1Alitalla rurashpa causajcunaca, ninandami cushijunga.
Mandaj Dios mandashcata pactachijcunami, ninanda cushijunga.
2Imashna causanata yachachishcata pactachijcunaca, ninandami cushijunga.
Tucui shunguhuan Paita mascajcunaca, ninandami cushijunga.
3Paicunaca, alitalla rurashpami causan.
Diosta cazushpa causajcunami, chashna causan.
4Can mandashcacunataca,
tucuita aliguta pactachinajuchunmi mandarcangui.
5¡Aliguta cazushpa causangapami munani.
Can mandashca shimicunata pactachishpa causangapami munani!
6Shina causashpaca na pingai tucushachu.
Can mandashca tucuita pactachishpami, na pingai tucusha.
7Tucui shunguhuanmi, Candaca alicachisha.
Can rimashpa mandashcacunata yachajushpami, chashna alicachisha.
8pactachinajuchun Can cushca shimicunataca pactachishnami.
Ñucataca, amapacha saquihuaichu.
Bet.
9Chairalla viñai huambraguca, paipaj causaipica,
¿imashnashi mapa illaj causanga?
Cambaj Shimita cazushpallami, mapa illaj causanga.
10Tucui shunguhuanmi, Candaca mascarcani.
Can mandashca shimicunamanda anchurichunga, amapacha saquihuaichu.
11Can rimashca shimicunataca, ñuca shungupimi charijuni.
Ama juchata rurangapa, Canda ama fiñachingapami, chashna charijuni.
12Mandaj Dioslla,
Canga ninanda alicachi tucushcami capangui.
pactachinajuchun Can cushca shimicunataca yachachihuayari.
13Ñuca shimihuanmi villajuni.
Can mandashca shimicunatami villajuni.
14Imashna causanata Can yachachishcata pactachishpami, ninanda cushijuni.
Imata charishcacunatapash yalitami cushijuni.
15Can mandashca shimicunatami yarishpa causajuni.
Can mandashcatalla cazushpami causajusha.
16pactachinajuchun Can cushca shimicunahuanmi ninanda cushijusha.
Can rimashca shimicunataca na cungashachu.
Guímel.
17Cambajta ruraj ñucamanga, causaita carahuailla.
Can mandashca shimita pactachingapa, causaita carahuailla.
18Ñuca ñavihuan ricungapa, ñavita pascapailla.
Can mandashca juyailla Shimita ricungapa, chashna rurapailla.
19Cai alpapica, caru llactamanda shamushca runashnami cani.
Can mandashcacunataca, ñuca ñaupajmanda ama anchuchipaichu.
20Ñucaca, tucui shunguhuanmi shuyajuni.
Punllandi Can mandashca shimicunata yachajungapami, chashna shuyajuni.
21Na cazuj, na ali gentecunataca llaquichijunguimi.
Can mandashcacunata na cazushcamandami, chashna llaquichijungui.
22Na alicachishpa yangapi churajcunamandapash huacaichihuailla.
Can mandashca shimicunata pactachijushcamanda, chashna rurahuai.
23Mandajcunapash tandanajushpami, ñucata fiñashpa rimarca.
Ashtahuangarin, Cambajta ruraj ñucaca,
Can mandashcatami pactachijuni.
24Can mandashca shimicunaca, juyaillagupachami.
Chai shimicunami, ali yuyaita carahuan.
Dálet.
25Ñucaca, huañungashnami llaquirijupani.
Can rimashca shimicunahuan shinllichihuai.
26Ñuca imashna causajushcata Canman villajpimi, uyahuashcangui.
pactachinajuchun Can cushca shimicunataca yachachihuailla.
27Can mandashca shimicunata yachajungapa ushaita carahuailla.
Can juyailla rurashcacunata ali yachajungapa ushaita carahuailla.
28Ñucaca, ninan llaquihuanmi causajupani.
Can rimashca shimicunahuan shinllichihuailla.
29Llullashpa causanamandaca anchuchihuangui.
Cambaj ninan juyaihuan, Can mandashcacunata yachachihuailla.
30Canda catishpa causangapami munapani.
Can mandashcacunatami, pactachingapa munapani.
31Can mandashca shimicunata pactachingapami shamupani.
Mandaj Dioslla,
ama pingaichihuanguichu.
32Can mandashcacunata catingapami munapani.
Mandashca shimicunata yachajuchunmi, yuyaita pascashcangui.
He.
33Mandaj Dioslla,
pactachinajuchun Can cushca shimicunata cazushpa causanata yachachihuayari.
Chaitaca, ñuca tucui causaipimi pactachisha.
34Can mandashca shimicunata pactachingapa, ali yuyaita cuhuailla.
Chaitaca, tucui shunguhuanmi pactachijusha.
35Can mandashca shimicunata pactachishpa causangapa, ushaita cuhuailla.
Chaicunahuanmi cushijushpa causajuni.
36Can mandashca shimicunata tucui shunguhuan cazungapa yachachihuailla.
Charijyanatalla munashpa causachunga, ama saquihuaichu.
37Rurashcalla dioscunata catinamandaca jarcahuanguilla.
Cambaj ñambi ali catingapa shinllichihuayari.
38Can pactachisha nishcataca, ñucapi pactachipailla.
Candallami manllashpa causajuni.
39Na alicachishpa rimai tucunata manllashpa causachunga, ama saquihuaichu.
Can mandashca shimicunaca, alipachami capan.
40Ñucaca, Can mandashca shimicunata yachajungapami munarcani.
Alitalla ruraj Dioslla,
causaita carahuailla.
Vau.
41Mandaj Dioslla,
Cambaj ninan juyaihuan llaquihuailla.
Can pactachisha nishcashna quishpichihuailla.
42Shina rurajpimi, ñucata pingaichingapa munajcunataca mishai ushasha.
Cambaj mandashca shimicunatallami, pactachijusha.
43Cambaj na llullaj Shimitaca, ñucamandaca, amapacha anchuchipaichu.
Ñucaca, Can mandashcacunata catingapami shuyajuni.
44Can mandashca shimicunatami pactachishpa causapasha.
Causaita causaicamanmi pactachishpa causapasha.
45Chashna cashpami ali causaita charisha.
Can mandashcata pactachishpami, chashna causasha.
46Jatun mandajcunapaj ñaupajpimi, Can mandashcacunataca villajusha.
Chaitaca, na pingai tucushpami villajusha.
47Can mandashcacunata cazushpami cushijusha.
Chai mandashcacunatami ñucaca juyani.
48Can mandashca shimicunata juyaimandami,
maquita vichai churashpa mañasha.
pactachinajuchun Can cushca shimicunatami, aligutapacha yarijusha.
Zain.
49Cambajta ruraj ñucaman pactachisha nishcataca yaripangui.
Chaitami shuyashpa causajuni.
50Llaquicunapi cashpaca, chaita yarishpami cushijuni.
Can rimashca shimicunami, shinllichihuan.
51Jariyashpa causajcunaca, asishpami ricunajuhuan.
Ashtahuangarin, Can mandashca shimicunataca napacha saquinichu.
52Mandaj Dioslla,
punda huatacuna Can rurashcata ricushpami yarijuni.
Chaicunata yarishpami cushijurcani.
53Na ali gentecunata ricushpami, ninanda manllarircani.
Paicunaca, Can mandashcataca na cazurcachu.
54Can mandashca shimicunahuanmi cushijushpa candajuni.
Caru llactapi causajushpami, chashna candajurcani.
55Mandaj Dioslla,
Cambaj shutitaca, tutacunami yarijurcani.
Can mandashca shimicunata pactachingapami munapani.
56Can mandashcacunata pactachishcamandami,
chashna bendiciai tucurcani.
Chet.
57Mandaj Diosmi, tucui imatapash carahuan.
Can mandashca shimicunataca, pactachishnami niparcanimi.
58Tucui shunguhuanmi Candaca mañajurcani.
Cambaj Shimipi nijushcashnallata llaquihuayari.
59Ñuca imashna causajushcatami yarijurcani.
Can mandashca shimicunatami cutin yarijupani.
60Can mandashcacunataca,
imatapash na shuyashpami pactachijurcani.
61Na ali gentecunapaj chaupipimi causajuni.
Ashtahuangarin can mandashcataca, na cungarcanichu.
62Canda alicachingapaca, chaupi tutacunami jatarini.
Alitalla Can rurashcamandami, chashna alicachijuni,
63Canda manllashpa causajcunahuanmi tandanajuni.
Paicunaca, Can mandashcacunatami pactachinajun.
64Mandaj Dioslla,
cai pachaca Cambaj juyaihuan jundami.
Can mandashca shimicunataca yachachihuailla.
Tet.
65Cambajta ruraj ñucamanga, alitallami rurashcangui.
Mandaj Dioslla,
Can nishcashnallatami pactachishcangui.
66Aliguta yachajushpa, alita ruranata yachachihuai.
Can mandashca shimicunataca, crishpami causajurcani.
67Llaquicunata nara apajushpaca, chingashcashnami purijurcani.
Cunanga, Cambaj mandashca shimitami pactachijuni.
68Canga ñucahuan ali cashpami, alitalla rurapashcangui.
Can mandashca shimicunataca yachachihuailla.
69Jariyashpa causajcunami, ñucataca llullashpa juchachihuashca.
Ashtahuangarin ñucaca, tucui shunguhuanmi Can mandashcacunataca pactachijusha.
70Paicunapaj shunguca, vira quilpashcashnami tucushca.
Ashtahuangarin ñucaca, Can mandashca shimicunahuanmi cushijushcani.
71Alipajmi ñucataca llaquichihuashcangui.
Can mandashca shimicunata yachajuchunmi, chashna rurahuashcangui.
72Can mandashca shimicunaca, ñucapaca alipachami.
Huaranga huaranga curitapash, culquitapash yali alipachami.
Yod.
73Cambaj maquihuan rurashpami churahuarcangui.
Can mandashcacunata yachachijpimi, aliguta yachajusha.
74Canda manllashpa causajcuna ñucata ricushpaca cushijungami.
Cambaj mandashca shimicunatami crishpa shuyajurcani.
75Mandaj Dioslla,
Can mandashca shimicunaca, alitalla pactachingapami tiyajun.
Canga tucuita pactachij cashpami llaquichihuarcangui.
76Cambaj ninan juyaihuan cushichihuayari.
Cambajta ruraj ñucaman nijushcashnallata, cushichihuayari.
77Cambaj ninan juyaimanda, causaita carahuayari.
Cambaj mandashca shimicunahuanmi ninanda cushijuni.
78Jariyashpa causajcunaca, yangata juchachishcamanda, pingai tucushca cachun.
Ashtahuangarin ñucaca, Can mandashcacunatami pactachijusha.
79Canda manllajcunaca, ñucahuan tandanajumuchun.
Can yachachishcata rijsijcunapash, ñucahuan tandanajumuchun.
80Can mandashca shimicunata, tucui shunguhuan yarijungapa yachachihuai.
Ama pingai tucushpa causajungapa, chashna yachachihuai.
Caf.
81Can quishpichinata shuyashpami, huañungashna tucurcani.
Shina cashpapash, cambaj shimita crishpami shuyajuni.
82Cambaj shimipi nijujta shuyajushpami, na ricui ushajurcani.
Ñucaca: “¿Ima punllata cushichihuangayari?” yajurcanimi.
83Cushnipi huarcushca cara muchilashnami cani.
Shina cashpapash Can mandashca shimicunataca, na cungashcanichu.
84Cambajta ruraj ñucataca,
¿mashna huatacunatata causachun saquigrihuangui?
Ñucata catiriyashpa llaquichijcunataca,
¿ima punllata llaquichigripangui?
85Jariyashpa causajcunaca, ñuca urmachunmi utujuta allanajushca.
Paicunaca, Can mandashcataca na pactachinajunllu.
86Can mandashca shimicunaca, na llullaj shimicunami.
Ñucata yangamanda catiriyashpa llaquichinajushcamanda, yanapahuailla.
87Ñucataca, ashamandami na urmachihuarca.
Shina cajpipash, Can mandashcacunataca na saquishcanichu.
88Cambaj ninan juyaimanda, causaita carahuayari.
Imashna causanata Cambaj shimihuan yachachishcataca pactachishami.
Lámed.
89Mandaj Dioslla,
cambaj shimica causaita causaicamanmi tiyajunga.
Jahua pachapimi chashna tiyajunga.
90Mirai miraicunacamanmi, Canga tucuita pactachijungui.
Cai pachatapash, Can churajpimi alipacha tiyajun.
91Can chashna churashcamandami, tucui imapash cunangaman tiyanajun.
Tucui chaicunaca, Canda cazushpami tiyanajun.
92Can mandashca shimita na cazushpa causajushpaca,
llaquicunahuanmi ña huañuiman carcani.
93Can mandashcacunataca, napacha cungashachu.
Chaicunahuanmi causaita cutin carahuarcangui.
94Ñucataca, Can agllashca cashcamanda, quishpichihuayari.
Can mandashcacunatami mascajurcani.
95Canda na manllajcunaca, ñucata tucuchingapami chapariyanajun.
Ashtahuangarin ñucaca, imashna causanata Can yachachishcatami yarijusha.
96Tucui ima tiyashcapash, tucurijlla cajtami ricujuni.
Can mandashca shimica, ima punllapash na tucuringachu.
Mem.
97¡Can mandashca shimicunataca, ninandami juyani!
Tucui punllami, chaitaca aligutapacha yariajuni.
98Can mandashcacunata yachachishpami, ñucata fiñajcunata yali yachajta rurahuashcangui.
Chai mandashcacunaca, tucui causaipimi ñucahuan.
99Ñucata yachachijcunatapash yalimi yachajushcani.
Can mandashca shimicunata yachajushpa causashpami, chashna yachani.
100Rucu taitacunatapash yalimi yachani.
Can mandashca shimicunata cazushpa causashpami, chashna yachani.
101Tucui na alimanda anchurishcami causajuni.
Cambaj Shimipi nijujta pactachingapami, chashna causajuni.
102Can yachachishca shimicunataca napacha saquishachu.
Chaicunataca, Canmi yachachihuarcangui.
103¡Can rimashca shimicunaca, ñucapaca uyanayaimari!
Balun mishquitapash yalipachami.
104Can mandashca shimicunata ricushpami, ali yuyaitaca japircani.
Chaimandami llullashpa causanataca, napacha munani.
Nun.
105Cambaj Shimica, ñuca chaqui sarunata punchayachijuj lamparashnami,
ñuca purina ñanda punchayachijuj michashnami.
106Ñuca juramentushcataca pactachishami.
Can mandashca shimicunataca cazushpa pactachishami.
107Mandaj Dioslla,
ninan llaquihuanmi cani.
Cambaj Shimipi nishcashna, causaita carahuailla.
108Mandaj Dioslla,
ñuca imata cusha nishpa juramentushcataca cushijushpa chasquipangui.
Can mandashcacunata pactachingapa yachachihuayari.
109Ñuca causaipica, ima punlla cashpapash llaqui japinallami cani.
Ashtahuangarin Can mandashca shimicunataca, na cungarcanichu.
110Na ali gentecunaca ñucata urmachingapami alipacha yarinajun.
Shina cajpipash ñucaca, Can mandashca shimicunataca na saquishcanichu.
111Can yachachishca shimicunataca, tucui causaipimi chasquishcani.
Chai shimicunami, ñuca shungutaca ninanda cushichin.
112Tucui shunguhuanmi, Can mandashca shimicunataca pactachingapa munani.
Ñuca huañuna punllacamanmi, chashna pactachingapa munani.
Sámec.
113Mishqui shimi, jayaj shungucunataca napacha ricunayanllu.
Ashtahuangarin Can mandashca shimitami juyani.
114Ñucata pacaj, ñuca jarcarina escudoshnami cangui.
Cambaj Shimipi nijujtami yariashpa causajuni.
115Na alita ruraj runacuna, ñucamanda anchurichi.
Ñuca Taita Dios mandashcacunatami pactachisha.
116Cambaj Shimipi nijushcata pactachishpami causaita charisha.
Ñuca shuyajushcamanda ama pingai tucungapami, chashna causasha.
117Cambaj maquihuan charijpimi, quishpirisha.
pactachinajuchun Can cushca shimicunahuanmi, tucui causaipi cushijusha.
118Can mandashcata na cazujcunataca, napacha chasquinguichu.
Paicuna na alita yarinajushcacunaca yangallatami.
119Canda na manllajcunataca, mapatashnami cai llactamandaca llujchishpa shitarcangui.
Chaimandami, Can yachachishca shimicunataca juyashpa causajuni.
120Ninandapacha Canda manllashpami, chujchujuni.
Can mandashcacunataca manllanipachami.
Ayin.
121Alita rurashpami, tucuita pactachishpa causashcani.
Na alicunapaj maquipica, ama saquihuanguichu.
122Cambajta ruraj ñucataca, Canllata aliguta ricushpa pushahuayari.
Na ali gentecuna ñucata llaquichishpa charichunga, ama saquihuanguichu.
123Can quishpichinata shuyajushpallatami, ñuca ñavipash amsayarca.
Cambaj Shimipi nijushca pactachun shuyajushpami, chashna tucushcani.
124Cambajta ruraj ñucataca, Cambaj ninan juyaihuan charihuayari.
Can mandashca shimicunataca yachachihuayari.
125Cambajta ruraj ñucamanga, ali yachajushca canata cuhuayari.
Can mandashca shimicunata ali yachajushca cangapa, chashna cuhuayari.
126Mandaj Dioslla,
Canda na cazujcunataca llaquichipailla.
Can mandashcataca yangapimi churanajun.
127Shinamandami, Can mandashca shimicunataca ninanda juyani.
Ashtahuan ali curitapash yalitami juyani.
128Shinamandami, Can mandashca shimicunataca, tucuita yalipacha juyani.
Na ali causaitaca, napacha munanichu.
Pe.
129Can yachachishca shimicunaca, juyaillagupachami.
Chaimandami, ñuca tucui shunguhuan pactachijuni.
130Can mandashca Shimicunata yachachishpaca, ñuca shungutami pascahuangui.
Imatapash na yachajcunamambashmi, chashna yachachijungui.
131Tucui shunguhuambachami yachajungapa munarcani.
Can mandashca shimicunatami, chashna yachajungapa munarcani.
132Taita Dioslla,
ninandapacha juyahuayari.
Canda cazujcunata juyajshnallata, ñucatapash juyahuayari.
133Cambaj mandashca shimicunahuan, ñuca causaitaca pushahuayari.
Ñuca causaipica, amapacha juchapi urmashca cashcaiman.
134Ninandapacha llaquichij runacunamandaca huacaichihuayari.
Can mandashca shimicunata pactachishpa causangapami munani.
135Cambajta ruraj ñucataca, Cambaj punchapamba ushaihuan pushahuayari.
Cambaj mandashca shimicunataca yachachihuayari.
136Ninandapachami huacarcani.
Cambaj mandashca shimicunata na pactachijpimi, chashna huacarcani.
Tsade.
137Mandaj Dioslla,
Canga imatapash alitalla ruraj Diosmi cangui.
Can mandashca shimicunapash alipachami.
138Can mandashca shimicunaca, tucuipacha pactana cajtami villajun.
139Ñucaca, ninandapachami fiñarircani.
Ñucata fiñajcuna, Can mandashcacunata cungajpimi, chashna tucushcani.
140Can mandashca Shimicunaca, mapa illajpachami capan.
Cambajta ruraj ñucaca, chai shimicunataca juyanipachami.
141Ñucaca, jichui tucushca yangalla runami cani.
Shina cashpapash, Can mandashca shimicunataca, na cungashcanichu.
142Can mandashca shimicunaca, alitalla rurashpa, causaita causaicaman pactachinami capan.
Can mandashca shimicunaca, napacha llullachu.
143Ñucataca ninan llaquipash, manllaipashmi japihuarca.
Ashtahuangarin can mandashcacunami, ninanda cushichihuarca.
144Can mandashca shimicunaca, causaita causaicaman pactangapami tiyajun.
Shina causachun ali yuyaita carajpimi, causaita charisha.
Cof.
145Mandaj Dioslla,
tucui shunguhuan ñuca mañajujtaca uyahuayari.
Can mandashca shimicunataca pactachipashami.
146Candami caparishpa mañarcani, quishpichihuayari.
Can mandashca shimicunataca pactachipashami.
147Nara pacarijpillata jatarishpami, ninanda mañajurcani.
Can imata nijtami shuyajurcani.
148Tucui tuta na puñushpami shuyajurcani.
Can mandashca shimicunata yachangapami, chashna shuyajurcani.
149Ñuca mañajujtaca, Cambaj ninan juyaihuan uyahuayari.
Mandaj Dioslla,
Can tucuita pactachij cashcamanda, ñucataca shinllichihuayari.
150Ñucata catiriyashpa llaquichijcunaca, ñamari chayamunajun.
Can mandashca shimicunataca saquishpami anchurinajun.
151Mandaj Dioslla,
Canga ñucahuan pajtami capangui.
Can mandashcacunaca, napacha llullachu capan.
152Can mandashca shimicunataca, ña unaitami yachapani.
Chaitaca, causaita causaicamanmi churashcangui.
Resh.
153Ñuca llaquihuan causajujta ricushpa, cacharichihuayari.
Can mandashca shimicunataca, na cungapashcanichu.
154Ñucamanda shayarishpa, quishpichihuayari.
Cambaj rimashca shimicunahuan, shinllichihuayari.
155Na ali gentecunaca, napacha quishpiri ushangachu.
Paicunaca, Can mandashca shimicunata napacha cazunajunllu.
156Mandaj Dioslla,
Canga ninandapacha juyajmi cangui.
Alitalla ruraj cashcamanda, ñucataca shinllichishpa charihuayari.
157Ñucata fiñashpa, catiriyashpa llaquichijcunaca, ninandami mirashca.
Ashtahuangarin, Can mandashca shimicunataca, napacha cungashcanichu.
158Yachashpata na cazujcunata ricushpaca, ninandami fiñarircani.
Can mandashca shimicunata na cazunajujpimi, chashna fiñarircani.
159Mandaj Dioslla,
Can mandashcacunata ñuca juyajujtaca yachahuanguimi.
Cambaj ninan juyaihuan shinllichihuayari.
160Tucui cambaj Shimicunaca, napacha llullachu.
Can mandashca shimicunaca, alitalla rurashpa, causaita causaicaman pactachinatami villajun.
Sin.
161Mandajcunapash, ñucataca yangamanda llaquichingapami catiriyanajurca.
Ashtahuangarin ñuca shungupica, Cambaj Shimicunataca manllashpami causajurcani.
162Cambaj shimita cazushpami, ninanda cushijuni.
Ñucaca, macanajushpa ashtacata quichumushcashnami, ninanda cushijuni.
163Llullangapaca napacha munanichu.
Can mandashca shimicunatami juyani.
164Punllapica, canchiscaman Candaca alicachijuni.
Imatapash alitalla ruraj cajpimi, chashna alicachijuni.
165Can mandashca shimicunata juyajcunaca, ali causaigutami charin.
Paicunaca, imapipash na pandarinachu.
166Mandaj Dioslla,
Can quishpichinatami shuyajurcani.
Can mandashca shimicunatami pactachijurcani.
167Can mandashca shimicunatami, tucui shunguhuan pactachijurcani.
Chai mandashcacunataca ninandapachami juyarcani.
168Can mandashpa churashca shimicunatapash, tucuitami pactachijurcani.
Ñuca causaitaca, Canga alimi yachapangui.
Tau.
169Mandaj Dioslla,
ñuca ninanda mañashcata uyapangui.
Cambaj Shimipi nijujshnallata ali yuyaita carahuayari.
170Ñuca mañashcataca uyahuayari.
Cambaj shimipi nijushcashnallata quishpichihuayari.
171Ñuca shimihuanmi, Candaca ninanda alicachijusha.
Can mandashca shimicunata yachachijpimi, chashna alicachijusha.
172Can mandashca shimicunatami villajusha.
Can mandashca shimicunaca pactanapacha cajpimi, chashna villajusha.
173Cambaj maquihuan ñucata yanapangapa ucha shamupailla.
Can mandashca shimicunatami pactachishpa causajuni.
174Mandaj Dioslla,
Can quishpichinatami ninanda munarcani.
Can mandashca shimicunami, ñucataca ninanda cushichihuan.
175Canda alicachijungapa causaita carahuailla.
Can mandashca shimicunami ñucataca yanapahuanga.
176Ñucaca, chingashca llamagushnami maitapash purijurcani.
Ñucata mascashpa huacaichihuailla.
Can mandashca shimicunata pactachishpa causajushcamanda huacaichihuailla.
Who We AreWhat We EelieveWhat We Do
2025 by iamachristian.org,Inc All rights reserved.
