Psalms 75 - Quichua Imbabura 2016

Taita Diosca, na ali gentecunata llaquichinamandaAma tucuchihuaichu nishpa candana taquipi, candajcunata mandaj candachijuchun, Asaf shuti runa rurashca Salmomi.

1Taita Dioslla,

cutin cutinmi pashi ninajupanchi.

Canga ñucanchihuan pajtami causajupangui.

Tucuita Can juyailla rurashcacunatami gentecunaca villanajun.

2Punlla chayajpimi, tucuita tapuchishpa ricujusha.

3Cai pachapash, caipi causajcunapash ninandami manllarinajunga.

Ñucami cai pachataca pilarcunashna charijuni. Selah

4Juizu illajcunataca: “Cangunallataca, na alicachirinachu canguichi” nircanimi.

Diosta na manllajcunatapash: “Na jariyanachu canguichi” nircanimi.

5Cangunapaj ushaihuanga, na jariyanachu canguichi.

Na jariyashpa shayarinachu canguichi.

6Jatun tucunaca, indi llujshimujmanda, indi huashajunmanda,

jichushca pambamandaca na shamujunllu.

7Ashtahuangarin Taita Diosmi tucuita ricushpa mandajun.

Paimi, shujcunataca pingaichijun, caishujcunataca jatunyachijun.

8Mandaj Diosca, Paipaj maquipimi llaquichina copata charijun.

Chaipica fucushca jayaj vinomi tiyajun.

Chai vinota talijshnami, Paica llaquichinga.

Cai pachapi causajcunami chai llaquitaca apanajunga.

9Ashtahuangarin ñucaca, tucui causaipimi Canmanda villajusha.

Jacobpaj Taita Diostami candashpa alicachijusha.

10Juchatalla rurajcuna mandanataca, Diosmi tucuchinga.

Ashtahuangarin, alitalla rurashpa mandajcunamanga, Paimi ushaita cunga.