EZEQUIEL 31 - Quichua Imbabura 2016

1Chunga shuj huatapaj, quimsa quilla, callari punllapimi, Mandaj Diosca cashna nihuarca:

2“Huañuna aichayuj runa, Egipto llactata jatun mandaj Faraondapash, chaipi gentecunatapash cashna ningui:

‘Can ninan ushaita charishcataca, ¿imahuanda chimbapurashpa ricunga?

3Asiria llactaca, Líbano llactapi tiyaj juyailla malqui junda jatun cedro quirushnami carca.

Jatunda viñashpa, malquicuna jundashcashnami carca.

Chai quiru umapash, ashtaca malqui chaupicunapimi carca.

4Paitaca, tamiapash, alpa ucu yacupashmi viñachirca.

Jatun yacucunaca, paipaj chaqui muyunditami urai rinajurca.

Chai rijuj yacucunaca, pambapi tiyaj chaishuj quirucunatapashmi viñachijurca.

5Chai quiruca, caishuj quirucunatapash, yalishpami viñarca.

Ashtaca yacu tiyashcamandami, paipaj malquicunaca ashtahuan viñarca.

6Paipaj malquicunapimi, jahuata rij alasyu animalcunapash, tazinda ruranajurca.

Chai quiru malqui ucupica, pambapi causaj animalcunami huachanajurca.

Tucui llactacunamanda shamujcunami, chai quirupaj llandupica, samanajurca.

7Paipaj sapicuna ashtaca yacu manñapi cashcamandami,

jatun malquicuna tucushpa, ninanda viñashpa juyailla tucurca.

8Chai quiruca, Taita Diospaj pambapi tiyaj cedro quirucunatapash yalimi carca.

Haya shuti quiru malquicunatapash, ashtahuan yali juyaillagumi carca.

Castaño quirucunatapash, ashtahuan yali juyaillagumi carca.

Taita Diospaj pambapica, shuj quirullapash na paishna juyaillaguca tiyarcachu.

9Paitaca, malqui junda, juyailla quiru cachunmi churarcani.

Chaimandami, Taita Diospaj Edén pambapi tiyaj tucui quirucunaca,

chashna cashcaiman yashpa ricunajurca’ ningui” nihuarcami.

10Chaimandami Mandaj Jatun Diosca, cashna nirca: “Paica, tucuicunata yali jatunda viñashcamanda, malqui junda cashcamanda, chaupipi jatun ñavita charishcamandami, paipaj shungupica ninanda jariyajurca.

11Chaimandami paitaca, shuj llactacunapi causanajuj ninan ushaita charijcunaman cusha. Paicunaca, pai na alita rurashcashnallatami llaquichinga. Paitaca, Ñucami shitashpa saquircani.

12Paitaca, caru llactamanda shamujcunami llaquichishpa tucuchinajunga. Shuj llactacunapi causanajuj ninan ushaita charijcunami, paitaca urmachinajunga. Shinamandami, tucui paipaj malqui fangacunaca, urcu jahuacunapi, pugru pambacunapi, tucui llactacunapi tiyaj jatun larca yacucunapi urmanga. Shinallata, chai quiru ucupi llandunajuj shuj llactacunamanda gentecunapashmi, paitalla saquishpa rinajunga.

13Chai quiru urmashca jahuapimi, jahuata rij alasyu animalcuna causanajunga. Chai malqui jahuacunapimi, pambapi causaj animalcuna sirinajunga.

14Yacu manñapi viñaj quirucuna, chashnallata jatunda viñashpa ama jariyachunmi chashna urmachircani. Shinallata, yacuhuan ninanda viñashpa, malqui junda tucushpa, paicunallata ama jariyanajuchunmi, chashna ruragrini. Tucuicunallatami huañushpa, alpa ucuman rina canguichi. Cangunapash, huañuna aichayuj runacunandimi, cai pacha alpaman tigrana canguichi” nircami.

15Mandaj Jatun Diosca, cashnami nirca: “Seolman pai uriajuj punllapillatami, llaquihuan cashpa churajunata churachircani. Manllanayai ucupi tiyaj yacuhuanmi quilparcani. Paicunapaj jatun yacucunatapash, ashtaca yacucunatapashmi jarcarcani. Paimandami, Líbano urcutapash yana yana tutahuan quilparcani. Pambapi shayanajuj quirucunapashmi, urmanajurca.

16Paita, Ñuca ninan ushaihuan urmachijpimi, alpa mamapash cuyurca. Paitaca tucuicunahuan tandachishpami, Seolman urai cacharcani. Shina rurajpimi, Edén pambapi tiyaj agllashca quirucunapash, Líbano urcupi tiyaj tucuimanda yali ali quirucunapash, yacuta chupaj tucui quirucunapash, tucuicunallata chashnallatami canchi yanajunga.

17Espadahuan huañuchi tucushcacunapash, shuj llactamanda shamushpa, quiru llandupi samajcunapash, tucuicunallata Seolman urai rinajurca.

18Can juyailla canata, jatun tucushca canataca, ¿Edén pambapi tiyaj maijan quiruta ricushpata, chashnallatami cani yajungui? Ashtahuangarin, Edén pambapi quirucunandimi, cai pacha alpa ucuman shitai tucungui. Circuncisionda na rurashcacunahuan, espadahuan huañuchi tucushcacunahuanmi pacta tucuringui. Faraondapash, paipaj tucui gentecunapashmi chashna tucunga” nijurcami Mandaj Jatun Diosca.