1 CORINTIOS 16 - Quichua Imbabura 2016

Diospajlla causajcunaman ofrendata tandachishcamanda

1Jerusalenbi Diospajlla causajcunaman, ofrendata tandachinamandaca, Galacia llactapi tandanajuj crijcunaman yachachishcashnami cangunapash rurana canguichi.

2Semana callari punllapimi, tucuicunallata, mashna ushashcaguta tandachishpa alichina canguichi. Ñuca shamujpira ama tandachinajuchunmi, chashna nipani.

3Ñuca ña chayamushpami, canguna tandachishca ofrendataca, Jerusalenbi saquigrichun cachasha. Canguna maijanda cachangapa agllashcacunatami quilcashcandi, ofrendandi cachasha.

4Ñucapash rinapacha cajpica, paicunahuan rishallami.

Maimanlla rinatami Pabloca yarijushca

5Macedonia llactata yalimushca jipami, cangunapajmanga chayamusha. Macedonia llactamanrami chayana cani.

6Cangunahuan chaipi saquirisha yajunimi. Ashtahuambash, tamia quillacunapash cangunahuan saquirishapashchari yajunimi. Chai jipami, cangunallata, ñuca maiman rina cajpipash cachahuanguichi.

7Cangunataca, ricushpalla yalingapaca na munanichu. Apunchi Jesús munajpica, unaicaman cangunahuan cangapami munani.

8Ashtahuangarin, Pentecostés punllacunacamanmi Éfeso pueblopi cagrini.

9Ashtacacuna na ricunayachijpipash, Diospajta rurangapaca pungu pascashcashna cajpimi, villagrinapacha cani.

10Timoteo, cangunapajman chayajpica, ama manllaihuan cachun, aliguta chasquipanguichi ninimi. Paipash, ñucashnallata Apunchi Jesuspajta rurajmi capan.

11Shina cajpimi paitaca, na yangapi churana canguichi. Ashtahuangarin, ali tigramushpa, ñucata ricungapa shamuchunmi munani. Pai tigramunataca, caishuj huauquicunandimi shuyanajunchi.

12Apolos huauquitaca, caishuj huauquicunandi cangunata ricungapa richunmi ninanda mañajurcani. Ashtahuangarin, cunanbica cangunapajman ringapa na munarcachu. Shina cashpapash, ri ushashpaca cangunata ricungapa ringami.

“Aliguta causapanguichi” nishcamanda

13Alitapacha crishpami, rijchariajshna catina canguichi. Shinlli tucushpa, imatapash na manllashpami catina canguichi.

14Imata rurashpapash, ninan juyaihuanmi rurana canguichi.

15Juyashca crijcuna, Estéfanas shuti huauquipaj ayllucuna, Acaya llactapi, punda crijcuna cashcataca yachanguichimi. Shinallata, Diospajlla causanajuj crijcunata yanapanajushcatapash yachanguichimi.

16Shinamandami, Estefanastapash, paishnalla Diospajta ali rurajcunatapash cazupanguichi nipani.

17Estefanaspash, Fortunatopash, Acaicopash shamushcamandami ninanda cushijuni. Paicunami canguna illajpipash cushichihuarca.

18Paicunaca, ñuca shungutapash, cangunatapash cushichircami. Paicunashna aliguta rurajcunataca alicachinami canguichi.

19Asia llactapi tandanajuj crijcunami, cangunataca “alillachu capanguichi” ninajun. Shinallata, Aquilapash, Priscilapash, paicunapaj huasipi tandanajuj crijcunapashmi, Apunchi Jesuspaj shutipi “alillachu capanguichi” ninajun.

20Tucui crijcunami, cangunataca “alillachu capanguichi” ninajun. Ima na ali yuyaicunapash illaj, ninan juyaihuanmi, caishujhuan chaishujhuan “alillachu capanguichi” nina canguichi.

21Pablomi cani, ñuca maquihuambacha quilcashpami cangunataca “alillachu capanguichi” nishpa cachamuni.

22Apunchi Jesusta na juyaj runaca, “ninanda llaquichi tucunapachami canga” ninimi. Apunchi Jesusca ñallami tigramunga.

23Apunchi Jesucristopaj ninan juyaica cangunahuan cachun ninimi.

24Cristo Jesuspaj ninan juyaihuanmi, tucui cangunataca juyani. Chashna cachun.