JEREMÍAS 13 - Quichua Imbabura 2016

Ismushca chumbishnami canguichi nishcamanda

1Mandaj Diosca, cashnami nihuarca: “Lino chumbita randishpami, chumbilina cangui. Chai chumbitaca, ama yacupi churanguichu” nihuarcami.

2Chaimandami, Mandaj Dios mandashcata pactachishpa, chai chumbita randishpa, chumbilircani.

3Mandaj Diosca, cutinmi cashna nihuarca:

4“Cunanga, Éufrates jatun yacumanmi rina cangui. Chaipimi, cambaj chumbilishcata pascashpa, rumi jaca ucupi pacana cangui” nihuarcami.

5Shina nijpimi, Mandaj Dios mandashcata pactachingapa, Éufrates yacu manñaman rishpa pacarcani.

6Ña tauca punllacuna jipami, Mandaj Diosca: “Cunanga, Éufrates yacu manñapi, pacashca chumbita apamungapa rilla” nihuarca.

7Shina nijpimi, Éufrates yacu manñaman rishpa, ñuca pacashca chumbitaca allashpa llujchircani. Ashtahuangarin, chai chumbica tucuillapacha ismushca, imapapash na alimi cashcarca.

8Chai jipami, Mandaj Diosca, cashna nihuarca:

9“Mandaj Dios Ñucami, cashna nini: Judá llactapi, Jerusalén pueblopi causaj gentecuna ninanda jariyashcamandami, cai chumbi ismushcatashna saquigrini.

10Cai na ali gentecunaca, Ñuca yachachishca shimicunataca, na uyangapa munanllu. Paicunapaj munashcata rurashpami, rurashcalla dioscunata catishpa, paicunapaj ñaupajpi cungurishpa causanajun. Chaimandami, cai ismushca chumbishna imapapash na ali tucunajushca.

11Judá llactapi, Jerusalén pueblopi causajcunaca, Ñuca huatarishca chumbishnami carca. Ñucapajlla causanajushpa, Ñuca Shutita ninanda Jatunyachishpa, tucuicunapaj ñaupajpi, Ñucata rijsichinajuchunmi chashna cayarcani. Chashna cashpapash, na cazurcachu” ninmi Mandaj Diosca.

Vinota alichina fundushna cashcamanda

12Cashnatapash villangui: Israelcunata Mandaj Diosca, cashnatapashmi nijun: “Tucuilla fundupimi, vinoca junda canga” ninmi ningui. Shina nijpimi paicunaca: “Tucuilla fundupi vino jundanataca, ¿nachu ñucanchillata yachanchi?” ninajunga.

13Shina ninajujpica, cashna ningui: “Mandaj Diosca, cashnatapashmi nihuarca: ‘Cai llactapi causajcunataca, tucuillatami ninanda llaquichigrini. David tiyarinapi tiyarishpa mandajcunatapash, paimanda mirai mandajcunatapash, sacerdotecunatapash, profetacunatapash, Jerusalenbi causajcunatapash tucuillatami ninanda llaquichigrini.

14Paicunapurallata macanajushpa tucurichunmi saquigrini. Taitacunapash, churicunapash chashnallatami tucuringa. Chashna cashcamanda, paicunataca, napacha llaquishpami, na cungashpa llaquichisha’ ninmi Mandaj Diosca, nishpa villangui” nihuarcami.

Judá llactapi causajcuna, prezu apai tucuna cashcamanda

15Na yangapi churashpami, Mandaj Dios rimajujtaca, aliguta uyana canguichi.

16Cangunapaj Mandaj Diostaca, ninandami alicachina canguichi.

Ninan llaquicuna, yana tutashna nara chayamujpillatami, alicachina canguichi.

Shinallata, micha tucurijpi, yana tutapi nitijajshna nara pandashpallatami, alicachina canguichi.

Shina rurajpimi, yana tutapishna huañuna llaquicunaca na japimunga.

17Canguna jariyashpa, cai villashcacunata na uyangapa munajpica, ninanda llaquirishpami huacasha.

Llaquirishpa huacajujpimi, ñuca ñavimanda viquica ninanda jicharinga.

Mandaj Diospaj juyashca llamacunata prezu apajpimi, ninanda huacashpa viquita jichasha.

18“Jatun mandajtapash, jatun mandajpaj mamatapash cashna nigri: ‘Cunanga ninanda llaquirishpami alpapi tiyarina canguichi.

Cangunaman, mandana ushaita cuj coronapash ñamari urmashca’.

19Neguev llactapi pueblocunataca pipash ama yaicuchunmi pungucunata vichashca carca.

Judá llactapi causajcunapash, tucuillami prezu apai tucurca.

20Janaj llajtapi causajcuna shamunajujta, vichai ricuyari.

Ashtaca llamacunata can ricuchun saquishcataca ¿maimanda cacharcangui?

21Canllata yachachishca, canhuan pacta purinajushca gentecunallata canda mandanajujpica, ¿imatashi ninguiman?

¿Nachu, huahuata ungugrijuj huarmita, nanai japijpishna llaquiringuiman?

22Canga: ‘¿Imashpata cai llaquicunaca japihuashca?’ ninguimi.

Cambaj ashtaca juchacunamandami, candaca na alitapacha rurashpa ninandapacha llaquichirca.

23¿Etiopía llactamanda yana runaca, yurajyangallachu?

¿Leopardo animalpash, muru cashcamanda shujman tigrai ushangachu?

Chashnallatami cangunapash, na alita rurashpa yacharishca cashcamandaca, napacha saqui ushanguichi.

24Shinamandami paicunataca, jichushca pambamanda huairapi shamuj jupatashna,

caiman chaiman cachagrini” ninmi.

25Mandaj Diosca, cashnatapashmi nijun:

“Ñucami, canda imashna llaquichinatapash, alichishcalla charijuni.

Llullashpa yachachijcunatara catishpa, causashcamandami chashna llaquichigrini.

26Ñucami cambaj churajushcata quichushpa ninanda pingaichisha.

Chashna rurajpimi, ninanda pingai tucushpa causangui.

27Lomacunapi, jatun na alicunata rurashpa, ninanda caparijushcata ricushcanimi.

Pambacunapipash, jatun na alicunata rurajujtami ricurcani.

¡Aij, Jerusalenlla! ¿Ima punllacamanda chashna na alita rurashpa causagringui?

¿Ima punllashi, na alita ruranata saquijta ricusha?” ninmi.