JOB 31 - Quichua Imbabura 2016

Job runa, pai alita rurashcata villashcamanda

1Ñuca ñavihuanga, tucuita pactachingapami, ari nijurcani.

¿Imashpata jarihuan nara tacarishca cuitsataca ricushayari?

2Taita Diosca jahua pachamandaca, ¿imatashi carahuanga?

Tucuita rurai ushaj Diosca, jahua pachamandaca, ¿imatashi cuhuanga?

3Diosta na manllaj runataca, ¿nachu llaquichinga?

Juchata rurajcunapajca, manllanayai llaquicunaca, ¿nachu tiyanga?

4Diosca, ñuca imashna causajujtaca, ¿nachu ricujun?

¿Nachu tucui imata ñuca rurashcataca, tucuillata yupajun?

5Llullashpa purishca cajpi,

umachingapa ñuca purijushca cajpipash,

6Taita Diosllata pezanshna ricuhuachun.

Shina rurashpami ñucataca, ali cajta ricuhuanga.

7Ali ñanmanda caruyashca cajpipash,

ñuca ñavi ricushcata, ñuca shungu munashca cajpipash,

ñuca maquihuan ima na alita rurashca cajpipash,

8ñuca tarpushcacunataca, shujcuna micuchun ninimi.

Ñuca tarpushcacunataca, pilashpa apachun ninimi.

9Shuj huarmita ñuca munashpa, paihuan urmashca cajpi,

ñuca cumba runapaj huarmita pungupi chapajushca cajpipash,

10ñuca huarmica, shujcunapaj gañan tucushpa causachun.

Shujcuna, paihuan pacta puñushpa causachun.

11Jatun na ali juchata ñuca rurashca cajpica,

juezcunami llaquichina cahuan.

12Chai juchaca, Abadón ucutapash rupachishpa tucuchina ninashnami.

Ñuca tucui charishcatami rupachishpa tucuchinga.

13Ñucapajta rurajcuna imatapash mañajpi na cushca cajpica,

paicuna japina cashcata mañajpi na cushca cajpica,

14¿ima ñavihuanda Taita Diospaj ñaupapica ricurigrisha?

Paicunamanda tapuchijpica, ¿imatashi tigrachi ushasha?

15Ñuca mamapaj vijsapi causaita caraj Diosllata,

¿nachu paimambash causaita carashcanga?

Mamapaj vijsapica, ¿nachu Diosllata chashna churashcanga?

16Imagutapash na charij runacuna cushijunata ñuca jarcashca cajpipash,

sapalla mamaguta huacachishpa, llaquichishca cajpipash,

17taita mama illaj huahuaman na carashpa, ñucalla micushca cajpipash, llaquichihuachun ninimi.

18(ashtahuangarin, chairalla viñai cashpapash, ñucami paicunataca taitashna viñachircani.

Sapalla mamagutapash, ñuca mamatashnami yanapaj carcani).

19Churajuna illajcunatapash, ¿na yanapashpa ricushcanillachu?

Imagutapash na charijcuna, jahualla churajuna illajtapash ¿saquishcanillachu?

20Paicunaca, ñuca llamacunapaj milmahuan cunujyashpami,

ninanda pashi ninajurca.

21Taita mama illaj huahuacunata, ñuca llaquichishca cajpica,

pungu yaicunaman, ñucata yanapahuai nishpa shamushca cajpipash, na yanapashca cajpica,

22ñuca huasha tullupash faquirishpa urmachun,

ñuca rigra tullupash faquirichun ninimi.

23Ñucaca, Taita Dios llaquichinata manllashpami,

jatun Dioshuan chimbapurangapa, ushaitaca na charini.

24Curita yariajlla causajushca cashpaca, curitaca:

‘Canda yariajllami causajuni’ nimanmi carcani.

25Ñuca ninanda charijyashcamanda cushijushca cashpapash,

ñuca maquihuan ashtahuan mirachishpa catishca cashpapash,

26Indi punchapamba llujshijujta,

luna juyailla cajta, ricushca cashpapash,

27chaicunataca shungupillapash, na mañarcanichu.

Ñuca maquihuan muchashpapash na ricuchishcanichu.

28Chashna na alita rurashcacunaca, ninan juchapachami.

Jahua pachamanda taita Diospaj ñaupajpimi juchata ruraiman carcani.

29Ñucata fiñaj runa llaquita apajujpipash, na cushijushpa ricurcanichu.

Paita llaqui japijpipash, na asishpa ricujurcanichu.

30(Ñuca jalluhuanllapash, na juchata rurarcanichu.

Paita llaqui japichumbash, na mañarcanichu).

31Ñucapajta rurajcunapash:

‘¿Maijanda aichataca, na ushangacaman micurcanguichi?’ nishpa tapuchunmi mandarcani.

32(Shuj llactamanda shamuj runatapash, na canllapi pacarichircanichu.

Carumanda shamujcuna yaicuna pungutapash na vicharcanichu).

33Na cazushpa ima na alicunata rurashcatapash, shujcunashnaca na pacarcanichu.

Ñuca na alita rurashcataca, ñuca shungupillapash na pacarcanichu.

34Ashtaca gentecunata manllashpalla,

ñuca ayllucuna fiñanata manllashpalla,

na ñuca huasi ucupi upalla tiyajurcanichu.

35¡Ñucata pipash uyashpachari, ali canman!

Ñucata fiñaj runa juchachijpipash,

tucuita rurai ushaj Dios ñucamanda shayarichunmi shuyajuni.

36Pai imata nijpipash, ñucaca tucui shunguhuanmi chasquiman.

Coronata umapi churajunshnami chasquiman.

37Ñuca imatalla rurashcacunataca, tucuitami Diosman villaiman.

Paipaj ñaupajpica na manllashpami ricuriman.

38Ñuca na alita rurashcamanda, alpacuna caparishca cajpipash,

huachushca pambacuna tucuilla huacashca cajpipash,

39ima fucushcatapash, na randi cushpa micushca cajpipash,

na cashpaca, chai alpayujcunata llaquichishca cajpipash,

40trigo viñangapa randica, na ali jihuacunara viñachun ninimi.

Cebadapa randica, cashacunara viñachun ninimi” nijurcami.

Job rimashca shimicunaca, caipimi tucurin.