EZEQUIEL 12 - Quichua Imbabura 2016

Israelcunata prezu apanata, Ezequiel villashcamanda

1Mandaj Diosca cashnami nihuarca:

2“Huañuna aichayuj runa, canga na cazujcunapaj chaupipimi causajungui. Paicunaca, na cazujcuna cashpami, ñausashna na ricunajun. Uyangapapash, na munanajun.

3Shina cashcamanda, huañuna aichayuj runa. Canga, imata charishcatapash aparishpami, tucuicuna ricujta, punlla llujshishpa rina cangui. Can causajushcamandaca, shujmanmi paicuna ricujta yalina cangui. Chaita ricushpaca, na cazujcuna cashpapash, ali yuyaita japingapashchari.

4Canga, imata charishcatapash aparishpa, tucuicuna ricujta, prezu apajpi rijujshnami chai punllapica llujshishpa rina cangui. Tucuicuna ricujtami, prezu apajpi rijujshna, na chishipica llujshina cangui.

5Paicuna ricujtami, pircata utujushpa llujshishpa rina cangui.

6Ña tutayajpica, quipita rigrapi churashpami, paicuna ricujta rina cangui. Cambaj ñavitapash quilparishpami, chai llactataca na ricushpa rina cangui. Israelcunata, llaquichinata ricuchij cachunmi, candaca churarcani” nihuarcami.

7Ñucaca, pai mandashcashnami rurarcani. Prezu rijushpa apana quipitashnami, punlla llujchircani. Chishica, ñuca maquihuan pircata utujushpami, ñanda rurarcani. Ña tutayajpica paicuna ricujtami, quipita rigrapi churashpa llujshircani.

8Cayandi tutamandatami Mandaj Diosca, cashna nihuarca:

9“Huañuna aichayuj runa, chai na cazuj Israelcuna, tapujpica,

10cashna ningui: Mandaj Diosca cashnami nin: ‘Cai villanaca, Jerusalenda mandajpash, chaipi causanajuj Israelcunapash, imalla tucunatami ricuchijun’ ningui.

11Shinallata, ñucami canguna imashna llaquita apanataca ricuchijuni. Imashnami ñuca rijurcani, chashnallatami cangunaca prezu apai tucunguichi.

12Cangunata mandajpash pircata utujushpa llujshishpami, quipita aparishpa, tuta llujchishpa ringa. Cai llactata ama ricungapami, paipaj ñavitapash quilparishpa rijunga.

13Ashtahuangarin Ñucami huasca tugllahuan prezu japisha. Shinami, caldeo gentecuna causanajuj Babilonia llactaman apachun saquisha. Shina apajpimi cai llactata na ricushpa, chaipi huañunga.

14Paita yanapangapa shayanajuj gentecunatapash, paipaj macanajuj runacunatapash, caita chaitami calpachisha. Paicunataca espadahuanmi catisha.

15Tucui cai pachapi tiyaj llactacunaman, caita chaita cachajpimi Ñucataca, Mandaj Dios cajta yachanajunga.

16Espadahuan, yarjaihuan, millai ungüihuan huañunamandaca, huaquindallami quishpichisha. Paicuna imashna na alita rurashpa causashcatami, chai llactacunapica villanajunga. Shina villajpimi Ñucataca, Mandaj Dios cajta yachanajunga” nihuarcami.

17Mandaj Diosca, cai shimicunatami cutin villahuarca:

18“Huañuna aichayuj runa, cambaj micunataca, ninan manllaihuanmi micuna cangui. Yacutapash, ninan manllaihuanmi ufiana cangui.

19Israel llactapi causajcunataca, cashnami nina cangui: Mandaj Jatun Diosca, Jerusalenbi causajcunatapash, Israelcunatapash cashnami nin: ‘Paicunaca, micunatapash manllaihuanmi micunajunga, yacutapash manllaihuanmi ufianajunga. Paicuna na alita rurashcamandami, paicunapaj llactamandaca ima charishcacunatapash quichujpi, imapash illaj saquiringa.

20Pueblocunapash, alpacunapash jichushcami saquiringa. Shina rurajpimi Ñucataca, Mandaj Dios cajta yachanajunga’ nishpa villai” nihuarcami.

21Mandaj Diosca, caitapashmi nihuarca:

22“Huañuna aichayuj runa: ‘¿Ima nishpata Israel llactapica, punllacunaca yalinmi, profetacuna rimashcapash na pactamunllu’ ninajunguichi?

23Shinamandami paicunataca, cashna nina cangui: Mandaj Jatun Diosca, cashnami nin: ‘Canguna yarichishpa rimanajushca shimicunaca, Israel llactapica na chashnachu canga. Ashtahuangarin, punllacunapash ña chayamushcami, profeta rimashcacunapash pactamujunmi.

24Israelpurapica, llulla profetacunapash, ima tucunata llullashpa villajcunapash tucuringami.

25Mandaj Dios Ñuca rimashca shimicunaca pactangami. Na ashtahuan unaiyashpami, canguna causajui punllacunapillata pactanga. Na cazuj gentecuna, Ñuca rimashca shimicunaca pactangapachami’ ninmi Mandaj Jatun Diosca, nishpa villai” nihuarcami.

26Mandaj Diosca, cutinmi cashna nishpa villahuarca:

27“Huañuna aichayuj runa, candaca, Israelcunaca cashnami ninajun: ‘Ima tucunata cai profeta villashcacunaca, cunanmanda ashtaca punllacuna jipami pactanga. Paica, jipa huatacuna pactanatami villajun’ ninajunmi.

28Shina nijcunataca, cashna ningui: Mandaj Jatun Diosca, cashnami nin: ‘Ñuca rimashca shimicunaca, na ashtahuan unaiyashpami pactanga. Ñuca rimashca shimicunaca pactangapachami’ ninmi Mandaj Jatun Diosca ningui” nihuarcami.