2 CORINTIOS 5 - Quichua Imbabura 2016

1Cai pachapica, talirishpa tucurinalla carpa huasishna causanajushcataca ñucanchica alimi yachanchi. Shina cashpapash jahua pachapimi, na maquihuan rurashca shuj huasita charinchi. Chaitaca, Taita Diosmi causaita causachun rurashca.

2Shina cajpica, jahua pachapi causagrinatami, churajunata churajujshna japigrinata, ninandapacha munashpa shuyanajunchi.

3Chashnami churajunata churajushcashna cashpa, na lluchulla ricurishunchi.

4Cai causaipica, carpa huasishna cashpami, ninandapacha llaquirishpa causanajunchi. Cai huañunalla cuerpotaca, mushuj causaimi chingachinga. Shina cashpami, mushujta churajushcashna causashunchi.

5Ashtahuangarin, chaita japigrichunmi Taita Diosca, ñucanchitaca, Paipaj Espirituhuan agllashpa, ña rijsinallata saquishca.

6Shinamandami chaita crishpa, chaita yariajlla causanajunchi. Shinallata, caipi causanajushpaca, Apunchi Jesusmandaca carupira cashcatami yachanchi.

7(Paitaca, na ricushpapash, crishpami causanajunchi).

8Ashtahuangarin crishpami, caipi causangapaca na munashpa, Apunchi Jesushuan causagringapa ninanda munanchi.

9Shinamandami causajushpapash, huañushpapash, Apunchi Jesustalla cushichishpa causangapa munanchi.

10Tucuicunami, Cristopaj ñaupajpi ricurigrinapacha canchi. Chaipimi Cristoca, ñucanchi causajushpa alita rurashca cajpi, na alita rurashca cajpipash ricushpa, imata cuna cashcata cunga.

Dioshuan ali tucunatami villashca

11Apunchi Jesusta manllanapacha cashcata yachashpami, chaitaca shujcunamambash cutin cutin villanajunchi. Shina cajpimi Taita Diosca, ñucanchi imashna causanajujtaca alipacha yachan. Chaitaca, cangunapash yachachunmi munani.

12Ñucanchillata “alimi canchi” nishpaca na villana cashcatami yachanchi. Ashtahuangarin, ñucanchi imashna ali purinajujta yachashpa canguna cushijuchunmi munanchi. Ñavi ricuipilla ali purinajujcunataca, upallayajta rimachunmi chashna villanajunchi.

13Juizu illajshna cashpapash, Taita Diospajmi chashna canchi. Shinallata, ali yuyaita charishpaca, cangunapaj ali cachunmi chashna canchi.

14Cristopaj juyaica, ñucanchipi cashpami imatapash alita rurachun yachachijun. Caitami yarichijun: Shujlla, tucuicunamanda huañujpimi, na alita ruranamandaca tucuicuna huañushcashna canchi.

15Cunanbi causajcuna, paicunapaj munaipi ama causachunmi, Cristoca tucuicunamanda huañurca. Ashtahuangarin Cristopajlla causachunmi, paicunamandaca huañushpa causarirca.

16Cunanmandaca, cai pachapi causajcunataca, pitapash na yangapi churanachu canchi. Cristotaca, yanga runatashna rijsishca cashpapash, cunanga na chashnallata cajtami yachanchi.

17Shinamandami, Cristohuan shujlla tucushca cashpaca mushuj causaita charinchi. Punda na ali causai tucurijpimi, cunanga tucuilla mushuj tucushca canchi.

18Tucui caicunaca, Taita Diosmandami shamun. Diosllatami, Cristo tucuita pactachishcamandaca ñucanchihuan ali tucurca. Shinallata Paillatami: “Dioshuan ali tucupaichi” nishpa villachun ñucanchiman mingarca.

19Taita Diosca, Cristohuanmi tucuita pactachirca. Shina cajpimi, cai pachapi causajcunaca, tucuicuna Paihuan ali tucui ushanchi. Gentecunapaj juchacunata perdonashpa, Paihuan cutin ali tucunata villachunmi, Paillata ñucanchiman mingarca.

20Shina cajpica, Cristopaj shutipi rimajcunami canchi. Shina cashpami: “Cristopaj shutipi Taita Dioshuan cutin ali tucupaichi” nishpa, Taita Diosllata ninanda rimajujshna cangunaman villanajunchi.

21Cristoca, ima juchata na rurashca cajpipash, ñucanchimandami Taita Diosca, juchayujtashna ricurca. Cristohuan shujlla tucushpa ñucanchica, alitalla rurashcashna ricurichunmi Taita Diosca chashna rurarca.