1 CRÓNICAS 14 - Quichua Imbabura 2016

Hiram shuti jatun mandajca, shuj runacunatami, Davidpajman cachashca(2 Sam. 5:11-12)

1Tiro shuti pueblota jatun mandaj Hiram shuti runaca, paipaj randi rimajcunatami, Davidpajman cacharca. Shinallata, Davidpaj huasita rurachumbash, cedro caspicunata, huasichijcunatapash, caspicunahuan imatapash rurajujcunatapashmi cacharca.

2Chaita ricushpami, Israelcunata jatun mandaj Davidca, Mandaj Diosllata, Pai agllashca Israel llactaca, ninanda juyashpa tucuipi alicachi tucuchun churashcata yacharca.

Jerusalenbi David charishca churicunamanda(2 Sam. 5:13-16; 1 Crón. 3:5-9)

3Davidca, Jerusalenbi cashpami shuj huarmicunahuambash, ashtahuan shuj huahuacunata charirca.

4Jerusalenbi pai charishca churicunaca: Samúa, Sobab, Natán, Salomón,

5Ibhar, Elisúa, Elpelet,

6Noga, Nefeg, Jafía,

7Elisama, Eliada, Elifelet shuticunami carca.

Filisteocunata, David mishashcamanda(2 Sam. 5:17-25)

8Israelcunata jatun mandaj cachun, Davidta aceitehuan talishpa javishcata, Filisteocuna uyashpami, Davidhuan macanagungapa vichai shamunajurca. Chaita yachashpami, Davidca paicunahuan macanajungapa llujshirca.

9Filisteocunaca, Refaim shuti pugru pamba jundami tiyanajurca.

10Chaimandami Davidca, Taita Diostaca:

“¿Filisteocunahuan macanajungapaca, rinallachu cani? ¿Paicunataca, ñuca maquipi churanguichu imashi?” nishpa tapurca.

Shina nijpimi Mandaj Diosca:

“Rilla, paicunataca cambaj maquipimi churasha” nirca.

11Shina nijpimi Davidca, Baal-perazim shuti pambaman shamushpa filisteocunataca misharca. Shina mishashpami Davidca: “Taita Diosca, jatun yacu tucuilla apajshnami, ñucata fiñajcunataca mishachirca” nirca. Chaimandami chai pambataca, Baal-perazim nishpa shutichirca.

12Rurashcalla dioscunata filisteocuna saquishpa rijpimi, chaicunataca rupachinami canguichi nishpa, Davidca mandarca.

13Filisteocunaca, cutin tigramushpami, chai pugru pambaman jundamurca.

14Chaimandami cutin, Taita Diosta David tapujpi Taita Diosca cashna nirca:

“Ama chimbapura macanajushpa, huashata muyushpa, bálsamo yuracuna shayanajuj ñaupajpimi, paicunahuan macanajuna cangui.

15Bálsamo yuracunapaj fangacuna ninanda cuyurij uyarijpimi, macanajungapa llujshina cangui. Taita Dios Ñucami, filisteocunata huañuchingapaca ñaupashpa risha” nircami.

16Shina nijpimi Davidca, Taita Dios mandashcata rurashpa, filisteocunataca, Gabaón shuti pueblomandaca, Gezer shuti pueblocaman catishpa huañuchirca.

17David chashna rurashcataca, tucui llactacunapi causajcunami yacharca. Mandaj Diosca, shuj llactacunapi causajcunapaj yuyaipipash, Davidta manllana yuyaitami churarca.