1Tucui huarmicunata yali juyailla huarmigulla.
Cambaj juyashca cusaguca, ¿maimanda rirca?
Cambaj juyashca cusaguca ¿maijan ñandata rirca?
¿Nachu canhuan mascagrina canchi?
2Ñuca juyashca cusaguca, pai tarpushca sisa pambamanmi rirca.
Pai tarpushca pambapi sisacuna imashna cajta ricushpa purijungapami rirca.
Shinallata, lirio sisacunata pallangapami rirca.
3Ñuca juyashca cusaguca ñucapajllami.
Ñucapash, paipajllami cani.
Paica, lirio sisa chaupicunapimi michijun.
Jari candashcami4Ñuca juyashca huarmigulla,
canga Tirsa shuti puebloshna juyaillagumi cangui.
Jerusalén puebloshna ricunayaigumi cangui.
Punchapamba ricurijuj, jahua pacha luzeroshnami cangui.
5Ñucataca, ama ashtahuan ricujuhuaichu.
Chashna ricujushpami, ñuca shunguta apagrihuangui.
Cambaj ajchagupash, Galaad llacta lomacunapi ashtaca chivocuna ricurijujshnami.
6Cambaj quirucunaca, milmata rutushca yuraj llamacuna, armashca llujshinajujshnami.
Chai llamacunaca, ishcaita huachashca huahuacunandi llujshinajujshnami.
Paicunapurapica, na huachaj llamacunaca na tiyanllu.
7Cambaj ñavigupash, quilparishca ucupica, chaupirishca granadagushnami.
8Sucta chunga jatun mandaj huarmicunami tiyan.
Pusaj chunga huarmicunapash, cazarashcashna causajcunami tiyan.
Cuitsacunatacarin, pipash na yupai ushanallami tiyan.
9Ashtahuangarin palomagushna, juyailla ali huarmiguca shujllami tiyan.
Paipaj mamapajca, ninanda juyashca shujlla ushigumi.
Cuitsacuna paita ricushpaca:
“Ninandami cushijuna cangui” ninajunmi.
Jatun mandaj huarmicunapash, cati mandaj huarmicunapash, paitaca ninandami alicachinajun.
10Tutamanda punchayamujunshna,
tutapi punchayachijuj lunashna,
punllapi cunuchijuj indishna,
punchapamba ricurijuj jahua pacha luzeroshnami cangui.
Chashnaca ¿pita tiyangayari?
11Tucti yuracunata tarpushca pambamanmi urai rircani.
Tarpushca pambapi, ima fucushcata ricungapami rircani.
Uvacunaca, ¿ñachu viñajun imashi?
Granadacunaca, ¿ñachu sisanajun imashi? nishpami ricungapa rircani.
12Cungashcapimi ñucataca,
Aminadab shuti runapaj carretapi ñapash tiyachihuarca.
13Sulam llactamanda huarmigulla, ucha tigramuilla.
Canda ricungapa, ucha tigramuilla.
Sulam llactamanda huarmitaca ¿imapata ricungapa munanguichi?
¿Ishcai carpacunamanda tandanajushca tushunajundashnachu, ricungapami munanguichi?
Who We AreWhat We EelieveWhat We Do
2025 by iamachristian.org,Inc All rights reserved.
