1Mandaj Dioslla,
na ali gentecunamandaca huacaichihuayari.
Llaquichij runacunamandaca huacaichihuayari.
2Paicunapaj shungupica, llaquichinatallami yarinajun.
Punllandimi fiñanajunatalla yarinajun.
3Paicunapaj jallucunaca, culebrapaj jallucunashnami.
Paicunapaj shimimandapash, millai culebrapaj venenoshnami llujshijun. Selah
4Mandaj Dioslla,
Canda na manllaj runapaj maquimandaca huacaichihuayari.
Na alicachishpa rimaj runacunamandapash cacharichihuayari.
Paicunaca, ñuca causaita pandachingapami yarinajun.
5Jatun tucushca runacunaca, ñuca pandarichunmi tujllata churanajun.
Ñucata urmachingapami, linllita ñambi mandanajun.
Ñuca pandarichunmi tujllata churanajun. Selah
6Mandaj Diostaca cashnami nircani:
“Canga, ñuca Taita Diosmi cangui.
Mandaj Dioslla,
ñuca ninanda mañajujtaca uyahuayari.
7Ninan ushaihuan ñucata quishpichij, Mandaj Jatun Dioslla.
Canmi, jatun macanajui punllapica, huacaichihuarcangui.
8Mandaj Dioslla,
Canda na manllaj runa ima munashcata rurajuchunga, ama saquipaichu.
Pai jariyashpa jatun tucujuchun,
pai imata yarishcata rurashpa pactachijuchumbash, ama yanapaichu” nircanimi. Selah
9Ñucata chaupipi churashpa llaquichijcunataca,
paicunapaj na ali yuyaicunallata tucuchishca cachun.
10Paicunapaj jahuapica, nina rupajujshnami urmamunga.
Ninapimi shitai tucunga.
Maitapash na llujshinalla, manllanayai ucumanmi shitai tucunga.
11Jallu cacharishcata rimaj runaca, cai pachapica napacha causangachu.
Na alita ruraj runataca, jatun llaquicuna japishpami tucuchinga.
12Mandaj Dioslla,
llaquichi tucushpa causajujcunamanda, Can shayarinataca yachanimi.
Imagupash illajcunaman, Can alitalla ruranatapash yachanimi.
13Alitalla rurashpa causajcunaca, Cambaj shutitami alicachinajunga.
Alitalla rurajcunaca, Cambaj ñaupajpimi causanajunga.
Who We AreWhat We EelieveWhat We Do
2025 by iamachristian.org,Inc All rights reserved.
