2 CRÓNICAS 20 - Quichua Imbabura 2016

Moab llactata, Amón llactata mishashcamanda

1Tauca punllacuna jipami, Moab llacta gentecuna, Amón llacta gentecuna tandanajushpa, Josafat runahuan macanajungapa shamurca.

2Chaitami Josafat runapajman rishpa, cashna nishpa villanajurca: “Cachi cucha chimbapi causajcuna, Siria llactapi causajcunami, canhuan macanajungapa ashtacacuna shamunajun. Paicunaca Hazezon-tamar nishpa rijsishca En-gadi shuti pueblopimi tandanajushca” ninajurcami.

3Shina villajpimi, Josafat runaca ninanda manllarishpa, ninanda llaquirishpa Mandaj Diosta tapungapa urai cumurirca. Shinallata, na micushpa Diosta mañachunmi, tucui Judá llactapi villachun cacharca.

4Shina villajpimi, Judá llactapi, tucui pueblocunapi causaj gentecunaca, Mandaj Diosta yanapahuai nishpa mañangapa shamunajurca.

5Chaimandami Josafat runaca, Judá llactapi, Jerusalenbi causajcuna tandanajujpi, Mandaj Diospaj huasi mushuj patio ñaupajpi shayarirca.

6Paica, cashnami nijurca: “Ñucanchi taitacunata Mandaj Taita Dioslla. Canga, ¿nachu tucui llactacunata mandaj, jahua pachapi causajuj Taita Dios capangui? Ninan shinlli canapash, ushaita charinapash, ¿nachu Cambaj maquipi capan? Canhuanga pipash na shayari ushangachu.

7Ñucanchi Taita Dioslla, cai llactapi causajcunataca, ¿nachu Can agllashca Israelcunapaj ñaupajmanda llujchishpa cachaparcangui? Shina llujchishpaca, ¿nachu Cambaj ali cumba Abrahambaj miraicuna causaita causanajuchun caraparcangui?

8Paicunami, cai llactapi causanajushpa, Cambaj shutipi mañana huasita shayachishpa, cashna ninajushca:

9‘Ñucanchita llaqui japijpi, ungüicuna japijpi, yarjai japijpica, cai huasiman shamushpami, Cambaj ñaupajman chayamupashun. (Cambaj shutica, cai huasipimi causajun). Ñucanchi jatun llaquipi cashpa, Canda caparishpa mañajpica, uyashpa quishpichihuanguilla’ ninajurcami.

10Cunanga, Amón shuti llactapi, Moab llactapi, Seir shuti urcupi causajcunapashmi shamushca. Israelcuna, Egipto llactamanda shamunajujpica, paicunapaj llactata yalichunga na munarcanguichu. Ashtahuangarin, paicunamanda caruta rishpa, paicunata ama tucuchinajuchunmi mandarcangui.

11Paicunaca, Can carashca llactamanda llujchishpa cachangapa shamushpami, ñucanchi alita rurashcamandaca ñucanchimanga llaquita tigrachinajun.

12Ñucanchi Taita Dioslla. Paicunataca, ¿nachu llaquichina capangui? Ñucanchihuan macanajungapa shamuj chai tucui ashtaca gentecunahuan macanajuitaca, na ushanachu capanchi. Chaimandami candalla ricurianajupanchi” nijurcami.

13Judá llactapi tucui causajcunaca, paicunapaj uchilla huahuacunandi, paicunapaj huarmicunandi, paicunapaj churicunandimi, Mandaj Diospaj ñaupajpi shayanajurca.

14Zacariaspaj churi Jahaziel shuti runapashmi chaipi carca. Zacariasca, Benaía shuti runapaj churimi carca. Benaía shuti runaca, Jeiel shuti runapaj churimi carca. Jeiel shuti runaca, Matanías runapaj churimi carca. Paicunaca, levitapura Asaf shuti runapaj miraicunami carca. Tandanajushca chaupipi Jahaziel shuti runa shayajujpimi, Mandaj Diospaj Espíritu paipajman shamurca.

15Chaimandami cashna nijurca: “Judá llactapi, Jerusalenbi causanajuj cangunapash, can jatun mandaj Josafat runapash, uyaichi: Mandaj Diosca, cangunataca cashnami nin: ‘Chai ashtaca gentecunapaj ñaupajpica, na manllashpa chujchunachu canguichi. Cai macanajuica na cangunapajchu, ashtahuangarin Taita Diospajmi.

16Paicunahuan macanajungapaca, cayami urai rina canguichi. Paicunaca, Sis shuti urcu vichaitami shamunga. Jeruel shuti jichushca pambaman nara chayashpallatami, paicunahuanga larca yacuman chayanapi tuparinguichi.

17Cai macanajuipica, na canguna macanajunachu canguichi. Mandaj Dios Ñuca, cangunata imashna quishpichijta ricushpa, casilla shayanajunallami canguichi. Judá llactapi, Jerusalenbi causajcunalla, na manllashpa, na shaijushcashna tucunachu canguichi. Cayapaca, paicunahuan macanajungapa llujshinguichilla. Mandaj Dios Ñucami, cangunahuan pacta casha’ ninmi” nijurcami.

18Shina nijpimi Josafat runaca, alpaman chayajta cumurijurca. Shinallata, Judá llactapi, Jerusalenbi causajcunapashmi, Mandaj Diospaj ñaupajpi cungurishpa, Mandaj Diosta ninanda alicachinajurca.

19Coat shuti, Coré shuti runacunapaj miraipura levitacunapashmi, Israelcunata Mandaj Taita Diostaca, shinllita caparishpa alicachingapa shayarinajurca.

20Tutamandata jatarishpaca, Tecoa shuti jichushca pambamanmi llujshinajurca. Paicuna llujshinajujpimi, Josafat runaca shayajushpallata cashna nirca: “Judá llactapi, Jerusalenbi causajcunapash uyahuaichi. Cangunata Mandaj Taita Diosta crijpica, ima llaquipash na japingachu. Shinallata, profetacuna villashcata crishpaca, tucuipimi ali llujshinguichi” nircami.

21Gentecunaman ali yuyaita cushca jipami, macanajunacunahuan alichirishca runacuna llujshinajujpi, Diospajlla churajunata churajushpa, Mandaj Diosman candashpa alicachinajuchun churarca. Shinallata: “Mandaj Diostaca, ninan ushaita charijmi Cangui, Can llaquinapash, causaita causaicamanmi” ninajuchunmi churarca.

22Mandaj Diosta alicachishpa candai callarijhuanmi, Amón llactamanda, Moab llactamanda, Seir shuti urcu alpacunamanda, Judá llacta gentecunahuan macanajungapa shamushca runacunataca, Mandaj Diosca, paicunapurallata huañuchirinajuchun saquirca. Chaimandami paicunapurallata, caishuj chaishuj huañuchirinajurca.

23Amón llactamanda, Moab llactamanda runacunaca, Seir shuti urcu alpacunamanda runacunahuanmi huañuchirinajurca. Seir shuti urcumanda runacunata huañuchishca jipaca, paipurallatami tucuicuna huañuchirinajurca.

24Judá llactapi causajcunaca, jichushca pambapi tiyaj torreman shamushpami, chai ashtaca macanajuj runacunataca, pambapi huañushca sirinajujta ricunajurca. Shujllapash na pacajushpa ri usharcachu carca.

25Josafat runapash, paipaj macanajuj runacunapash, huañushcacuna imatalla charishcacunata quichungapa shamushpaca, ashtacatami apanajurca. Chaicunaca, churajunacuna, imapash ashtahuan ali juyaillagucunami carca. Chaicunatami, paicunapaj cachun japinajurca. Macanajuipi quichushcacunaca ashtacapacha cajpi na apai ushashpami, quimsa punllacaman tandachinajurca.

26Ña chuscu punlla tucujpica, Beraca shuti pugru pambapi tandanajushpami, Mandaj Diostaca ninanda alicachinajurca. Chaimandami chai pambataca, Beraca shuti pugru pamba nishpa shutichinajurca. Chai pambaca, cunangamanmi chai shutihuanllata saquirishca.

27Paicunata fiñajcunamanda Mandaj Dios quishpichishpa cushichishcamandami, Judá llactapi, Jerusalenbi causanajuj macanajuj runacunaca, Josafat runata ñaupachishpa, cushijuihuan Jerusalenman tigramunajurca.

28Jerusalenmanga, salteriocunahuan, arpacunahuan, trompetacunahuanmi, Mandaj Diospaj huasiman shamunajurca.

29Israelcunata fiñajcunahuan, Mandaj Dios macanajushcataca, tucuicunami yachaj chayarca. Chaita uyashpaca, tucui llactapi causajcunami, Taita Diostaca ninandapacha manllanajurca.

30Chaimandami Josafat runa mandajuj llactapica, Taita Diosllata ali causaita carajpi, ima macanajuipash illaj causanajurca.

Josafat shuti runa mandajushpa imatalla rurashcamanda(1 Rey. 22:41-50)

31Josafat runaca Judá llactatami mandajurca, paica quimsa chunga picha huatata charishpami, Jerusalenbica ishcai chunga picha huatata mandajurca. Paipaj mamaca, Silhi shuti runapaj ushi Azuba shutimi carca.

32Paipaj taita Asa shuti runa causashcashnami, Mandaj Diospaj ñaupajpica aligutalla rurashpa, chai ali ñanmandaca na anchurishpa causajurca.

33Chashna cashpapash, lomacunapi tiyaj altarcunataca na anchuchircachu. Gentecunapash, paicunapaj ñaupa taitacunapaj Taita Diostaca, nara tucui shunguhuan cazunajurcachu.

34Punda punllacuna, jipa punllacuna Josafat runa imatalla ashtahuan rurashcacunaca, Hanani runapaj churi Jehú shuti runa quilcashca libropimi tiyajun. Chaitaca, Israel llactata jatun mandajcuna imatalla rurashcata quilcashca libropimi villajun.

35Chai tucuita rurashca jipami, Judá llactata jatun mandaj Josafat runaca, Israel llactata jatun mandaj Ocozías shuti runahuan tandanajurca. Ocozías shuti runaca, Diostaca napacha manllaj runami carca.

36Tarsis shuti puebloman rina barcocunata rurangapami, paihuan tandanajurca. Chai barcocunataca, Ezión-geber shuti pueblopimi rurachinajurca.

37Chaimandami Maresa shuti pueblopi causajuj, Dodava shuti runapaj churi Eliezer shuti runaca, Josafat runata llaquichinataca cashna nishpa villajurca: “Ocozías shuti runahuan tandanajujpimi, Mandaj Diospash can imatalla rurashcataca tucuchigrin” nijurcami. Imashna nishcashna, chai barcocuna faquirijpimi, Tarsis shuti puebloman ritaca na ushanajurca.