JOSUÉ 2 - Quichua Imbabura 2016

Josueca, Jericó pueblota pacalla ricuchunmi cachashca

1Nun shuti runapaj churi Josueca, Sitim shuti pambamandami, pacalla ricuj, ishcai runacunataca: “Chai llactatapash, Jericó pueblotapash rijsishpa tigramugrichi” nishpa cacharca.

Shina nijpi paicuna rishpaca, culquimanda huainayaj Rahab shuti huarmipaj huasiman chayashpami, chaipi pacarinajurca.

2Chaitami, Jericó pueblota jatun mandajmanga cashna nishpa villanajurca:

“Israel llacta runacunaca cunan tutami, cai llactata pacalla ricungapa shamushca” ninajurcami.

3Shina nijpimi, Jericó pueblota jatun mandajca, Rahab shuti huarmita cashna nichun cacharca:

“Cambaj huasiman shamushca runacunata, canllaman llujchi. Paicunaca, tucui llactata pacalla ricungapami shamushca” nircami.

4Ashtahuangarin chai huarmica, chai ishcai runacunataca pacashca charijushpami, cashna nirca:

“Ari, shuj runacuna, ñucapajman shamurcami. Ashtahuangarin, paicuna maimanda cajtapash na yacharcanichu.

5Ña tutayashcapi pueblo punguta vichanallapimi, caimandaca llujshishpa rirca. Paicuna maiman rishcatapash na yachanichu. Uchalla catishpaca, japigringuichimi” nircami.

6Ashtahuangarin chai huarmica, chai ishcai runacunataca, huasi jahuaman pushashpami, lino puchacunata chaquichijuj ucupi pacashca carca.

7Catishpa rij runacunaca, Jordán yacuman rina ñanda rishpami, chai yacuta chimbanalla pushtucaman catishpa rinajurca. Catishpa rinajuj runacuna llujshijhuanmi, pueblo pungutaca vicharca.

8Rahab shuti huarmica, pacashca chai ishcai runacuna nara puñujpillata, huasi jahuaman rishpami cashna nijurca:

9“Mandaj Dios cai llactata cangunaman carashcataca yachanimi. Cangunata ninandapacha manllashpa, cai llactapi tucui causajcuna imata ruraitapash na ushanajujpimi chaitaca yachani.

10Egiptomanda canguna llujshimunajujpi, Mandaj Diosllata, Puca Cuchata chaquichishcatapash uyarcanchimi. Shinallata, Jordán yacu chimbaman causanajushca amorreo gentecunata jatun mandaj Sehón shuti, Og shuti ishcai runacunata imashna llaquichishcatapash uyarcanchimi.

11Chaita uyashpami, ninandapacha manllarishpa, tucui gentecuna ña huañungashna tucunajunchi. Cangunata Mandaj Taita Diosca, jahua pachapipash, cai pachapipash Taita Diosmi.

12Shina cashcamandami, cangunata Mandaj Diospaj shutipi: ‘Ñuca taitapaj huasipi causajcunataca, cangunata ñuca imashna llaquishcashna llaquipanguichi’ nishpa juramentuchun mañajupani. Chaita pactachinata yachangapaca, imapash ricunaguta saquipanguichi.

13Shinallata, ñuca taitapaj, mamapaj, turicunapaj, ñañacunapaj causaitapash, tucui imata paicuna charishcatapash, ama tucuchingapa ari nipaichi” nijurcami.

14Shina nijpimi chai ishcai rurajcunaca, cashna ninajurca: “Canguna na villashpa upalla cajpica, cangunata huañuchingapa munaj runacunataca, ñucanchimi huañuchishun. Cai llactata ñucanchiman Mandaj Dios carajpi japishpaca, canda llaquishpami, na llullashpa pactachishun” ninajurcami.

15Rahab shuti huarmi causajuj huasica, pueblo muyundi jatun pirca jahuapimi carca. Chaimandami, chai ishcai runacunataca cabiahuan huatashpa, ventanata uriajuchirca.

16Chai jipaca cashnami nirca:

“Cangunata,mascashpa catijcuna ama tuparichunga, urcupi pacajugrichilla. Cangunata catijcuna tigramungacaman, quimsa punllata chaipi pacajunguichilla. Chai jipaca, cangunapaj ñanda catishpa ringuichillami” nircami.

17Shina nijpimi paicunaca, cashna ninajurca: “Can nishcata na pactachijpica, ñucanchi juramentushcapash yangami saquiringa.

18Cai llactaman ñucanchi yaicumujpica, ñucanchita uriajuchishca ventanapi, racuta caupushca cai puca puchata huatangui. Shinallata, cambaj taitata, mamata, turicunata, cambaj taitapaj ayllucunatapash, tucuillatami cambaj huasipi tandachina cangui.

19Cambaj huasimanda maijambash llujshijpi huañuchijpica, pai huañushcamandaca ima ricunatapash na charishunchu. Ashtahuangarin, maijambash cambaj huasi ucupi cajpita huañuchijpica, ñucanchi jahuami canga.

20Ñucanchi imata ruranata can villajpica, ñucanchi juramentushcapash yangami saquiringa” ninajurcami.

21Shina nijpimi, Rahab shuti huarmica: “Canguna imatalla nishcatami pactachipasha” nirca.

Shina nishca jipaca, “shuj punllacaman” nishpa cachajpimi, chai runacunaca rinajurca. Chai jipami chai huarmica, racuta caupushca puca puchata ventanapi huatarca.

22Paicunaca, chaimanda rishpa urcuman chayashpami, paicunata mascaj runacuna tigramungacaman quimsa punllata pacajushpa tiyanajurca. Paicunata mascajcunaca, tucui ñangunata mascashpapash, na tarishpami tigramunajurca.

23Chai jipami, chai ishcai runacunaca, urcumanda urai shamushpa, Jordán yacuta chimbashpa, Nun shuti runapaj churi Josuepajman tigramunajurca. Shina tigramushpami, paicuna ima tucushcatapash tucuita villanajurca.

24Josuemanga cashnami ninajurca: “Mandaj Diosca, chai tucui llactatami ñucanchi maquipi churashca. Chai llactapi tucui causajcunami, huañungashna manllarinajun” ninajurcami.