1Diospajlla causaj crijcunaman ofrendata tandachipaichi nishpaca, na cutinga quilcajunichu.
2Carana munaita canguna charijtaca alimi yachani. Chaimandami: “Acaya llactapi causajcunaca, caina huatallatami carana munaita charirca” nishpa, Macedonia llactapi causajcunaman cushijushpa villajurcani. Chaita yachashpami, paicunapash carana munaita ashtacacuna japinajurca.
3Ashtahuangarin, canguna carangapa munashcamanda ñuca cushijushcapash ama yanga cachunmi, cai huauquicunataca cachamujuni. Cangunamanda ñuca villashcashnallatami, carangapa shuyanajuchun munani.
4Macedonia llactamanda huaquinguna ñucahuan shamujpi, canguna ofrendata nara tandachishca cajpica, ñucanchimi pingai tucushun. Nara tandachishca cashpaca, cangunacarin ashtahuanmi pingai tucunguichi.
5Chaimandami, cai huauquicunataca cangunapajman ñaupashpa richun cachanapacha tucurcani. Pundallata canguna cushijushpa carashun nishcataca, tandachishcalla cajta ricuchunmi cachajuni. Ama ñucanchi nishcamandalla, ashtahuangarin cangunapaj munaipacha tandachishpa shuyanajuchunmi cachamuni.
6Ashtahuangarin cashnami nini: Ashatalla tarpushpaca, ashatallami tandachinga. Shinallata, ashtacata tarpushpaca, ashtacatami tandachinga.
7Tucuicunallata cangunapaj shungupi yarishcatami carana canguichi. Na llaquirishpami, na mandashcamandalla carana canguichi. Taita Diosca, cushijushpa carajcunatami juyan.
8Taita Diosca ninan ushaita charishpami, canguna imaguta charichumbash tucui causaipi ninanda caramujun. Shina cajpimi, shujcunaman ima alita rurangapapash tucuita charinguichi.
9Quilcashcapica cashnami nijun:
“Imagutapash na charijcunamanga chaupishpami cararca.
Alitalla ruranaca, causaita causaicaman na tucuringachu” nijunmi.
10Tarpuj runamanga Diosllatami tarpuna muyutapash, micuchun micunatapash caramujun. Paillatami, canguna tarpushcatapash ashtahuan mirachinga. Shinallata, alitalla rurajcuna cashpami, shujcunamambash ashtahuan alita rurashpa catinguichi.
11Tucui juyaihuan carachunmi, cangunamanga tucuita ashtahuan caranga. Canguna carashcata ñucanchi saquigrijpimi, tucuicuna Taita Diostaca “pashi” ninajunga.
12Canguna cashna carashcacunaca, Diospajlla causajcuna, imaguta na charijpilla caranaca na canllu. Ashtahuangarin chai carashcamandaca, Taita Diosta ninanda “pashi” ninajuchumbashmi caranajunguichi.
13Chashna carashcamandami, Taita Diostaca “ninan ushaitami charingui” ninajunga. Shinallata, Jerusalenbi crijcunamambash, ashtahuan shujcunamambash na llaquishpa caranajushpami, Cristomanda ali villanata villajpi, cazushpa causanajushcataca ricuchinajunguichi.
14Taita Dios ninandapacha juyashpa carashcamandami, cangunamandapash ninan juyaihuan Diosta mañanajunga.
15¡Na yachai ushanalla juyaimandami, Taita Diostaca “pashi” ninajushunchi!
Who We AreWhat We EelieveWhat We Do
2025 by iamachristian.org,Inc All rights reserved.
