1Mandaj Diosca, Job runataca, cashnatapashmi nirca:
2“¿Canga, ali yachajushca caimandachu,
tucuita rurai ushaj Dios Ñucahuan chimbapurangapa munangui?
Taita Dios Ñucahuan, maijambash chimbapurangapa munashpaca, chaicunatara tigrachihuachun” nircami.
3Mandaj Dios shina nijpimi, Job runaca cashna nirca:
4“Ñucaca imatapash na rurai ushaj runami cani.
¿Imatata tigrachi ushapashayari?
Ñucaca upalla saquiripashallami.
5Ñucaca ñami rimarcani, cunanga na imata nipashachu.
Cutimbashmi rimarcani, na ashtahuan tigrashpa rimapashachu” nircami.
Taita Diosca, Paipaj ninan ushaita ricuchishcamanda6Mandaj Diosca, jatun acapana chaupimandami Job runataca, cutin cashna nirca:
7“Cunanga, cinturasta huatarishpa shinlli shayari.
Ñuca tapushcatami, canga tigrachina cangui.
8¿Canllu, Ñuca llaquichinataca, yangapi churagringui?
¿Can alipi llujshingapachu, Ñucata juchachingapa munangui?
9¿Canga, Taita Dios Ñucashnachu shinllipacha cangui?
Can rimashcapash, ¿Ñuca shinllita rimashcashnachu uyarin?
10Cunanga, jatun cashcahuan, alicachi tucushcahuan churajunshna alichiriyari.
Alicachi tucushcatapash, juyailla canatapash churajunshna alichiriyari.
11Ninanda fiñarishca cashcataca ricuchiyari.
Jariyashcacunata ricushpa, tucuillata tucuchiyari.
12Jariyashpa jatun tucuncunata, tucuillata pingaichiyari.
Diosta na manllajcunatapash, chaipillata llaquichiyari.
13Paicunataca, tucuillata ñutu alpapi pambayari.
Ñavi ama ricuchumbash, yana yana ucupi vichayari.
14Shina rurajpica Ñucapash, canllata quishpiringapa ushaita charishcatami villasha.
15Cunanga, ricui Behemot shuti animaltaca, candashnallatami rurarcani.
Chai animalca, huagrashnami jihuata micun.
16Paipaj ninan ushaica, huasha lomopimi tiyajun.
Ninan shinlli canataca, vijsa aichapimi charin.
17Paipaj chupatapash, cedro caspitashnami cuyuchin.
Changapi tiyaj angucunapash, caiman chaiman ahuashcashnami.
18Paipaj tullucunaca, bronceshna shinllipachami.
Paipaj changacunapash, jirru barracunashnami.
19Taita Dios Ñucaca, paitami tucui animalcunamanda punda rurarcani.
Paita ruraj Ñucaca, chai animaltaca huañuchun saquishallami.
20Pai micuchunga, urcucunapimi jihuacunaca viñajun.
Tucui urcu animalcunami, chaicunapi calpariyanajun.
21Paica, llandulla ucucunapimi siririn.
Yacu llujshijuj pambacunapi, sucus viñashca ucucunapimi pacajun.
22Paitaca, jatun quirucunami llandun.
Yacu manñapi tiyaj sauce quirucunami muyundi jarcan.
23Paica jatun yacu manllanayaita mirajpipash, na manllanllu.
Jordán yacu jatarishpa, paipaj shimipi huajtajpipash, na manllashpa shayajunllami.
24¿Paitaca, pipash japi ushangachu?
¿Paipaj singatapash, pipash utujui ushangachu?
Who We AreWhat We EelieveWhat We Do
2025 by iamachristian.org,Inc All rights reserved.