ROMANOS 8 - Quichua Imbabura 2016

Diospaj Espíritu munashcashna causanamanda

1Shina cashcamanda, Cristo Jesushuan shujlla tucushcacuna, aicha munaita na rurashpa Diospaj Espíritu munashcatalla rurashpa causajcunaca, ninan llaquimanga napacha cachai tucungachu.

2Cristo Jesushuan shujlla tucujpica, Espíritu mandashca shimicunami, juchata rurachishpa huañuiman apanamanda cacharichishpa causaita curca.

3Juchayu causanajujpimi, mandashca shimicunaca juchataca napacha anchuchi usharca. Shinamandami, Taita Diosca, Paipaj Churitaca, juchayu gentecunashna aichayuj tucushpa shamuchun cachamurca. Shinami, Paipaj aichapillata juchataca tucuchirca.

4Mandashca shimicunapi, alitalla ruranata yachachijujta pactachinajuchunmi chashna rurarca. Shina cashpami, Diospaj Espíritu yachachijujta catishpa, na ñucanchi munaita rurashpa causanchi.

5Paicunapaj munaita rurashpa causajcunaca, aicha munaita ruranatallami yariashpa causanajun. Ashtahuangarin, Diospaj Espíritu mandajpi causajcunaca, Diospaj Espíritu mandashcatami rurashpa causanajun.

6Aicha munaita rurashpa causanaca, huañuimanmi apajun. Ashtahuangarin, Diospaj Espíritu munashcata rurashpa causanaca, shungupi cushijushpa causaimanmi apajun.

7Aicha munaitalla rurashpa causanaca, Taita Diostami fiñachinajun. Shina cashpami, Taita Dios mandashcata, cazungapa munashpapash, napacha cazui ushashpa causanajun.

8Aicha munaitalla rurashpa causajcunaca, Taita Diostaca napacha cushichi ushanllu.

9Ashtahuangarin cangunami, na aicha munashcataca rurashpa causanguichi. Shinallata, Diospaj Espíritu cangunapaj shungupi causajujpimi, Diospaj Espíritu munashcata ruranajunguichi. Cristopaj Espirituta maijambash na charishpaca, napacha Paipajchu canguichi.

10Shina cashpami, juchata rurashcamandaca cangunapaj aichaca ña huañushcallata canguichi. Shina cajpipash, Cristo cangunapi causajujpimi, Taita Diosca alitalla rurashcatashna chasquijpi, cangunapaj espirituca causaita causanga.

11Ashtahuangarin, huañushcacunapaj chaupimanda Jesusta causachij Diospaj Espiritumi cangunapi causajun. Cristo Jesusta causachij Diosca, Paipaj Espirituhuan cangunapi causajushpami, cangunapaj huañunalla cuerpotapash causachinga.

12Shina cashcamanda tucui crijcuna, aicha munaitaca napacha rurashpami causana canchi.

13Aicha munaitalla rurashpa causashpaca, huañunguichimi. Ashtahuangarin, aicha munashcata ruranata, Diospaj Espirituhuan huañuchishpaca, causanguichimi.

14Taita Diospaj Espíritu yarichijujta pactachishpa causajcunaca, Taita Diospaj huahuacunami canguichi.

15Gañanshna, cutin manllaihuan causanata yachachij espiritutaca, na chasquishcachu canguichi. Ashtahuangarin, Diospaj huahuacunata ruraj Espiritutami chasquircanguichi. Shinamandami: “¡Ñuca Taitalla!” nishpa capari ushanchi.

16Diospaj Espiritullatami, ñucanchi espiritutaca: “Cangunaca, Taita Diospaj huahuacunami canguichi” nishpa yarichijun.

17Paipaj huahuacuna cashpami, pai carasha nishcataca japigrishun. Cristohuan llaquita pacta apashca cashpaca, Taita Dios carasha nishcataca Paihuanmi japigrishun. Shinallata, Paihuanllatami ninanda alicachi tucushun.

18Cai punllacunapi llaquicunaca, shamui punllacunapi ñucanchi alicachi tucunahuan ricushpaca, na imapash cajtami alipacha yachani.

19Taita Diospaj huahuacuna cashcata ricungapa munashpami, Dios rurashca ima tiyajcunapash, ninanda ricunayachishpa chapanajun.

20Dios rurashca ima tiyajcunapash, na paicunapaj munaimandaca chashna huatashcashna tiyanajunllu. Ashtahuangarin, Diospi shuyashpa chapariyachunmi chashna tucushca.

21Pai rurashca ima tiyajcunapash, huatashcashna na alipi causanajujtami Taita Diosllata, Paipaj huahuacuna juyailla causagrichun cacharirca.

22Pai rurashca ima tiyajcunapash, tucuicunami shujllashnalla, huahuata ungungapa ninanda nanachijshna, llaquita apanajun. Chaitaca alimi yachanchi.

23Na chaicunalla chashna canllu. Ashtahuangarin, ñucanchipashmi punda japigrinata ricuchijuj Diospaj Espirituta charishpapash, shungu ucupilla ninanda llaquirinajunchi. Ñucanchi cuerpota quishpichishpa, “ñuca huahuacunami canguichi” nichunmi shuyanajunchi.

24Chashna shuyanajushpami quishpirircanchi. Imatapash ña ricushpaca, na ashtahuan shuyanaca tiyanllu. Chai shuyajushcata ña ricushpaca, ¿imatata ashtahuan shuyangayari?

25Ashtahuangarin ñucanchi shuyanajushcata nara ricushpapash, shuyanajunallami canchi.

26Shinallatami, ñucanchi nara shinlli cajpipash, Diospaj Espirituca yanapajun. Diosta imashna mañaitapash na ushajpimi, Paipaj Espiritullata, na rimai ushanalla shimicunahuan ñucanchimandaca, Diosta mañariajun.

27Ashtahuangarin, shunguta ali rijsij Diosmi, Paipaj Espiritupi imata yarichijujtapash yachan. Diospaj Espirituca, Taita Dios munashcashnami Paipajlla causajcunamandaca mañariajun.

Mishajcunapachami canchi

28Taita Diosta juyajcunapajca, tucui imapash ali cachunmi Diosllata rurajun. Paipajta rurachun, Pai munashcashna agllashcacunapajmi chashna rurajun.

29Diosca, pundamandapacha ña rijsishpami, Paipaj Churiman rijchajcuna cachun agllarca. Shinallata, Paipaj Churica tucui crijcunapaj punda cachunmi chashna agllarca.

30Chai agllashcacunataca, Diosllatami cayarca. Pai cayashcacunataca, alitalla rurajcunatashna chasquishpami, jatumbi churarca.

31Shina cajpica, ¿imatata nina canchi? Taita Dios ñucanchihuan cajpica, ¿pita ñucanchitaca fiñashpa llaquichi ushanga?

32Taita Diosca, Paipaj Churitapachapash na mitsashpami, tucuicunamanda huañuchun cachamurca. Shina cashpaca, ¿nachu ñucanchimambash, Paipaj Churihuan japichun caranga?

33Taita Dios agllashcacunataca, ¿pita juchachingayari? Taita Diosmi, alitalla rurashcatashna chasquijun.

34Ninan llaquiman cachaitaca ¿pita ushangayari? Cristoca ñamari huañurca. Na chaillachu, ashtahuangarin huañushcamanda causarishpami, Taita Diospaj ali maquiman tiyajushpa ñucanchimandaca mañariajun.

35Cristo ñucanchita juyashcataca ¿pita anchuchi ushangayari? Llaquipash, huacaipash, llaquichi tucujuipash, yarjaipash, churajuna illaipash, huañuchinallapi purijuipash, espadahuan huañuchi tucunapash na anchuchi ushangachu.

36Quilcashcapica cashnami nijun:

“Canmandami, punllandi huañuchi tucunajunchi.

Huañuchingapa shicanyachishca llamacunashnami canchi” nijunmi.

37Ashtahuangarin cai tucui llaquicuna japijpipash, Cristo juyajujpimi, tucui llaquita mishai ushanchi.

38Shina cajpimi, caitaca aligutapacha yachani: Huañuipash, causaipash, angelcunapash, ninan ushaihuan mandajcunapash, huairapi mandajcunapash, cunan punllacunapash, shamui punllacunapash,

39jahua pachapi, ucu pachapi ima tiyajcunapash, Dios rurashca imacunapash, ñucanchi Apunchi Cristo Jesusmanda, Taita Dios juyajujtaca napacha anchuchi ushangachu.