HECHOS 14 - Quichua Imbabura 2016

Pablondi, Bernabendimi, Iconio shuti pueblopi villanajushca

1Iconio shuti puebloman Pablondi, Bernabendi chayajpimi, cashna tucurca: Paicunaca, judiocunapaj sinagogaman yaicushpa villanajujpimi, ashtaca judiocunapash, griegocunapash crinajurca.

2Ashtahuangarin, na crij judiocunaca, crijcunata llaquichingapami, na Israelcunamambash na ali yuyaita cushpa pandachinajurca.

3Shinamandami, ashtaca punllacunata chaipi saquirishpa, Jatun Diosta yariashpa, na manllashpa villanajurca. Diosllata ushaita carajpimi, pipash na rurai ushanacunata, jatun manllarinacunatapash rurashpa ricuchinajurca.

4Chai pueblopi causajcunaca, huaquingunaca, judiocunata catijcuna, shujcunaca apostolcunata catijcuna tucushpami shicanyarinajurca.

5Ashtahuangarin judiocunandi, na Israelcunandi, paicunata mandajcunandi tandanajushpami, Pablotapash, Bernabetapash ninanda na alicachishpa, rumicunahuan huañuchingapa jatarinajurca.

6Paicunaca chaita yachashpami, Licaonia llactapi tiyaj Listra shuti, Derbe shuti pueblocunaman, tucui muyundi llactacunamambash pacajushpa rinajurca.

7Chai llactacunapipashmi, quishpirinamanda ali villanata villashpa purinajurca.

Listra pueblopimi Pablotaca, rumicunahuan huañuchingapa munashca

8Listra pueblopica, huacharishca punllamandapacha, suchu cashpa, napacha puri ushaj shuj runagumi tiyajurca.

9Chai runaguca, Pablo villajujpimi aliguta uyajurca. “Ali tucushapachami” yashpa, tucui shungu crishpa uyajujtami Pabloca ricurca.

10Shinata ricushpami, chai runagutaca:

“Jatarishpa aliguta shayarilla” nishpa, shinllita rimarca.

Shina nijpimi, fahuashpa ñapash puri callarirca.

11Pablo chashna alichijta ricushpami, chai gentecunaca, Licaonia rimaipi cashna nishpa caparinajurca:

“Dioscunamari runacunashnalla tucushpa, ñucanchipajman uriajumushca” ninajurcami.

12Bernabetaca, “Júpiter shuti diosmi” ninajurcami. Pablotaca, villaj cajpimi, “Mercurio shuti diosmi” ninajurca.

13Chai pueblo chimbapurapimi Júpiter shuti diospaj huasi tiyarca. Chai huasimanda sacerdotemi, huagracunatapash, sisacunatapash pungu ñaupajman apamurca. Chaipimi, ashtaca gentecunahuan tandanajushpa Pablopaj, Bernabepaj ñaupajpi, animalcunata cushpa huañuchingapa munanajurca.

14Chashna ruragrinajujta, apóstol Pablopash, Bernabepash uyashpami, paicuna churajushcata liquishpa, chai tucui gentecunapaj chaupiman caparishpa calpashpa,

15cashna ninajurca:

“Cangunaca, ¿imashpata cashna ruranguichi? Ñucanchipash, cangunashnallata runami canchi. Rurashcalla yanga dioscunata saquishpa, causaj Taita Diospajman tigrarichunmi villanajunchi. Paimi jahua pachatapash, cai pachatapash, mama cuchatapash, tucui ima tiyachumbash churashca.

16Ñaupa huatacunapica, paicuna munashcata rurashpa causanajuchunmi Diosca saquishca.

17Chashna cajpipash, jahua pachamanda tamiachishpa, fucuna punllacunapi fucuchishpa, micunacunatapash tucuicuna charichun carashpa, shungupi ninanda cushichishpami, pai juyajushcataca ricuchishca” ninajurcami.

18Shina ninajushpapash, ashtaca gentecuna diosman carajshna paicunaman carashpa rupachigrinajujtaca na jarcai usharcachu.

19Chaipimi, huaquin judiocuna, Antioquía pueblomanda, Iconio shuti pueblomanda shamushpa, chaipi ashtaca gentecunaman na ali yuyaita cujpi Pablotaca, rumicunahuan huañuchingapa callarirca. Chashna rurashpaca, huañushcami yashpami, pueblomanda aisashpa canllaman shitanajurca.

20Shina cajpipash, Jesusta catijcunaca, Pablota chaupipi churashpami shayarinajurca. Pai jatarishpaca, cutin chai pueblomanllatami yaicugrirca. Chai cati punllami Pabloca, Bernabendi, Derbe shuti puebloman rirca.

21Chai pueblopipash, quishpirinamanda ali villanata villanajujpimi, Jesusta catijcunaca ashtacacuna mirarca. Chai jipaca Listra, Iconio, Antioquía shuti pueblocunamanmi tigranajurca.

22Chaipimi, Jesusta catijcunataca, ali crishpa catinajuchun shinllitapacha rimashpa cashna yachachinajurca: “Ninan llaquicunata apashpami, Taita Dios mandajuj llactaman yaicugritaca usharinga” ninajurcami.

23Shinallata, crijcuna tandanajushca pueblocunapimi ancianocuna tiyachun agllashpa churanajurca. Shina churashpaca, na micushpa, Diosta mañashpami, tucui crijcunatapash Apunchi Jesusman minganajurca.

Siria llactapi tiyaj Antioquía puebloman tigrashcamanda

24Pisidia shuti llactata yalishpaca, Panfilia shuti llactamanmi shamunajurca.

25Shinallata, Perge shuti pueblopi Diospaj Shimita villashpaca, Atalia shuti pueblomanmi urai rinajurca.

26Chai pueblomandaca, barcopimi Antioquía puebloman tigramurca. Chai pueblomandami, Pablotapash, Bernabetapash, Taita Diospaj juyaihuan pushachun, tucui imatapash rurashpa pactachinajuchun cachashca carca.

27Chaiman chayashpa tucuilla crijcunata tandachishpami, Taita Dios imatalla paicunahuan rurashcata villanajurca. Shinallata, na Israelcunapash crichunga Paillatami, punguta pascajshna callarichirca ninajurcami.

28Chai pueblopimi, Jesusta catijcunahuan unaicaman saquirirca.