1Ñucanchiman ushaita caraj Taita Diosmanmi, cushijuihuan candana canguichi.
Jacobpaj Taita Diostami, caparishpa alicachina canguichi.
2Candashpa, panderocunata huajtashpa,
uyanayaita huacaj arpahuambash, salteriohuambash taquichiyari.
3Llullu luna punllapipash, trompetata taquichiyari.
Mandashpa churashca, ñucanchi cushijuna jatun punllapipash, taquichiyari.
4Cai mandashcata pactachinajuchunmi Israelcunaman cushca.
Jacobpaj Taita Diosmi chashna mandashca.
5Egipto llactamanda llujshimujpimi,
caita pactachinajuchun Josepaj miraicunahuan cushca.
Ñuca na rijsishca rimaipimi, cashna nij uyarirca:
6“Ñucami, paicunapaj rigramanda llashaj quipita anchuchircani.
Paicuna apanajushca canastacunatami saquichircani.
7Jatun llaquipi cashpa, Ñucata caparishpa mañajpimi, quishpichircani.
Pipash na yachai ushanalla, culun nijuj ucumandami rimarcani.
Meriba shuti yacu manñacunapimi, canguna imashna cajtaca ricurcani. Selah
8Ñuca agllashca gentecunalla,
shinllita ñuca tacurishcata uyaichiyari.
Israelcunalla,
ñuca ima nishcata uyaichiyari.
9Rurashcalla diostaca, na charinachu canguichi.
Na rijsishca diostaca, na cungurishpa mañanachu canguichi.
10Ñucami, cangunata Mandaj Taita Dios cani.
Ñucami Egipto llactamanda llujchimurcani.
Canguna imata mañajpipash carashallami.
11Ashtahuangarin, Ñuca agllashca gentecunaca na uyahuarcachu.
Israelcunaca, ñucataca na juyahuarcachu.
12Chaimandami, paicuna munashcata ruranajuchun saquircani.
Paicuna munashcatallami rurashpa causanajurca.
13¡Ñuca agllashca Israelcunalla, Ñucata uyashpa,
Ñucata cazushpa purijpica!
14Cangunata fiñajcunataca, ñapashmi tucuchiman carcani.
Cangunata fiñajcunataca, Ñuca ushaihuanmi tucuchiman carcani.
15Mandaj Diosta na ricunayachijcunataca ñapashmi tucuchiman carcani.
Paicunataca, causaita causaicamanmi llaquichiman carcani.
16Shina cashpapash, Taita Dios Ñucami, ashtahuan ali trigota caraiman carcani.
Jaca rumimanda balun mishquitami, na munangacaman caraiman carcani” nijunmi uyarirca.
Who We AreWhat We EelieveWhat We Do
2025 by iamachristian.org,Inc All rights reserved.
