2 CRÓNICAS 1 - Quichua Imbabura 2016

Salomonga, alipacha yachajushca cangapami mañashca(1 Rey. 3:3-15)

1Davidpaj churi Salomonmi, llactataca shinllitapacha ña mandajurca. Mandaj Taita Diosca, paihuan pacta cashpami, paitaca ninandapacha jatunyachirca.

2Salomonga, tucui Israelcuna tandanajuchunmi cayarca. Huaranga macanajuj runacunata, patsaj macanajuj runacunata mandajcunata, juezcunata, Israelcunata tucui mandajcunata, huasi ucupuracunata mandajcunatami cayarca.

3Salomonga, tucui chai tandanajushca gentecunandimi, Gabaón shuti lomapi tiyaj altarman rirca. Taita Dioshuan tuparina jatun carpa chaipi cajpimi, chaiman rirca. Chai carpataca, Mandaj Diospajta ruraj Moisesmi, jichushca pambapi rurachishca carca.

4Ashtahuangarin Davidca, Diospaj arcataca, Quiriat-jearim shuti pueblomandami chai arcata alichingapa pai rurashca pushtuman apamushca carca. Paica, shuj carpatami Jerusalenbi shayachishca carca.

5Shinallata, Hur shuti runapaj churi, Uri shuti runapaj churi Bezaleel shuti runa rurashca bronce altarpashmi, Mandaj Diospaj jatun carpa ñaupajpillata carca. Chai altar ñaupajmanmi Salomonga, tucuilla tandanajushca gentecunandi, Diosta tapungapa rirca.

6Dioshuan tuparina jatun carpapi tiyajuj bronce altarman, Mandaj Diospaj ñaupajman Salomón vichai rishpaca, huaranga animalcunatami Diosman carashpa, chai altarpi rupachijurca.

7Chai tutallatami Taita Diosca, Salomonman ricurishpaca: “Imata Ñuca carachun munashpapash mañahuailla” nirca.

8Shina nijpimi Salomonga, Taita Diostaca cashna nirca: “Canga, ñuca taita Davidtaca, ninandami llaquipashcangui. Chaimandami ñucataca, paipaj randi jatun mandaj cachun churahuashcangui.

9Mandaj Taita Dioslla. Cunanga, ñuca taita Davidman Can rimashca shimitaca pactachipailla. Canmari ñucataca, cai pachapi tiyaj ñutu alpashna ashtaca gentecunapaj jatun mandaj cachun churahuashcangui.

10Cai tucui gentecunapaj ñaupajpi mandai ushangapaca, cunanga, ali yachaitapash, ali yuyaitapash carahuayari. Cambaj cai tucui ashtaca gentecunata mandaitaca, ¿pita ushangayari?” nircami.

11Shina nijpimi Taita Diosca, Salomondaca cashna nirca: “Cambaj shungupica, charij canata, ima alicunata charinata, na cashpaca alicachi tucunataca na mañashcanguichu. Shinallata, canda fiñajcunata causaita quichuchumbash, canman unai causaita carachumbash na mañashcanguichu. Ashtahuangarin, ñuca agllashcacunata mandai ushangapami, ali yachajushca canata, ali yuyaita mañahuarcangui. Candaca, paicunata jatun mandaj cachunmi churarcani.

12Shinamandami, ali yachajushca canatapash, ali yuyaitapash cuni. Shinallata charij canatapash, alicachi tucunatapashmi cuni. Chaicunataca, cambaj punda jatun mandajcunaca napacha charishcachu. Cambaj jipaman jatun mandajcunapash, napacha charingachu” nircami.

13Salomonga, Gabaón shuti lomapi, Dioshuan tuparina jatun carpa ñaupajpi tiyaj altarmanda Jerusalenman tigrashpami, Israelcunata mandajurca.

Carretacunata, caballocunatami, Salomonga randishpa jatujushca(1 Rey. 10:26-29; 2 Crón. 9:25-28)

14Salomonga, macanajuna carretacunata, caballocunapi tiyarij macanajuj runacunatami tandachirca. Paica, huaranga chuscu patsaj carretacunata, caballocunapi tiyarij chunga ishcai huaranga macanajuj runacunatami charirca. Paicunatami huaquingunataca, macanajuna carretacunata alichina pueblocunapi, shujcunataca, pai jatun mandajpaj Jerusalén pueblopi churarca.

15Jatun mandaj Salomonga, culquita, curitaca, rumitashnami Jerusalenbica tandachirca. Cedro caspicunatapash, Sefela pambacunapi tiyaj sacha higo yuracunatashnami, ashtacatapacha charirca.

16Jatun mandaj Salomón randichun cachashca runacunaca, Egipto llactamandapash, Celicia llactamandashpami caballocunata randishpa apamunajurca.

17Egipto llactamandaca, shujlla carretatami, sucta patsaj culquipaj, shuj caballotaca, patsaj picha chunga culquipaj randishpa apamunajurca. Salomonbaj randij runacunallatami, heteocunata jatun mandajcunamambash, Siria llactata jatun mandajcunamambash randishpa apanajurca.