Psalms 83 - Quichua Imbabura 2016

Israelta fiñajcunata Dios tucuchijuchun mañashcamandaAsaf rurashca candana Salmomi.

1Taita Dioslla,

ama upalla saquiripaichu.

Taita Dioslla,

ama na imatapash nishpa, chulunlla saquiripaichu.

2Canda fiñajcunaca, ninandami caparinajun.

Canda na ricunayachijcunaca, ninandami jatun tucunajun.

3Can agllashcacunata llaquichingapami, pacalla rimarinajun.

Cambaj maquipi causajcunata llaquichingapami, huashalla rimarinajun.

4Paicunaca cashnami ninajushca:

“Israelcunataca, tucuillata tucuchishunchi.

Israel shutita amapacha ashtahuan yarinajuchun” ninajushcami.

5Shujlla yuyaihuan tandanajushpami llaquichinajun.

Canda tucuchingapami tucuilla tandanajushca.

6Edom, Ismael, Moab gentecunapash,

Agar gentecunapashmi tandanajushca.

7Shinallata, Gebal, Amón, Amalec gentecuna.

Filisteocunapash,Tiro shuti pueblopi causajcunapashmi tandanajushca.

8Shinallata, Asiria llacta gentecunapashmi, paicunahuan tandanajushca.

Paicunami Lot runapaj miraicunataca, yanapanajushca. Selah

9Paicunataca Madián llacta gentecunatashna llaquichipayari.

Sísara runatashna rurapayari.

Cisón shuti jatun yacu quimiriapi, Jabín runata huañuchishcashnallata huañuchipayari.

10Paicunaca, Endor pueblopimi huañurca.

Paicunaca, pambapi shitashca huanushnami tucurca.

11Macanajunata yachaj runacunata mandaj Oreb shuti, Zeeb shuti runacunatashna tucuchipayari.

Tucuilla mandajcunataca, Zeba shuti, Zalmuna shuti runacunatashna tucuchipayari.

12Paicunami: “Taita Diospaj llactataca,

ñucanchipaj cachun japishunchi” ninajushca carca.

13Ñuca Taita Dioslla,

paicunataca jatun acapana apajshna tucuchipayari.

Huaira pundapi rijuj fangacunatashna cachapayari.

14Paicunataca, sachata rupachij ninashna tucuchipayari.

Quiru junda pambata nina quilpajshna tucuchipayari.

15Ninan shinlli tamiahuan catiriyashpa llaquichipayari.

Jatun acapanahuan manllachipayari.

16Paicunataca ninanda pingaichipayari.

Mandaj Dioslla,

chashna rurajpimi, Canda mascanajunga.

17Paicunaca, causaita causaicaman pingai tucushpa, manllarinajuchun.

Paicunataca ninanda llaquichishpa tucuchipayari.

18Chashna rurajpimi Candaca, Mandaj Dios cajta yachanga.

Jahua pacha Dios cajtami, tucuicuna yachanga.