NÚMEROS 4 - Quichua Imbabura 2016

Levitacuna imatalla ruranamanda

1Mandaj Diosca Moisestapash, Aarondapashmi cashna nijurca:

2“Leví shuti runapaj churicunamanda Coat shuti runapaj miraicunataca, paicunapaj ayllucuna, paicunapaj ñaupa taitacunapaj huasi ucupuracuna imashna tandanajushcapi yupangui.

3Ñucahuan tuparina jatun carpapi tandanajushpa tucuita rurangapa yaicui ushanalla jaricunataca, quimsa chunga huatata charijmanda callarishpa, picha chunga huatata charincaman yupangui.

4Coat runapaj miraicunaca, Ñucahuan tuparina jatun carpapi, Ñucapajlla shicanyachishca ucupica, caicunatami ruranajunga:

5Causanajushca pushtumanda shujman rina chayajpica, Aaronhuan, paipaj churicunahuanga, Ñuca carpa ucupi jarcashca fachata uriajuchishpami, Ñuca mandashca shimicunata alichina arcata quilpanajunga.

6Chai jahuapica, tejón shuti animalcunapaj quilpana caracunatami churanajunga. Shinallata, azul fachahuan tucuillata quilpashpami, arcata apana vara caspicunatapash churanga.

7Ñucaman carashpa tandata churana meza jahuapica, azul telatami mandanajunga. Chai jahuapica uchilla platocunata, cucharacunata, Ñucaman carashpa vinota talina copacunatapash, jatun tastacunatapashmi churanajunga. Shinallata, punllandi Ñuca ñaupajpi churana tandatapash, chai jahuapillatami churanajunga.

8Chai jahuapica, yana puca telahuanmi quilpanajunga. Chai jahuallatapash, tejón shuti animalcunapaj caracunahuanmi quilpanajunga. Chaipica, mezata apana vara caspicunatapashmi churanajunga.

9Chai jipaca, michata japichina candelerocunata, lamparacunata, rupashca pavizacunata anchuchinacunata, uchilla platocunata, aceiteta churana vasocunatapashmi, tucuillata azul telahuan quilpanajunga.

10Tucui ima tiyashcacunataca, tejón shuti animalcunapaj caracunahuan quilpashpami, chaicunata apana caspi jahuacunapi churanajunga.

11Curita rurashca altar jahuapica, azul telatami mandanajunga. Chai jipaca, tejón shuti animalcunapaj caracunahuanmi quilpanajunga. Shinallata, altarta apana caspicunata churashpami apanajunga.

12Ñucapajlla huasipi imatapash rurangapa tucui ima tiyajcunatapash japishpami, azul telapi churanajunga. Chaicunataca, tejón shuti animalcunapaj caracunahuan quilpashpami, apana caspi jahuapi churanajunga.

13Altartaca, uchufata ali fichashpami, yana puca telahuan quilpanajunga.

14Chai jahuapica, altarpi imatalla rurangapa tucui tiyashcacunatami churanajunga: Palacunata, imatapash japina jirrucunata, ninayashca carbonda churanacunata, jatun tastacunata, chai altarpaj tucui imalla tiyajcunatapashmi churanajunga. Chai jahuapica, tejón shuti animalcunapaj caracunahuan quilpashpami, huandushpa apana vara caspicunatapash churanajunga.

15Aaronbash, paipaj churicunapash, Ñucapajlla huasita, chaipi tucui imalla tiyashcatapashmi apangapa quilpashpa saquinga. Chai jipaca, paicuna tiyanajushca pushtumanda shujman rina chayajpimi, Coat shuti runapaj miraicuna tucuita apashpa rinajunga. Chashna cashpapash, Ñucapajlla shicanyachishca imacunataca napacha tacaringachu, tacarishpaca huañungapachami. Chaicunatami, Coat shuti runapaj miraicunaca, Ñucahuan tuparina jatun carpapica ruranajunga.

16Ashtahuangarin, sacerdote Aaronbaj churi Eleazarca, lamparacunapi churana aceiteta, mishquilla ashnajun inciensota, punllandi Diosman caranacunata, talishpa javina aceitetapashmi ricunga. Ñuca carpapi tucui imalla tiyashcacunatapash, Ñucapajlla huasipi tucui imata charinacunatapashmi ricujunga” nijurcami.

17Mandaj Diosca, Moisestapash, Aarondapash, cashnatapashmi nirca:

18“Levitacunamanda, Coat shuti runapaj ayllucuna huañushpa tucurichunga napacha saquinachu cangui.

19Ñucapajlla shicanyachishca ucuman chayashpa ama huañuchunga, cashna ruranguichi: Aaronbash, paipaj churicunapashmi, Levitacuna imatalla rurana cajpipash, chaicunata rurachun, tucuipi ricushpa churanajunga.

20Ñucapajlla shicanyachishca imacunata quilpanajujpica, Levitacunaca, na ricungapa yaicungachu. Chaiman yaicushpaca huañungapachami” nijurcami.

21Mandaj Diosca, cashnatapashmi Moisestaca nijurca:

22“Gersón runapaj miraicunatapash, paicunapaj ñaupa taitacunapaj huasi ucupura ayllucuna imashna tandanajushcapi yupangui.

23Ñucahuan tuparina jatun carpapi tandanajushpa Ñucapajta rurangapa yaicujcunataca, quimsa chunga huatata charijmanda callarishpa, picha chunga huatata charijcunacaman yupangui.

24Gersonbaj mirai ayllucuna Diospajta ruranapi, imatalla apanapica caicunatami ruranajunga:

25Ñucahuan tuparina jatun carpapaj cortinacunata, Ñuca carpata quilpanacunata, chaipi jahualla quilpashca tejón shuti animalcunapaj caracunata, Ñucahuan tuparina carpa pungupaj cortinatapashmi apanajunga.

26Shinallata, carpa patiota muyushpa jarcashca cortinacunatapash, patioman yaicuna pungupaj cortinatapash, chaicunaca altarta, carpata muyundi jarcashcami tiyajun. Chaicunahuanga, huatana cabiacunatapash, paicunallatami apanajunga. Chai ucupi imacunatalla rurangapa tucui imalla tiyashcacunatapashmi apanajunga. Paicunaca, chaicunatami rurana canga.

27Gersonbaj miraicunaca, tucui imatalla Diospajta rurana cashpapash, tucui imatalla apana cashpapash, Aaronbash, paipaj churicunapash mandajpillami ruranajunga. Shina cashpami, paicuna imatalla rurachunga, canguna mandana canguichi.

28Gersonbaj mirai ayllucunaca, Ñucahuan tuparina jatun carpapica, chai tucuicunata rurashpami pactachinajunga. Paicuna imatalla ruranataca, sacerdote Aaronbaj churi Itamar runami mandajunga.

29Merari runapaj miraicunatapash, paicunapaj ñaupa taitacunapaj huasi ucupura ayllucuna imashna tandanajushcapi yupangui.

30Ñucahuan tuparina jatun carpapi tandanajushpa Ñucapajta rurangapa yaicujcunataca, quimsa chunga huatata charijmanda callarishpa, picha chunga huatata charijcunacaman yupangui.

31Ñucahuan tuparina jatun carpapi, Ñucapajta rurashpa ruranacunaca, caicunami canga: Ñuca carpapaj tablacunata, caspicunata, pilarcunata, pilarcunata shayachina bazacunatapashmi apanajunga.

32Shinallata, patio muyundipi shayanajuj pilarcunata, chai pilarcunapaj bazacunata, estacacunata, chaicunata huatana cabiacunata, chai ucupi imatalla rurangapa tucui tiyajcunata, tucuitami paicunaca apanajunga. Paicuna imatalla apanajuchunga, shutihuan shutihuan ricuchishpami cuna cangui.

33Merari runapaj mirai ayllucunaca, Ñucahuan tuparina jatun carpapica, chai tucuicunata rurashpami pactachinajunga. Paicuna imatalla ruranataca, sacerdote Aaronbaj churi Itamar runami mandajunga” nijurcami.

34Shina nijpimi Moiseshuan, Aaronhuan, Israelcunata mandajcunahuan tandanajushpa, Coat shuti runapaj miraicunataca, paicunapaj ayllucuna, paicunapaj ñaupa taitacunapaj huasi ucupuracuna imashna tandanajushcapi yupanajurca.

35Dioshuan tuparina jatun carpapi tandanajushpa Diospajta rurangapa yaicujcunataca, quimsa chunga huatata charijmanda callarishpa, picha chunga huatata charijcunacaman yuparca.

36Paicunapaj ayllucuna imashna tandanajushcapi yupajpica, ishcai huaranga canchis patsaj picha chunga jaricunami carca.

37Chaicunami, Coat shuti runapaj mirai ayllucuna carca. Paicunaca, Dioshuan tuparina jatun carpapi rurajcunami carca. Paicunataca, Mandaj Dios, Moisesman mandashcashnami, Moiseshuan, Aaronhuan yupanajurca.

38Gersón runapaj miraicunatapash, paicunapaj ñaupa taitacunapaj huasi ucupura ayllucuna imashna tandanajushcapimi yuparca.

39Dioshuan tuparina jatun carpapi tandanajushpa Diospajta rurangapa yaicujcunataca, quimsa chunga huatata charijmanda callarishpa, picha chunga huatata charijcunacamanmi yupanajurca.

40Paicunapaj ayllucuna, paicunapaj ñaupa taitacunapaj huasi ucupuracuna imashna tandanajushcapi yupajpica, ishcai huaranga sucta patsaj quimsa chunga runacunami carca.

41Chaicunami, Gersón shuti runapaj mirai ayllucuna carca. Paicunaca, Dioshuan tuparina jatun carpapi rurajcunami carca. Paicunataca, Mandaj Dios, Moisesman mandashcashnami, Moiseshuan, Aaronhuan yupanajurca.

42Merari shuti runapaj churicunapaj mirai ayllucunatapash, paicunapaj ayllucuna, paicunapaj ñaupa taitacunapaj huasi ucupuracuna imashna tandanajushcapimi yupanajurca.

43Dioshuan tuparina jatun carpapi tandanajushpa, Diospajta rurangapa yaicujcunataca, quimsa chunga huatata charijmanda callarishpa, picha chunga huatata charijcunacamanmi yupanajurca.

44Paicunapaj ayllucuna imashna tandanajushcapi yupajpica, quimsa huaranga ishcai patsaj runacunami carca.

45Chaicunami, Merari shuti runapaj mirai ayllucuna carca. Paicunataca, Mandaj Dios, Moisesman mandashcashnami, Moiseshuan, Aaronhuan yupanajurca.

46Moiseshuan, Aaronhuan, Israelcunata mandajcunahuan tandanajushpami, levitacunataca paicunapaj ayllucuna, paicunapaj ñaupa taitacunapaj huasi ucupuracuna imashna tandanajushcapi yupanajurca.

47Dioshuan tuparina jatun carpapi tandanajushpa, Diospajta rurangapa yaicujcunataca, quimsa chunga huatata charijmanda callarishpa, picha chunga huatata charijcunacamanmi yupanajurca.

48Chai yupai tucushcacunaca, pusaj huaranga picha patsaj pusaj chunga jaricunami carca.

49Mandaj Dios, Moisesta mandashcashnami, imatalla rurana cajpipash, imatalla apana cajpipash yupai tucunajurca. Paicunataca Moisesmi, paita imashna mandashcashnallata yupajurca.