1Chai jipami Mandaj Diosca, Moisesta cashna nirca:
2“Israelcunataca, paicunapaj taitacunapaj tucui huasi ucupuramanda shuj vara caspita apamuchun mandangui. Paicunapaj taitacunapaj huasi ucupuracuna mashna cajpipash, tucui mandajcunamanda, chunga ishcai vara caspicunata apamuchun mandangui. Chai vara caspicunapica, paicunapaj shuticunata quilcangui.
3Levipaj miraicunapaj varapica, Aaronbaj shutita quilcangui. Paicunapaj taitacunapaj mirai ayllucunata mandajcunaca, tucuicunami vara caspita charinajunga.
4Chaicunataca, Ñucahuan tuparina jatun carpapi tiyajuj arca ñaupajpi churangui. Chaipimi Ñucaca cangunaman ricurisha.
5Chaipimi, Ñuca agllashca runa charijuj vara caspica sisanga. Shina cajpimi Israelcuna, Ñuca ñaupajpi ninanda na alicachishpa rimanajujtaca tucuchisha” nijurcami.
6Shina nijpimi Moisesca, Israelcunataca chashna nigrirca. Chaimandami tucuilla mandajcunaca, vara caspicunata Moisesman cunajurca. Paicunapaj taitacunapaj huasi ucupuracunata tucui mandajcunami, chunga ishcai varacunata cunajurca. Aaronbaj vara caspipashmi, caishujcunapaj varacunahuan tandachishca carca.
7Moisesca, Diospaj carpapi alichishca tiyajuj arca ñaupapimi, Mandaj Diospaj ñaupajpi chai varacunataca churarca.
8Moisesca, cayandi tutamandami, arcata alichishca tiyajuj jatun carpaman shamurca. Chaipimi, Levipaj huasi ucupura Aaronbaj varapica, verde fangacuna llujshishpa retoñashpa, sisashca carca. Shinallata almendro muyucunapashmi fucushca carca.
9Moisesca, Mandaj Diospaj ñaupajmanda tucuilla varacunata, Israelcunapajman apajpimi, paicunapaj varacunataca tucuicuna japinajurca.
10Mandaj Diosca, Moisestaca cashnami nirca: “Aaronbaj varataca, Israelcuna, Ñucata na cazushcata yarichina cachun, arca ñaupajpillata churagri. Paicuna na alicachishpa Ñucata rimanajushcata saquichijpimi, paicunaca na huañunga” nircami.
11Shina nijpimi Moisesca, Mandaj Dios mandashcataca chashnatapacha rurarca.
12Shina rurajpimi Israelcunaca, Moisestaca cashna ninajurca: “Ñucanchica huañugrinchimari. Ñucanchica chingagrinchimari. Ñucanchica, tucuillamari chingagrinchi.
13Mandaj Diospaj jatun carpaman maijambash quimirimushpaca, huañungapachami. Shina cashpaca, ¿ñucanchica, tucuillachu huañushpa tucurina canchi?” ninajurcami.
Who We AreWhat We EelieveWhat We Do
2025 by iamachristian.org,Inc All rights reserved.
