HEBREOS 7 - Quichua Imbabura 2016

Melquisedec shuti sacerdotemanda

1Cai Melquisedec runaguca, Salem llactata jatun mandajpash, jahua pachapi Taita Diospaj sacerdotepashmi carca. Jatun mandajcunahuan, macanajushpa mishashpa Abraham tigramujujpimi, Melquisedecca tuparingapa llujshishpa bendiciarca.

2Abrahamga, Melquisedecmanmi chungamanda shujguta, tucuimanda curca. Melquisedec shutica: “Alitalla ruraj Jatun Mandajmi” nijunmi. Shinallata: “Salem llactata Jatun Mandajmi” nishpapashmi chashna nijun. Chaica: “Ali causaiguta caraj Jatun Mandaj” nijunmi.

3Melquisedecpaj taita mamatapash, paipaj ñaupa taitacuna maijanlla cashcatapash pipash na yachanllu. Pai huacharishcatapash, pai huañushcatapash, pipash na villanllu. Shina cashpami, Taita Diospaj Churishnalla causaita causajujlla sacerdote tucushca.

4Melquisedecca, ninanda alicachi tucushcapacha cashcataca yarinami canguichi. Shina cashcamandami, ñaupa taita Abrahamga, macanajushpa pai quichumushcamandaca, chungamanda shujguta cararca.

5Mandashca shimipi nijujshnaca, Levipaj miraicunallami sacerdotecuna tucushpa, chungamanda shujgutaca, paipaj llacta gentecunamanda japinata charin. Chaitaca, Abrahambaj mirai, paipaj huauquicunapash cunapachami carca.

6Ashtahuangarin, na Levipaj mirai cashpapashmi, Melquisedecca, Dios cusha nishcata shuyajuj Abrahammandapash, chungamanda shujguta chasquishpaca bendiciarca.

7Ninanda alicachi tucushca runa, yangalla runaguta bendiciana cashcataca yachanchipachami.

8Cunanbica, huañuna runacunallami chungamanda shujguta cushcataca japinajun. Ashtahuangarin, chai punllacunapica, causaita causajujlla shuj runagu tiyashcata ricuchijuj, Melquisedecmi japijurca.

9Shinamandami, cashna ni ushanchi: “Chungamanda shujguta Abraham cushcamandami, Levitacunapash, chungamanda shujguta cushcashna ricurinajun” ni ushanchimi.

10Melquisedec, Abrahamda tuparingapa rishca punllapica, Abrahambaj mirai Levica nara huacharircachu.

11(Levipaj mirai sacerdotecunamandami Israelcunaca, mandashca shimicunata japinajushca). Sacerdotecuna: Diospaj ñaupajman pushai ushana cajpica, Melquisedec sacerdoteshnalla shuj na shamunmanllu carca. Paica, Aaronshnalla sacerdote tucungapaca na shamushcachu.

12Shuj yuyaita charij sacerdoteta churajpica, mandashca shimicunapash mushujmanmi tigranga.

13Chashna nishpaca, shuj ayllupaj mirai Apunchi Jesusmandami chashna nijun. Cai ayllumandaca, shujllapash na altarpi Diospajta rurarcachu.

14Ñucanchi Apunchi Jesús, Judá ayllupaj miraimanda shamushcataca yachai ushanallami. Chai ayllupaj miraicunamanda sacerdote tucunataca, Moisesca imatallapash na villashcachu.

15Caitami ashtahuan yalica ricuchishca. Melquisedec sacerdoteshna cashpami, paica na caishuj sacerdotecunashna cashcatapacha ricuchirca.

16Cai miraimandami sacerdote tucunga nishpa mandashcamandaca, na sacerdote tucushcachu. Ashtahuangarin, causaita causangapa ushaita charishpami chashna tucushca.

17Paipaj causaimanda villashpaca, cashnami nijun:

“Canga, causaita causaicamanmi sacerdote cangui.

Melquisedec sacerdoteshnami, Cambash cangui” nijunmi.

18Chaimandami, ñaupa mandashcacunaca, imapapash na ushaita charishpa, yanga cashcamandaca, anchuchi tucushca.

19(Mandashcacunaca, tucuita pactachijcuna cachun ruraitaca na ushashcachu). Shina cashcamandami, tucuitapash yali ashtahuan alita shuyanajunchi, paimandami ñucanchica Taita Diospajman quimiri ushana canchi.

20Caitaca, juramentushpami chashna churarca.

21Chaishuj sacerdotecunataca, napacha juramentushpa churashcachu carca. Ashtahuangarin Jesustaca, cashna juramentushpami sacerdote cachun churarca:

“Jatun Diosca, cashna nishpa juramentushcataca pactachingapachami:

‘Canga, causaita causaicamanmi Sacerdote cangui’.

Melquisedec sacerdoteshnami, Cambash cangui” nijunmi.

22Tucuita yali ashtahuan alipacha “ari nishcataca” Jesusmi pactachirca.

23Caishuj sacerdotecunaca, huañushpa rinallacuna cashpami, paicunallataca na cati ushashpa, taucacuna sacerdote tucunajushca.

24Ashtahuangarin Jesusca, causaita causajujlla cashpami, Paica causaita causaicaman Sacerdote canga.

25Shina cashpami Jesusca, Paimandalla Taita Diospajman quimirijcunataca, causaita causaicaman quishpichingapa ushaita charin. Paimi, paicunamanda Diosta mañangapaca, causaita causajun.

26Jesusca ñucanchi munashca Mandaj Sacerdote cashpami: Jucha illaj, ima na alita ruranatapash na yachaj, ima mapapash illaj, juchata ruraj gentecunapaj chaupimandapash anchurishca causajurca. Paica, jahua pachatapash ashtahuan yali alicachi tucushcami.

27Paica, caishuj mandaj sacerdotecunashna punllandi paicunapaj juchacunamanda, animalcunata Diosman cushpa huañuchishca jipara, gentecunapaj juchacunamanda cunataca na charinllu. Ashtahuangarin Paica, Paillata Diosman cararishpami, causaita causaipaj shuj cutinlla huañurca.

28Mandashca shimicunaca, mandaj sacerdotecunataca, imapipash pandarinlla runacunatami churashca. Ashtahuangarin, mandashca jipaca, Dios juramentushpaca, Paipaj Churita churanatami juramentushca. Paitaca, causaita causaicaman ima pandatapash na rurajtami, Diosca rurashca.