihuan rimashpami, canman ruraj ñucataca cushichihuashcangui” nircami.

14Ña micugrinajushpami, Booz shuti runaguca: “Tandata vinagrepi mutiyachishpa micungapa caiman shamui.” nirca. Shina nijpimi Rut huarmiguca, cebadata cuchujcunahuan tandanajushpa, micungapa tiyarirca. Chaipica, cebada camllashcata carajpimi, na munangacaman micushpa, puchuchircara.

15Rut huarmigu jatarishpa, cutin pallajungapa rijpimi, Booz shuti runaca, paipajta rurajcunataca, cashna nishpa mandarca: “Marcai cebadamanda japijpipash, na imatapash nishpa pingaichinachu canguichi.

16Ashtahuangarin, pai tandachishpa japichun, cangunapaj maquimandapash asha asha urmachinguichilla. Paitaca, pipash na jarcashpa rimanachu canguichi” nircami.

17Tutayangacamanmi, chai pambapica pallajushpa purijurca. Pai pallajushca cebadata jacujpica, ishcai chunga kiloshna cebadami llujshirca.

18Chai cebadata apashpa puebloman rijpimi, paipaj cusapaj mama Noemica, pai tandachishcata ricujurca. Chai jipaca, pai micujushpa huanllashcatapashmi, Noemiman cararca.

19Chaita ricushpami, paipaj cusapaj mamaca, cashna nirca: “¿Cunanga, maipita pallajurcangui? ¿Maipita chashna tandachircangui? Canda chashna yanapashcamandaca, paitapash bendiciapachun” nircami.

Shina nijpimi Rut huarmiguca, maipi pallajushcatapash, cashna nishpa villarca: “Booz shuti runagupaj pambapimi pallajushpa shamuni” nirca.

20Shina nijpimi Noemica, paipaj jachundaca cashna nirca: “Chai runagutaca, Mandaj Dios bendiciapachun. Punda huañushcacunatapash juyashca cashpami, cunan ñucanchi causajtapash juyashca” nircami. Chai jipaca, Noemica cashnatapashmi nirca: “Chai runaguca, ñucanchipaj ayllumari. Paimi, ñucanchimanga ima charishcata tigra japichun yanapai ushanga” nircami.

21Shina nijpimi Moab llactamanda Rut huarmiguca, cashna nirca: “Ashtahuan cashnatapashmi nihuarca: ‘Cebada cozechai tucuringacaman, ñucaman ruraj huarmicunahuan tandanajushpa purijunguilla’ nihuarcami” nircami.

22Shina nijpimi Noemica, paipaj jachun Rut huarmigutaca, cashna nirca: “Ñuca huahualla, chaica alipachamari. Ama shuj alpacunaman rishpa, paiman ruraj huarmicunahuan tandanajushpa purijunguilla” nircami.

23Chaipimi, cebadata, trigota cozechai tucuringacaman pallajushpa, Booz shuti runaman ruraj huarmicunahuan tandanajushpa purijurca. Rut huarmiguca, paipaj cusapaj mamahuanmi causajurca.