1Chai huatacunallatami, Babilonia llactata jatun mandaj Baladán shuti runapaj churi Merodac-baladán shuti runaca, Ezequías huañujujta yacharca. Chaita yachashpami quilcashca fangacunatapash, shuj caranacunatapash, cachamurca.
2Ezequiasca ninanda cushijushpa, paicunata chasquishpaca, paipaj huasipi tucui imatalla charishcatapash, culquita, curita, mishquilla ashnajun yacucunatapash, ali aceitecunatapashmi ricuchijurca. Shinallata, macanajungapa alichishca huasitapash, ima juyaillacunata alichishca ucucunatapashmi tucuillata ricuchirca. Ezequiasca, imatallapash na pacashpami paipaj huasipi, pai mandajuj llactacunapi tucui imalla tiyashcacunata ricuchijurca.
3Chaimandami profeta Isaiasca, jatun mandaj Ezequías runapajman shamushpa cashna nirca:
“Cambajman shamuj chai runacunaca, ¿imatata nirca? Paicunaca, ¿maimandata cambajman shamushca?” nircami.
Shina nijpimi, Ezequiasca:
“Paicunaca, Babilonia caru llactamandami shamushca” nirca.
4Shina nijpimi, Isaiasca:
“Cambaj huasipica, ¿imatallata ricuchircangui?” nirca.
Shina nijpimi Ezequiasca:
“Ñuca huasipica, tucui imalla tiyashcatami ricunajurca. Imatallapash na pacashpami tucuitapacha ricuchircani” nirca.
5Shina nijpimi Isaiasca, Ezequiastaca cashna nirca:
Tucuita Mandaj Diosmi cashna nijun:
6“Cambaj huasipi tucui ima tiyashcatapash, cambaj ñaupa taitacuna, tucui imatalla alichishcacuna cunangaman tiyashcatapash, Babilonia llactaman apana punllacunami chayamujun. Caipica, imatallapash na saquishpami apanga” ninmi Mandaj Diosca.
7Shinallata, “cambaj churicunatapash, Babilonia llactata jatun mandajpaj huasiman apajpimi, eunucocuna tucushpa causanajunga ninmi” nirca.
8Shina nijpimi Ezequiasca, Isaiastaca:
“Mandaj Dios rimashca shimicunata ñucaman can villashcapash, alimi capan” nirca.
Shinallata cashnatapashmi nirca:
“Ñuca causajui punllacunapillapash, ima llaquipash na japishpa, ali causai tiyashpachari ali canman” nirca.
Who We AreWhat We EelieveWhat We Do
2025 by iamachristian.org,Inc All rights reserved.
