GÁLATAS 1 - Quichua Imbabura 2016

“Alillachu capanguichi” nishcami

1Apóstol Pablomi cani. (Ñucatami Jesucristopash, Paita causachij Taita Diospash agllashpa, Paimanda villachun cachahuarca. Ñucataca maijan runapash na agllashpa cachahuarcachu).

2Ñucahuan tandanajushca tucui crijcunami, Galacia llactapi tucui tandanajuj crijcunaman quilcashpa cachamunchi.

3Taita Diospash, ñucanchi Apunchi Jesucristopash, cangunata ninanda juyashpa, ali causanaguta carachunmi munanchi.

4Cai na ali pachapi causajcunata quishpichingapami, Jesucristoca ñucanchipaj juchacunamanda japi tucushpa huañurca. Chashna huañushpami, ñucanchi Taita Dios munashcata pactachirca.

5Paitaca: “causaita causaicaman ninan ushaita charijmari cangui” ninajushca cachun. Chashna cachun.

Quishpirinamanda villanaca shujllami tiyan

6Cristo ninanda juyashpa, cangunata agllashcata ñapash cungashpa, panda yachachijcunatara catinajujpimi ninanda manllarini.

7Quishpirinamanda villanaca shujllami tiyan. Shina cajpipash huaquingunaca, Cristo Quishpichijmanda, shujman tigrachishpa villashpami, cangunataca pandachingapa munanajun.

8Ashtahuangarin ñucanchillata cashpapash, jahua pachamanda ángel cashpapash quishpirinamanda villanata shujman tigrachishpa villashpaca, ninandapachami llaquichi tucuna canchi.

9Punda ñucanchi nishcashnallatami, cutinbash tigrashpa cashna nini: “Quishpirinamanda villashcata canguna ña uyashpa chasquishca jahua, pipash shujman tigrachishpa villashpaca, ninandapacha llaquichi tucuchun” ninimi.

10Cashna nishpaca, ¿gentecuna alicachihuachun yashpa, na cashpaca, Taita Dios alicachihuachun yashpachu cashna nijuni? ¿Na cashpaca, gentecunatara cushichingapa munashpachu, chashna nijuni? Gentecunatara cushichingapa munajushpaca, Cristopajtaca napacha rurajuimanllu.

Diospajta Pablo rurajushcamanda

11Juyashca crijcuna, caitami yachachun munani: Quishpirinamanda ñuca villajushpaca, na runacunapaj munaitaca villajunichu.

12Cai villanataca na maijan runamandapash chasquishpa, yachajurcanichu. Ashtahuangarin Jesucristomi, ñucaman ricuchihuarca.

13Judiocuna yachachijujta catijushpa, ñuca imashna punda causajushcataca ñami uyashcanguichi. Shina cashpami, Taita Diospajlla tandanajuj crijcunataca, catiriyashpa ninandapacha llaquichishpa tucuchijurcani.

14Judiocuna yachachijujta catijushpaca, ñucahuan viñaicunataca, tucuitapash yalishpami alipacha pactachijurcani. Ñucanchi punda taitacuna imatalla rurashpa causashcataca, tucuitapachami pactachijurcani.

15Ashtahuangarin, Taita Dios ninanda juyashpami, mamapaj vijsa ucupi cajpillata agllahuashca. Paimi ninandapacha juyashpa cayahuashca.

16Shina cayashpami, na Israelcunaman villagrichu Paipaj Churitaca rijsichihuarca. Shina rijsishpaca, maijan runatapash na tapurcanichu.

17Shinallata, ñucapaj punda cachamushca apostolcunata Jerusalenbi tapungapapash na vichai rircanichu. Ashtahuangarin, Arabia llactaman rishca jipaca, Damasco pueblomanmi cutinllata tigramurcani.

18Ña quimsa huata jipami Jerusalenbi, Pedrota ricungapa vichai rircani. Paihuanmi, chunga picha punllacaman purijurcani.

19Chaipica, shuj apostolcunataca na ricurcanichu. Apunchi Jesuspaj huauqui Jacobotallami ricurcani.

20Ricuichi, caicunataca Taita Diospaj ñaupajpimi na llullashpa quilcamuni.

21Chai jipami, Siria llactamanbash, Cilicia llactamanbash rircani.

22Cristota crishpa, Judea llactapi tandanajuj crijcunaca, na ñavi ñavi rijsishcachu cahuarca.

23Paicunaca, cashnatallami uyashca carca: “Punda ñucanchita llaquichishpa tucuchingapa purij runallatami, cunanga Cristota crichun villashpa purijun” nijtallami uyashca carca.

24Shinamandami ñucamandaca,Taita Diosta ninanda alicachinajurca.