1Israel gentecunalla, Mandaj Dios imatalla cangunaman rimashcata uyaichi.
2Mandaj Diosca, cashnami nin:
“Shuj llactapi causaj gentecuna imashna causajtaca, na catinachu canguichi.
Jahua pachapi imalla ricurijtapash na manllanachu canguichi.
Shuj llactacunapi causajcuna manllarinajujpipash, cangunaca na manllarinachu canguichi.
3Chai gentecuna imatalla rurashpa causashcacunapash yangallatami.
Ali quirucunatami agllashpa cuchunajurca.
Chaicunataca, llagllashpa imatapash ruranata yachajcunami, shuj dioscunata ruranajurca.
4Chai jipaca, culquihuan, curihuanmi juyailla ricurichun quilpanajun.
Ama cuyurichumbash clavohuan, martillohuanmi shinllitapacha shayachinajun.
5Maipi churajpipash, palmera quirushna shayajushpa, na rimanllu.
Na purij ushajpimi, maiman cashpapash huandushpa apanajun.
Chaicunataca, na manllanachu canguichi.
Chaicunaca, llaquichina ushaitaca na charinchu.
Alita rurangapapash, na ushaita charinchu” ninmi.
6Mandaj Dioslla, Canshnalla Jatunga pipash na tiyanllu.
Canllami jatun, ninan ushaita charij Dios cangui.
7Tucui llactacunata Jatun Mandajlla, ¿Candaca pita na manllangayari?
Candallami manllanata charinchi.
Tucui llactacunapi causanajuj alipacha yachajushca gentecunapash,
jatun mandajpurapipash, Canshnalla jatun Diosca na tiyanllu.
8Tucui paicunami, imatapash na rurai ushashpa, yuyaipica na japi ushanga.
Paicunapaj rurashcalla dioscunamanda yachajunaca, yangallatami.
9Paicunaca, Tarsis shuti pueblomandaca tacashca culquita,
Ufaz shuti llactamandaca, curitami apamunga.
Shina apamujpimi, ali yachajushca runaca, yacuyachishpa maquihuan shuj diosta rurajunga.
Chai rurashcalla dioscunamanmi, azul, yana puca, churajunacunata churachinajunga.
Tucui chaicunataca, ali yachajushca runacunami ruranajunga.
10Ashtahuangarin shujlla Mandaj Diostami charinchi.
Paica, causaita causaicaman causajujlla Jatun Mandaj Diosmi.
Pai ninanda fiñarijpica, alpapash cuyunllami.
Shuj llactacunapi causaj gentecunapash,Pai fiñarijpica tucuringallami.
11Paicunataca, cashnami nina canguichi:
“Jahua pachata, cai pachata na ruraj yanga dioscunaca,
cai pacha llactacunamanda chingachun” ninami canguichi.
12Cai pachataca Diosmi, Paipaj ninan ushaihuan churarca.
Cai pachataca, Paipaj alipacha yachashcahuanmi churarca.
Alipacha yachaihuanmi, jahua pachatapash churarca.
13Pai mandajpimi, jahua pachamanda tamiaca urmamun.
Paillatami, fuyutapash cai pacha juchucunamanda vichai apan.
Paica, punchapamba shitamushpa tamiatapash cachamun.
Paillatami huairatapash, huaira tiyaj pushtucunamanda llujchimun.
14Tucui gentecunami, yuyai illashpa, yachajuitaca na ushashpa causan.
Rurashcalla diosta, paipaj maquihuan rurajcunapash, pingai tucunmi.
Chai rurashcalla dioscunaca, samaipash illaj cashpa, yangallatami shayanajun.
15Chai rurashcalla dioscunaca, yanga cashpami, imatapash na rurai ushan.
Dios llaquichina punllacuna chayamujpica tucuringallami.
16Ashtahuangarin, Jacobpaj Diosca, tucui ushaitami charin.
Jatun Diosllami, ima tiyachumbash tucuita rurashca.
Israelcunaca, Paipajlla cachun agllashcacunami.
Paipaj shutica, tucuita Mandaj Diosmi.
Judá llactaca, tucurina cashcamanda17Muyundita pircashca pueblopi causajcuna,
canguna imatalla charishcacunata tandachi callarinami canguichi.
18Mandaj Diosmi, cashna nin:
“Cangunataca, huaracahuan caruta shitajshnami, calpachigrini” ninmi.
19¡Aij ñucalla, ninan llaquihuanmi cani.
Ñuca chugrishcataca, ninandapachami nanajun.
Ashtahuangarin ñucataca: “Cai nanaica japinallatami cashcanga.
Chaimandami, cai nanaitaca apanallata cani” yajurcanimi.
20Ñuca causana huasipash, tucuilla urmashcami sirijun.
Ñuca huasita shinllita charijujpash, tucuillami urmashca.
Ñuca huahuacunapashmi jichuhuarca.
Paicunaca ñami huañushpa tucurirca.
Ñuca huasita cutin shayachingapaca, pipash na tiyanllu.
Huasipi cortinacunata huarcungapapash, pipash na tiyanllu.
21Israel gentecunata michijcunapash, juizu illaj tucushpami, Mandaj Diostaca na mascanajurca.
Chaimandami, ima alita ruraitapash na usharca.
Israel gentecunapash, caita chaitami rinajurca.
22Judá llactapi tiyaj tucui pueblocunata tucuchingapami,
janaj llactamandaca manllanayaita, ninanda caparishpa shamunajun.
Chai pueblocunataca, tucuillata tucuchishpa,
chacal animalcuna causachunllami saquinajunga, nircanimi.
23Mandaj Dioslla, runapaj causaica na paipajchu.
Paipaj jipa causai imashna canataca, pipash na mandai ushanllu. Chaitaca yachapanimi.
24Shina cashcamandaca, Mandaj Dioslla, llaquichihuailla.
Ashtahuangarin ama tucuilla tucuchingapa,
ninandapacha fiñarishpa llaquichihuaichu.
25Canda na rijsij gentecunataca llaquichipailla.
Cambaj shutipi na mañaj llactacunatapash llaquichipailla.
Paicunami, Jacobpaj miraicunataca huañuchishpa tucuchinajurca.
Paicuna causana llactatapash, tucuillami tucuchinajurca.
Who We AreWhat We EelieveWhat We Do
2025 by iamachristian.org,Inc All rights reserved.
