2 REYES 3 - Quichua Imbabura 2016

Joram shuti runa Israel llactata mandajushcamanda

1Jatun mandaj Josafat shuti runaca, chunga pusaj huatata Judá llactata mandajujpimi, Acab runapaj churi Joram shuti runaca, Israel llactata mandai callarirca. Paica, chunga ishcai huatatami, Samaria pueblopi mandajurca.

2Paica, Mandaj Diospaj ñaupajpi na alita rurajushpapash, paipaj taita, mamashnaca na rurarcachu. Paipaj taita rurachishca Baal shuti rumihuan rurashca dioscunataca anchuchircami.

3Shina cashpapash, Nabat shuti runapaj churi Jeroboam runa, Israelcunata juchata rurachishcatami rurashpa catijurca. Chai juchacunata ruranataca, napacha saquircachu.

Moab llacta gentecunata mishashpa japinatami, Eliseoca villashca

4Moab llactata jatun mandaj Mesa shuti runaca, ashtaca animalcunatami charirca. Paica, Israel llactata jatun mandaj Acab runamanmi, patsaj huaranga maltun llamata, patsaj huaranga nara milmata rutushca jari llamata cun carca.

5Shina cashpapash Acab runa huañujpica, Moab llactata jatun mandajca, Israel llactata jatun mandajtaca na cazurcachu.

6Chaimandami jatun mandaj Joram shuti runaca, Samaria pueblomanda rishpa, tucui Israelcunata cayashpa tandachijurca.

7Chai jipaca, Judá llactata jatun mandaj Josafat runamanmi, cashna nichun cacharca: “Moab llactata jatun mandajmi, ñucata na cazushpa jatarijun. Canga, ¿Moab llactapi causajcunahuan macanajungapa, ñucahuan ringuimanllu?” nichunmi cacharca.

Shina nijpimi Judá llactata jatun mandajca cashna nirca: “Ari, rishallami. Ñucapash, cambash shujllashnallami canchi. Ñuca gentecunapash cambajmi, ñuca caballocunapash cambajllatami” nircami.

8Shinallata Josafat runaca: “¿Maijan ñandashi rishun?” nijpimi, Joram shuti runaca: “Edom llactapi tiyaj jichushca pamba ñandami rishun” nirca.

9Chai jipaca, Israel llactata jatun mandajpash, Judá llactata jatun mandajpash, Edom llactata jatun mandajpashmi rinajurca. Jichushca pambata muyushpa ña canchis punllata rinajujpillatami, paicunata catishpa rinajuj macanajuj runacunapajpash, animalcunapajpash yacu tucurirca.

10Chaimandami Israel llactata jatun mandajca, cashna nirca:

“¡Uyaichi! Quimsandi cai jatun mandaj ñucanchitaca, Moab llacta gentecunapaj maquipi churangapami, Mandaj Diosca pushamushcayarin” nircami.

11Shina nijpimi Josafat runaca, cashna nirca:

“Mandaj Dios ima nijtapash tapushpa yachangapaca, ¿nachu caipica, Mandaj Diospaj profeta tiyan?” nircami.

Shina nijpimi, Israel llactata jatun mandajpajta rurajpuramanda shuj runaca:

“Safat runapaj churi Eliseomi caipi causan. Paica, Eliasta catijmi carca” nirca.

12Shina nijpimi, Josafat runaca:

“Paica, Mandaj Dios ima nishcata yachangami” nirca.

Shina nishpami, Israel llactata jatun mandajpash, Josafat runapash, Edom llactata jatun mandajpash, Eliseopajman urai rinajurca.

13Chaipimi Eliseoca, Israel llactata jatun mandajtaca cashna nirca:

“Canhuanga, ¿ima ricunatata charini? Cambaj taitapaj, mamapaj profetacunapajman rilla” nirca.

Shina nijpimi Israel llactata jatun mandajca, cashna nirca:

“Na rishachu. Mandaj Diosmi, cai quimsandi jatun mandaj ñucanchitaca, Moab llacta gentecunapaj maquipi churangapa tandachimushca” nircami.

14Eliseoca, cashna nirca:

“Tucuita Mandaj Diosca ricujumbachami, paipaj ñaupajpimi cani. Judá llactata jatun mandaj Josafat runata na cazuj cashpaca, candacarin ricuitallapash na ricuimanllu carcani.

15Ashtahuangarin cunanga, arpahuan taquij shuj runata pushamuichi” nircami.

Chai runa taquijujpimi, Mandaj Diospaj ushaica, Eliseopajman shamurca.

16Shina cajpimi, Eliseoca cashna nirca:

“Mandaj Diosca cashnami nin: ‘Cai pugru pambapica, yacu jundachun tauca jatun utujucunata allaichi’ nijunmi.

17‘Shinallata, ima huairata, ima tamiata, canguna na ricujpipash, cai pugru pambapica, ninandapachami yacu jundanga. Shina jundajpimi cangunapash, cangunapaj animalcunapash, huagracunapash yacuta ufianguichi’ ninmi Mandaj Diosca.

18‘Mandaj Diosca na chaitalla rurashpami, Moab llacta gentecunatapash, cangunapaj maquipi churagrin.

19Chaimandami, jatun pircahuan muyundi jarcashca tucui pueblocunata, juyailla tucui huasicunatapash urmachi ushanguichi. Shinallata, tucui ali quirucunatapashmi, shitanguichi. Yacu llujshijuj tucui pugyucunatapash quilpashpami saquinguichi. Ali fucuj tucui alpacunatapash, rumicunahuanmi quilpashpa saquinguichi’ ninmi” nijurcami.

20Animalta Diosman cushpa huañuchina tutamandapimi, Edom llacta ñanda yacu urai shamushpa chai pambapi jundarca.

21Moab llacta gentecunaca, jatun mandajcuna, paicunahuan macanajungapa vichai shamunajujtaca, tucuicunami yacharca. Chaimandami, macanajunata chaira yachajujcunamanda callarishpa tandanajushpaca, Edom llacta mujumbi shuyanajurca.

22Cayandi tutamandata Moab llacta gentecuna jatarishpaca, yacucunapi indi punchalla shitajujpimi, yahuarshnalla pucalla cajta carumanda ricunajurca.

23Chaita ricushpami, cashna ninajurca: “¡Chaica, espadahuan huañuchishca yahuarmari! Chai jatun mandajcunaca, caishuj chaishuj macanajushpami, cumbapuracunallata huañuchirishca. Cunanga, ¡Moab llacta gentecuna, paicuna imatalla charishcacunata quichushpa apamungapa jacuchi!” ninajurcami.

24Ashtahuangarin carpacunata shayachishpa, Israelcuna tiyanajuj pambaman chayajpimi, Moab llacta gentecunahuan macanajurca. Shinallata, Moab llacta gentecuna, pacajungapa calpanajujpimi, paicunataca catishpa huañuchinajurca.

25Pueblocunatapash tucuilla tucuchishpami, ali fucuj alpacunapipash rumicunata jundachinajurca. Yacu pugyucunatapash quilpashpami, tucui ali quirucunatapash shitashpa, Kir-hareset shuti pueblotapash, rumi mundundalla saquinajurca. Huaracahuan macanajujcuna muyundi shayarishpami, chashna tucuchinajurca.

26Moab llactata jatun mandajca, macanajuipi mishai tucushca cashpami, espadahuan macanajunata ali yachaj, canchis patsaj runacunata tandachishpa, Edom llactata jatun mandajhuan macanajungapa rirca. Ashtahuangarin macanajuitaca, na usharcachu.

27Chaimandami, paipaj randi mandangapa tiyarina paipaj punda churita japishpa, paipaj diosman cushpa, pirca jahuapi huañuchishpa, tucuillata rupachirca. Israelcunahuanga ninandapachami fiñarirca. Chai jipaca, tucuillami, paicunapaj llactaman tigranajurca.