1Acab runaca, Samaria pueblopica, canchis chunga churicunatami charirca. Chaimandami Jehú shuti runaca, Jezreel pueblota mandajcunaman, mandaj rucucunaman, Acab runapaj churicunata yachachij runacunaman, shuj quilcashca fangata, Samaria puebloman cacharca. Chai quilcashcapica, cashnami nijurca:
2“Cangunata mandajpaj churicunata, macanajuna carretacunata, caballopi tiyarij runacunata, macanajunacunata, jatun pircahuan muyundi jarcashca pueblota charijcunami, cai quilcashcacunataca chasquinga.
3Chashna chasquishpaca, Acab runapaj churicunamanda, ali shunguta charij shuj churitami agllana canguichi. Paitaca, paipaj taitapaj randi mandachunmi churana canguichi. Chai jipaca, cangunata mandajpaj huasi ucupuramandami macanajuna canguichi” nijurcami.
4Chaita ricushpami, ninandapacha manllarishpa cashna ninajurca: “Ricuichi, ishcaipura jatun mandajcunapash, na macanajui usharcachu. Ñucanchicarin, ¿imashnata ushashunyari?” ninajurcami.
5Chaimandami mayordomopash, chai pueblota mandajpash, mandaj rucucunapash, Acab runapaj churicunata yachachijcunapash, Jehú shuti runaman cashna nichun cachanajurca: “Ñucanchica cambajta rurajcunami canchi. Shina cashcamanda can imata rurachun mandajpipash, rurashunllami. Jatun mandaj cachunga, maijandapash na churashunllu. Cambi ali canata ricushpa rurailla” nichunmi cachanajurca.
6Shina nichun cachajpimi Jehú shuti runaca, cutin shuj fangapi quilcashpa, cashna nishpa cacharca: “Ñucahuan tandanajushpa, ñuca mandashcata cazungapa munashpaca, caya punllallata cangunata mandajpaj churicunapaj umacunata apashpa, Jezreel shuti puebloman shamuichi” nishpami cacharca.
Jatun mandajpaj canchis chunga churicunaca, chai pueblota mandajcunahuanmi carca. Paicunaca, chai mandajcunahuanmi viñashca carca.
7Chai quilcashcacuna paicunapajman chayajpimi, jatun mandajpaj canchis chunga churicunata japishpa, cungata fitirca. Chai umacunataca, canastacunapi churashpami, Jezreel puebloman cacharca.
8Chaimandami, shuj villaj runaca:
“Jatun mandajpaj churicunapaj umacunataca, ñami apamushca” nishpa villarca.
Shina villajpimi Jehú shuti runaca, cashna nirca:
“Puebloman yaicuna pungupi ishcai mundunda rurashpa, caya punllacaman saquichilla” nircami.
9Cayandi tutamandata canllapi shayajushpami, Jehú shuti runaca tucui gentecunata cashna nirca:
“Cangunaca, ali cashcatapacha rurajcunami canguichi. Ricuichi, jatun mandajtaca, ñucami shujcunahuan pacalla parlarishpa huañuchircani. Cunanga caicunataca, ¿pita huañuchishca?
10Cunanga, caita yachaichi: Acab runapaj huasi ucupurata tucuchinata, Mandaj Dios villashca shimicunaca, tucuimi pactashca. Chaitaca, Mandaj Diospajta ruraj Eliasmanmi villashca carca” nircami.
11Chaimandami Jehú shuti runaca, Acab runapaj huasi ucupuracuna Jezreel pueblopi saquirishcataca, tucuillata huañuchirca. Acab runa churashca tucui mandajcunatapash, paicunapaj tucui huasi ucupuratapash, Acab runa churashca sacerdotecunatapash, Jehú shuti runaca shujllatapash na saquircachu.
12Chai jipami, Samaria puebloman rijurca. Chaiman rijushpami, michijcuna llamacunata rutuna huasiman chayarca.
13Chaipimi, Judá llactata jatun mandaj Ocozías runapaj huauquicunata tuparirca. Paicunatami Jehú runaca:
“Cangunaca, ¿picunata canguichi?” nishpa tapujpi, paicunaca cashna ninajurca:
“Ñucanchica, Ocozías runapaj huauquicunami canchi. Jatun mandajpaj churicunata, jatun mandaj Jezabel huarmipaj churicunatapash, alillachu capanguichi ningapami shamurcanchi” ninajurcami.
14Shina nijpimi Jehú shuti runaca, paihuan purij runacunataca:
“Paicunataca causajta japichi” nirca.
Shina nijpi paicunata causajta japishpami, llamacunata rutuna huasipi tiyaj pugyuman chayanapi, cungata fitishpa huañuchinajurca. Chashnami, chuscu chunga ishcai runacunatami, shujllatapash na saquishpa huañuchinajurca.
15Chaimanda rijushpa, Recab shuti runapaj churi Jonadab runata tuparishpa “¿Alillachu cangui?” nijpimi, Jehú shuti runaca cashna nirca:
“Imashnami ñucaca, canhuanga tucui shungu ali cani, ¿chashnallatachu cambash ñucahuanga tucui shungu ali cangui?” nircami.
Shina nijpimi, Jonadab runaca:
“Ari, ñucapash chashnallatami cani” nirca.
Shina nijpimi, Jehú shuti runaca:
“Shina cashpaca, cambaj maquita cuhuai” nirca.
Shina nijpimi Jonadab runaca, maquita curca. Chashna cujpimi, paipaj carretapi tiyachirca.
16Carretapi tiyajujpimi, Jehú shuti runaca:
“Ñucahuan jacu. Ñucahuan rishpami, Mandaj Diosta ñuca ninanda juyajujtaca ricungui” nirca.
Shina nishpami Jonadab runataca, paipaj carretapi pushashpa rirca.
17Samaria puebloman Jehú shuti runa chayashpaca, Acab runapaj huasi ucupuracuna chai pueblopi saquirishcataca, tucuillatami huañuchirca. Mandaj Dios, Eliasman villashcashnami, tucuillata tucuchirca.
Baal shuti diosta alicachijcunata, Jehú shuti runa tucuchishcamanda18Chai jipami Jehú shuti runaca, tucuilla gentecunata tandachishpa cashna nirca:
“Acab runa, Baal shuti diosta alicachijushcataca, ashtahuan yalitami ñucaca ruragrini.
19Shina cashcamanda cunanga, Baal shuti diosmanda profetacunatapash, paipajta rurajcunatapash, paipaj sacerdotecunatapash, shujllatapash na saquishpami tandachimuna canguichi. Baal shuti diosman animalcunata huañuchishpa carangapapash, ashtacatami charijuni. Maijambash na shamushpaca, huañungapachami” nircami.
Jehú shuti runaca, umashpallami chashna nijurca. Paica, Baal shuti diosta alicachijcunata huañuchishpa tucuchingapami, chashna rurajurca.
20Chaimandami, Jehú shuti runaca:
“Baal shuti diosta yaringapalla, shuj punllata agllana canguichi” nirca.
Shina nijpimi paicunaca, tucuillata tandanajurca.
21Jehú shuti runaca, tucui Israel llactamanda tandanajuchunmi, cayachun cacharca. Shina cachajpimi, Baal shuti diospajta rurajcunaca tucuillapacha shamunajurca. Shujllapash na saquirishpa, tucuilla shamushpami, Baal shuti diospaj huasiman yaicunajurca. Chaimandami Baal shuti diospaj huasipica, shuj pircamanda caishuj pircacaman jundarca.
22Chaipimi Jehú shuti runaca, churajunacunata ricuj runataca:
“Baal shuti diospajta rurajcuna churajuchun, churajunacunata llujchimugri” nishpa mandajpimi, chai runaca churajunacunata llujchimurca.
23Shinallata, Jehú shuti runapash, Recab shuti runapaj churi Jonadab runapash, Baal shuti diospaj huasiman yaicushpami, Baal shuti diospajta rurajcunataca cashna nirca:
“Maijanllapash Mandaj Diospajta rurajcuna caipica, amapacha tiyachun, ali ricunguichi. Caipica, Baal shuti diospajta rurajcunallami cana canguichi” nircami.
24Animalcunata cushpa huañuchingapa, ashtahuan imatapash cushpa tucuillata rupachingapa, paicuna yaicujpimi Jehú shuti runaca, pusaj chunga macanajuj runacunata canllapi ricuchun churarca. Paicunatami cashna nirca:
“Cangunapaj maquipi ñuca churashca cai runacunata maijanda cashpapash causajta saquishpaca, cangunami paicunapaj randi huañunguichi” nircami.
25Baal shuti diospajta rurajcuna, animalta tucuilla rupachishca jipami, Jehú shuti runaca canllapi ricushpa shayanajuj runacunatapash, chai runacunata mandajcunatapash cashna nirca:
“Yaicushpa, shujllatapash na saquishpami, tucuillata huañuchina canguichi” nircami.
Shina nijpimi, canllapi ricuj runacunapash, chai runacunata mandajcunapash yaicushpaca, espadahuan huañuchishpa, alpapi shitashpa saquirca. Paicunaca, Baal shuti diospajlla shicanyachishca ucucamambashmi yaicunajurca.
26Paicunaca, Baal shuti diospaj huasi ucumandaca, rurashcalla dioscunata llujchishpami rupachinajurca.
27Shinallata, rurashcalla Baal shuti diostapash rupachishpami, Baal shuti diospaj huasitapash urmachinajurca. Chashna rurashpami, chai pushtupica ishpana huasicunata shayachijpi, cunangaman chaipi tiyanajun.
28Shinami Jehú shuti runaca, Israel llactapica Baal shuti diosta tucuchirca.
29Tucuita chashna rurashpapash Jehú shuti runaca, Nabat shuti runapaj churi Jeroboam runa, Israelcunata rurachishca juchamandaca, na anchurircachu. Bet-el shuti pueblopi, Dan shuti pueblopi shayachishca, curita rurashca shicucunataca na anchuchircachu.
30Chaimandami Mandaj Diosca, Jehú shuti runataca cashna nirca: “Chashna huañuchishpa ñuca ñaupajpi tucuchishpaca, alitami rurashcangui. Acab runapaj huasi ucupurahuanga, ñuca shungupi tucuita yarijushcashnami rurashcangui. Chashna rurashcamandami, cambaj mirai huahuacunaca, chuscu miraicunacaman Israel llactata mandashpa tiyanajunga” nircami.
31Ashtahuangarin Jehú shuti runaca, Israelcunata Mandaj Taita Dios mandashcataca, na tucui shunguhuan cazurcachu. Israelcunata, Jeroboam runa rurachishca juchamandaca, na anchurircachu.
32Chai punllacunami Mandaj Diosca, Israel llacta alpacunata quichunajuchun saquirca. Chaimandami, Siria llactata jatun mandaj Hazael runaca, Israel llacta mujundaca ashtahuan suchuchishpa uchillayachirca.
33Jordán yacumanda indi llujshimujmanga, Galaad llactatapash, Gadpaj, Rubenbaj, Manasespaj llactacunatapashmi quichurca. Arnón shuti jatun yacuman chayanapi tiyaj Aroer shuti pueblomandaca, Galaad llacta, Basán llactacamanmi quichurca.
34Jehú shuti runa imatalla rurashcacunapash, ashtahuan tucui imatalla rurashcacunapash, tucuipi ali shinlli cashcacunapash, ¿nachu Israel llactata jatun mandajcuna imatalla rurashcacunata quilcashca libropi tiyajun?
35Jehú shuti runa huañushpa, paipaj taitacunahuan tandanajujpica, Samaria pueblopimi pambarca. Paipaj randica, paipaj churi Joacaz shuti runami mandajurca.
36Jehú shuti runaca, ishcai chunga pusaj huatatami Israelcunataca, Samaria pueblopi mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
