2 SAMUEL 17 - Quichua Imbabura 2016

Ahitofel shuti, Husai shuti runacunami yuyaita cushca

1Chai jipami Ahitofel shuti runaca, Absalondaca cashna nirca:

“Cunanga, chunga ishcai huaranga runacunata agllashpami, cunan tutallata Davidta catishpa rigrini.

2Paitaca, shaijushca na ushajundami, chaipi japigrisha. Shina chayajpi, paihuan chaipi tandanajushca tucui gentecuna pacajushpa calpajpimi, jatun mandajtalla japishpa huañuchisha.

3Shina rurashpami, tucui gentecunata cambajman tigrachimusha. (Canga, shuj runa huañuchunllami munangui). Paicuna tigramujpimi gentecunaca, ali causaita charinga” nircami.

4Cai yuyaica Absalón runapajpash, Israelcunata mandaj tucui rucucunapajpash alimi uyarirca.

5Chai jipami Absalonga, cashna nirca:

“Cunanga, arquitapura Husai shuti runa ima nijta uyangapa, paita cayamuichi” nircami.

6Absalón runapajman, Husai shuti runa chayamujpimi cashna nirca:

“Ahitofel shuti runaca: ‘¿Pai yuyaita cushcataca catishunllu, na cashpaca saquishunllu? ¿Canga, ima ninguita?’” nirca.

7Shina nijpimi Husai shuti runaca, Absalondaca:

“Ahitofel runa cushca yuyaica, napacha alichu” nirca.

8Husai shuti runaca, cashnatapashmi nirca:

“Cambaj taitapash, paita catij runacunapash ninan shinlli cajtaca, yachanguimi. Cunangarin, sachapi causaj huarmi osopaj huahuacunata quichujpi ninanda fiñarishcashnami canga. Chai jahuapash cambaj taitaca, macanajunata ali yachaj cashpami, cunan tutaca na paicunahuan pacta canga.

9Cunanga, paica maijan jatun utujupi, na cashpaca maipi cashpapash pacajuriyajungami. Macanajui callarijpillata, canda catijcunata huañuchijpi, chaita maijambash yachashpaca: ‘Absalonda catij gentecunaca, mishai tucushcamari’ ninajungami.

10Chaita uyashpaca, maijan ninan shinlli runa, leonshna fiñarij shunguta charishpapash ninandapacha manllashpami, ushai illaj saquiringa. Tucui Israelcunami, cambaj taita ninan shinlli cajta, paihuan purij runacunapash, ninan ushaita charijtaca yachan.

11Tucui Israelcunaca, Dan pueblomanda callarishpa Beerseba pueblocaman, mama cucha manñapi tiyaj t'iyu alpashna canhuan tandanajuchunmi yuyaita cuni. Chai macanajuimanga canmi llujshina cangui.

12Chashna llujshishpami maipi cajpipash, pambapi paramu urmajshna, paitaca japishun. Shina japishpami paitapash, paita catijcunatapash shujllatapash na saquishpa, tucuillata huañuchishun.

13Imashpapash maijan pueblopi pacajugrijpica, tucui Israelcunami cabiacunata chai puebloman apanga. Chaicunahuanmi aisashpa, chai pueblo pircacunataca, shuj rumillatapash chaipica na saquishpa, larca yacuman shitashun” nircami.

14Shina nijpimi Absalonbash, tucui Israelcunapash cashna ninajurca:

“Arquitapura Husai shuti runa cushca yuyaimi, Ahitofel runa cushca yuyaitaca yali alipacha” ninajurcami.

Ahitofel runa cushca yuyai yangapacha cachunmi, Mandaj Diosllata chashna rimachirca. Mandaj Diosca, Absalonda llaquichingapami chashna rurarca.

15Chai jipami Husai runaca, Sadoc shuti, Abiatar shuti sacerdotecunatapash, cashna nirca:

“Ahitofel runaca, Absalonmambash, Israelcunata mandaj rucucunamambash, cashna, chashna yuyaitami curca. Ashtahuangarin ñucaca, cashna yuyaitami curcani.

16Shina cashcamanda, Davidman uchalla cashna nishpa villachun cachaichi: ‘Cunan tutaca, jichushca pambamanda chimbai ushanalla pushtupica na saquirishpa, can jatun mandajpash, canhuan purinajuj tucuilla gentecunapash, ama huañungapaca, Jordán yacutami uchalla chimbana canguichi’ nishpa villachun cachaichi” nircami.

17Jonatán shuti, Ahimaas shuti runacunaca, Rogel shuti pugyupimi carca. Paicunaca, Jerusalenman shamushpa imashna ricuritapash na ushanajujpimi, shuj huarmi shamushpa paicunaman villarca. Paicuna rishpami, jatun mandaj David yachachun villanajurca.

18Chashna villangapa rinajujta shuj huambra ricushpami, Absalonman villagrirca. Ashtahuangarin, paicuna ninanda rishpami, Bahurim shuti pueblopi causaj shuj runapaj huasiman chayagrirca. Chai huasi patiopica, yacuta llujchingapa allashca jatun utujutami charirca. Chai utujupimi pacajurca.

19Chai huasipi causaj huarmica, shuj fachahuan, chai jatun utuju shimita quilpashpami, chai jahuapica, trillashca trigota churarca. Shina rurajpimi, chaipica ima tiyajujtapash na yacharca.

20Chai jipaca, Absalón runapajta rurajcuna chai huarmipaj huasiman ña chayashpami:

“¿Ahimaas shuti, Jonatán shuti runaca maipita?” nishpa tapurca.

Shina tapujpimi, chai huarmica:

“Yacuta chimbai ushanalla pushtutaca ñami yalirca” nirca.

Shina nijpimi, paicunaca mascanajushpapash na tarishpallata Jerusalenman tigranajurca.

21Paicuna ña rishca jipami, yacuta llujchingapa allashca jatun utujumanda llujshishpa rishpaca, jatun mandaj Davidman cashna nishpa villanajurca: “Jordán yacuta ucha chimbaichi. Ahitofel runaca, cangunata huañuchinajuchunmi yuyaita cushca” ninajurca.

22Shina villajpimi nara pacarijpillata Davidpash, paita catij runacunapash, Jordán yacuta chimbanajurca. Jordán yacuta tucuilla chimbashpami, shujllapash na chaipi saquirirca.

23Ashtahuangarin Ahitofel runaca, pai yuyaita cushcacunata na rurajpimi, burrupi tiyarishpa, pai huacharishca pueblopi tiyajuj huasiman rirca. Paipaj huasipi imatalla ruranatapash ña rurashca jipami, sipirishpa huañurca. Pai huañujpica, paipaj taitata pambashca utujupillatami pambarca.

24Davidca, Mahanaim shuti pueblomanmi chayagrirca. Shinallata Absalonga, tucui Israelcunandimi, Jordán yacuta chimbanajurca.

25Absalonga, Joab runapaj randica, Amasa shuti runatami, paipaj macanajuj runacunata mandaj cachun churarca. Amasa shuti runaca, Israelpura Itra shuti runapaj churimi carca. Itra shuti runaca, Nahas shuti runapaj ushi Abigailhuanmi causarca. Paica, Joab runapaj mama Sarvia shuti huarmipaj ñañami carca.

26Israelcunaca, Galaad llactapimi carpacunata shayachishpa, Absalonhuan tiyanajurca.

27Mahanaim shuti puebloman David chayajpimi, Amón llactapi tiyajuj Rabá shuti pueblopi causajuj Nahas shuti runapaj churi Sobi shuti runapash, shinallata Lodebar shuti pueblopi causajuj Amiel shuti runapaj churi Maquir shuti runapash, Galaad llactapi tiyajuj Rogelim pueblopi causajuj Barzilai shuti runapash tuparingapa llujshirca.

28Paicunaca Davidmambash, paita catijcunamambash carangapami: Camacunata, tastacunata, alpa mangacunata apamurca. Shinallata, trigota, cebadata, cutashca jacuta, camllashca granota, jabasta, lentejata, camllashca garbanzota,

29balun mishquita, virata, llamacunata, huagra leche quezocunatapashmi apamurca. Gentecunaca, jichushca pambapica, shaijushca, yarjachishca, yacunayachishcami canga yashpami, paicuna micuchun chaicunata apamurca.