1Davidca, Nob shuti pueblopi causajuj sacerdote Ahimelecpajmanmi shamurca. Davidta Ahimelec sacerdote, ricushpaca ninandami manllarirca. Chaimandami: “¿Imashpata pitapash na pushashpa, canlla shamungui?” nirca.
2Shina nijpimi Davidca, sacerdote Ahimelectaca cashna nirca: “Jatun mandajmi, shuj mingaihuan cachamushpa, cashna nirca: ‘Canda mandashpa cachashcataca, pipash na yachanachu’ nihuarcami. Shinallata, ñucahuan purij runacunamambash, maipi tuparinataca ñami villarcani.
3Cunanga, ¿ima micunagutata charingui? Picha tandaguta cashpapash, ima micunaguta cashpapash carahuailla” nircami.
4Shina nijpimi sacerdoteca, Davidtaca cashna nirca: “Japishpa micunalla tandataca, na charinichu. Diosman shicanyachishca tandatallami charini. Shina cajpipash cambajta rurajcuna, huarmicunahuan na pacta puñushca cajpica, cushallami” nirca.
5Shina nijpimi Davidca, sacerdotetaca cashna nirca: “Na llullashpami nipani: Cainapash, cainapaj cainapash, huarmimandaca carupimi carcanchi. Ñuca caiman shamushca na ali ricurijujpipash, ñuca llujshimujui punllapica, huambracunaca ñami Diospajlla tucushca carca. Cunangarin, ¿imashpata na Diospajlla cangayari?” nircami.
6Shina nijpimi sacerdotepash, Diosman shicanyachishca tandataca, Davidman curca. Chaipica, ashtahuan shuj tandaca na tiyarcachu. Cunujlla shuj tandata churangapami, Mandaj Diospaj ñaupajmanda chai tandataca chai punllapillata anchuchishca charijurca.
7Chai punllapica, Saulpajta rurajpuramanda shuj runami, Mandaj Diospaj ñaupajpi saquirishca carca. Paica, Saulpaj llamacunata michij runacunata mandaj, Edom llactamanda Doeg shutimi carca.
8Davidca, sacerdote Ahimelectaca cashnami nirca: “¿Nachu caipica tucsina jirruta, na cashpaca espadatallapash charingui? Jatun mandaj ucha ri nijpimi, espadatapash, shuj macanajunacunatapash, na apashpa shamurcani” nircami.
9Shina nijpimi chai sacerdotepash, cashna nirca: “Ela shuti pugru pambapi, Goliat shuti filisteota can mishashpa quichushca espadallami, shuj telahuan pillushca efod huashapi tiyajun. Chaita japingapa munashpaca, japilla. Ashtahuan shuj espadaca na tiyanllu” nijpimi Davidca: “Chaita yali ashtahuan ali espadaca na tiyanllu, cuhuailla” nirca.
10Chai punllallata jatarishpami Davidca, Saulmanda pacajushpa rishpaca, Gat pueblota mandaj Aquis shuti jatun mandajpajman rirca.
11Chaipimi Aquis runapajta rurajcunaca, cashna ninajurca: “¿Nachu paica, Israel llactata jatun mandaj David cangayari? ¿Nachu paitaca:
‘Saulca, huaranga runacunatami huañuchishca.
Davidca, chunga huaranga runacunatami huañuchishca’ nishpa, taquishpa tushunajurcayari?” ninajurcami.
12Davidca, shina parlanajujta uyashpami, Gat pueblota jatun mandaj Aquis runataca, ninanda manllarca.
13Chaimandami Davidca, paicunapaj ñaupajpi maitapash rurashpa, juizu illajshna tucushpa, pungucunapi quilcashpa, t'ucapash paipaj barbasta urai shutujta purijurca.
14Chaimandami Aquis runaca, paipajta rurajcunataca cashna nirca: “Cai runataca, juizu illaj cajta ricushpatachu ¿ñucapajman pushamurcanguichi?
15¿Caipica juizu illajcuna illajpichu, cai runataca caiman pushamurcanguichi? ¿Cai runachu, ñuca huasimanga yaicugringa” nircami.
Who We AreWhat We EelieveWhat We Do
2025 by iamachristian.org,Inc All rights reserved.
