2 SAMUEL 11 - Quichua Imbabura 2016

Davidmandapash, Betsabé huarmimandapash

1Cati huatami, Jatun mandajcuna macanajuiman llujshina punllacuna chayajpi Davidca, Joabtapash, paipajta rurajcunatapash, macanajunata yachaj Israelcunandi cachajpi, Amón llacta runacunata tucuchinajurca. Shinallata, Rabá shuti pueblota japingapami, chaupipi churanajurca. Ashtahuangarin Davidca, Jerusalenbimi saquirirca.

2Ña chishajujpimi Davidca, pai sirijushcamanda jatarishpa, huasi jahua patiopi purijushpaca, shuj juyailla huarmigu armajujta ricurca.

3Shina ricushpami Davidca, chai huarmi maijan cajta tapuchun cacharca. Shina tapujpimi: “Chai huarmica, Eliam runapaj ushi Betsabé shuti huarmimi. Paica, heteopura Urías shuti runapaj huarmimi” nishpa villanajurca.

4Davidca, chai huarmita pushachun cachashpami, chai huarmihuan pacta puñurca. Chai jipami chai huarmica, pai mapayashcamanda armashpa, alichirishpa paipaj huasiman tigrarca.

5Shina cashpami, chai huarmica, vijsayu tucushca cashpa: “Vijsayujmi cani” nishpa, Davidman villachun cacharca.

6Chaimandami Davidca: “Heteopura Urías runata cachamui” nishpa, Joab runapajman cacharca. Shina cachajpimi Joab runaca, Uriastaca Davidpajman cachamurca.

7Urías runa ña chayajpimi Davidca, cashna tapurca: “¿Joab runaca alillachu, gentecunapash alillachu? ¿Chai macanajuipica, imata tucujun?” nirca.

8Chai jipami Davidca, Urías runataca: “Cambaj huasiman rishpa samagri” nishpa cacharca. Jatun mandajpaj huasimanda, Urías runa llujshishpa rishca jipami, jatun mandajca, paipaj micunata carachun cacharca.

9Ashtahuangarin Urías runaca, paipaj huasiman na rishpami, paita mandajpajta ruraj runacunahuan tandanajushpa, jatun mandajpaj huasiman yaicunapi puñurca.

10Chaitami, Davidmanga cashna nishpa villanajurca:

“Uriasca, paipaj huasimanga na rishcachu” ninajurca.

Shina nijpimi Davidca, Uriastaca:

“¿Nachu carumanda shamurcangui? ¿Imashpata na cambaj huasiman rircangui?” nishpa tapurca.

11Shina tapujpimi Uriasca, Davidtaca cashna nirca:

“Diospaj arcapash, Israelcunapash, Judá llacta runacunapash, carpacunapillami tiyanajun. Ñucata mandaj Joab runapash, can jatun mandajpajta rurajcunapash, pambapillami puñunajun. ¿Chaita yachashca jahuachu micushpa, ufiashpa ñuca huarmihuan puñungapa huasiman rina carcani? Cambaj ñaupajpi juramentushpami, chaitaca napacha rurasha” nirca.

12Shina nijpimi Davidca, Urías runataca cashna nirca:

“Shina cashpaca, caipi saquirilla, cayapa ringuillami” nirca.

Shina nijpimi Urías runaca, chai punllapash, cayandi punllapash Jerusalenbi saquirirca.

13Shina cajpimi Davidca, paihuan micushpa, machangacaman ufiachun cayarca. Ña chishajpimi Urías runaca, Davidpajta ruraj runacunandi puñungapa rirca. Ashtahuangarin paipaj huasimanga na rircachu.

14Chai cayandi tutamandami Davidca, quilcashca fangata, Joab runaman cugrichun, Uriaspaj maquipi cushpa cacharca.

15Chai quilcashcapica, cashnami nijurca: “Uriastaca, ashtahuan shinlli macanajunajui ñaupajpi churashpa, cangunaca huashaman tigranguichi. Paita japishpa huañuchinajuchunmi, chashna rurana canguichi” nishpami quilcarca.

16Chashnami Joab runaca, macanajungapa pueblo muyundipi shayarirca. Maipi ashtahuan shinlli runacuna shayajujta ricushpami, chai ñaupajpi Uriastaca shayachirca.

17Chai jipami, pueblopi causajcunaca, Joab runahuan macanajungapa llujshirca. Chaipimi Davidpaj macanajunata yachaj runacunapash, taucacuna huañurca. Shinallata, heteopura Urías runapashmi huañurca.

18Chaimandami Joab runaca, chai macanajuipi imalla tucushcata Davidman villachun cacharca.

19Villangapa rij runataca, cashna nishpami cacharca: “Cai macanajuipi tucui imalla tucushcata, jatun mandajman can tucuita villashpa tucuchijpi,

20jatun mandaj imashpapash fiñari callarishpaca, cashnami ninga: ‘¿Imashpata macanajungapaca, puebloman yapata quimirircanguichi? Pirca jahuamandaca, imata cashpapash cacharishpa huañuchintaca, ¿nachu yacharcanguichi?

21Jerobaal shuti runapaj churi Abimelec runataca, ¿pita huañuchirca? ¿Nachu cutana rumi faquirishcata, pirca jahuamanda shuj huarmi cacharijpi, Tebes shuti pueblopi huañurca? ¿Imashpata pircaman yapata quimirircanguichi?’ nijpica: ‘Cambajta ruraj heteopura Urías runapashmi huañurca’ ningui” nircami.

22Villangapa rij runa Davidpajman chayashpaca, Joab runa imatalla villangui nishcatami tucuita villarca.

23Villangapa rij runaca, Davidmanga cashnami villajurca:

“Ñucanchihuan macanajungapa pambaman llujshimuj runacunaca, ñucanchihuanga ninandapachami macanajurca. Ashtahuangarin ñucanchi mishashpami, puebloman yaicuna pungucaman tigrachircanchi.

24Shina cajpipash, flechata cacharin runacuna, cambajta ruraj runacunapi, pirca jahuamanda cacharijpimi, taucacuna huañurca. Shinallata cambajta ruraj heteopura Urías runapashmi huañurca” nishpami villajurca.

25Shina villajpimi Davidca, chai runataca cashna nirca:

“Joab runataca, cashna ningui: ‘Ama chaimandaca, ninanda llaquirichu. Espadahuanga, caishujta, chaishujta huañuchinllami. Chai pueblopi causajcunataca, paicunata mishangacaman ashtahuan shinlli tucushpa macanajunguilla’ nircami ningui. Cambash, ali yuyaicunata cungui” nishpami cacharca.

26Urías runapaj huarmica, paipaj cusa Urías huañushcata yachashpami, llaquirishcata ricuchij churajunata churajurca.

27Huañushcamanda llaquirina punllacuna yalijpimi Davidca, chai huarmitaca, paipaj huarmi cachun pushamuchun cacharca. Chai jipami chai huarmica shuj jari huahuata ungurca. Ashtahuangarin, David chashna rurashcacunaca, Mandaj Diospaj ñaupajpi napacha ali ricurircachu.