Psalms 50 - Quichua Imbabura 2016

Cai pachataca, Taita Diosmi llaquichingaAsaf shuti runa rurashca Salmomi.

1Mandaj Diosca, tucuitapacha mandajuj Taita Diosmi.

Paimi, cai pachapi causajcunataca,

indi llujshimujmanda, indi huashajuncaman causajcunata tandachishca.

2Tucuita yali juyailla Sion pueblomandami,

Taita Diosca ninan ushaihuan ricurishca.

3Ñucanchi Taita Diosca, na upalla shamungachu.

Paita ñaupashpaca, tucuchij ninami shamunga.

Paica, ninan shinlli tamiahuan, huaira chaupipimi shamunga.

4Jahua pachatapash, cai pachatapashmi cayanga.

Pai agllashcacuna imata rurashcata ricuchingapami cayanga.

5Paica: “Ñucapajlla shicanyarishpa causajcuna,

Ñucahuan, ari nishcata pactachingapa animalta cushpa huañuchijcuna tandanajumuichi” ningami.

6Alitalla Pai rurashcataca, jahua pachami villanga.

Taita Diosllatami, tucuita ricujunga. Selah

7Ñuca agllashcacunalla, Ñuca rimashcata uyahuaichi.

Israelcunalla, uyaichi.

Ñucami, canguna imashna cashcata villagrini:

“Ñucami Taita Dios cani, cambaj Taita Diosmi cani.

8Animalcunata cushpa huañuchishcamandaca, na rimagrinichu.

Ñuca ñaupajpi animalcunata cushpa, tucuillata rupachishcamandapash, na rimagrinichu.

9Cambaj huasimanda shicucunataca, na chasquishachu.

Cambaj corralmanda, jari chivocunatapash na munanichu.

10Sachapi causaj tucui animalcunapash,

lomacunapi causaj huaranga huaranga animalcunapash Ñucapajmi.

11Urcucunapi causaj alasyu tucui animalcunatapash rijsinimi.

Pambacunapi causaj tucui animalcunapash Ñucapajmi.

12Ñucaca, yarjachijushpapash, canmanga na villaimanllu.

Cai pachaca, tucui imalla chaipi tiyajcunandimi Ñucapaj.

13¿Ñucaca, huagra aichata micunichu?

¿Na cashpaca, jari chivocunapaj yahuarta ufianichu?

14Animalta carashpa huañuchinapa randica, Taita Dios Ñucatami alicachina cangui.

Imata pactachisha nishcatapash, jahua pachapi causajuj Dios Ñucamanmi pactachina canguichi.

15Llaquilla causajui punllapica, Ñucata mañahuanguilla.

Chai llaquimanda cacharichijpimi, Ñucataca alicachihuangui” nishpami rimagrini.

16Na alita rurajtaca, Taita Diosca cashnami nirca:

“Canga, Ñuca mandashca Shimicunamandaca, ¿ima ninatata charingui?

¿Ñucahuan ari nishcatapash, imatata nina cangui?

17Canga, ali tucuchun rimashcataca na chasquingapa munanguichu.

Ñuca shimicunatapash, na cazushpami yangapi churangui.

18Shuhua runahuanmi pacta purin carcangui.

Cazarashca jahua shuj huarmicunahuan causajcunahuanmi purin carcangui.

19Canga, llaquichina yuyaihuanllami rimaj carcangui.

Cambaj shimipash, umachinatallami yachan carca.

20Cambaj huauquita, huasha parlangapami tiyarij carcangui.

Cambaj huauquitallatami, juchachishpa pingaichin carcangui.

21Chashna rurajujpipash upalla saquircanillami.

Ñucatapash, canshnallatami canga yarcanguimi.

Ashtahuangarin candaca rimashpami, candallata llaquichigrini.

22Taita Dios Ñucata cungashpa causajcuna, cunanga caita yarichi.

Cangunata llaquichishpa tucuchijujpica, pipash na quishpichij tiyangachu.

23Ñucata ninanda alicachijcunami, alipi churahuanga.

Paipaj causaita alichij runatami,

Ñucapash quishpichisha” nircami.