1Puñungapa sirinajushpa, na alita ruranatalla yarinajujcunaca, ¡aij, imachari tucunga!
Ña pacarijpica, paicuna yarishcashnami ruranajun.
Paicunaca, llaquichingapa ushaita charishpami, chashna ruranajun.
2Shujcunapaj alpacunatapash, paicunapaj cachun munashpami shuhuanajun.
Huasicunatapash chashnallatami shuhuanajun.
Shuj runagutaca, paipaj huasi ucupurandimi llaquichinajun.
Pai imatalla charishcatapash, chashnallatami ruranajun.
3Chaimandami Mandaj Diosca, cashna nin:
“Cai gentecunataca, Ñucapash chashnallatami, llaquichinata yarijuni.
Chai llaquimandaca, pipash na quishpiri ushangachu.
Na ashtahuan jariyashpa purinajungachu.
Chai punllapica jatun llaquimi canga” ninmi.
4Chai punllacunallatami, yarichij shimicunata rimashpa,
cangunata na alicachishpa cashna ninajunga:
“Tucuicunami llaquichi tucurcanchi.
Mandaj Diosmi, ñucanchiman carashca alpacunatapash quichushpa shujcunaman curca” ninajungami.
5Shina llaquichijpimi, Mandaj Diospaj tandanajuipica,
pipaj urmajta ricushpa, alpacunata chaupingapaca, pipash na tiyanga.
6Profetacunataca: “Imatapash na villanachu canguichi.
Ima llaquipash na japingachu” ninajunmi.
7Jacobpaj miraicunami canchi ninguichimi.
Shinallata, Mandaj Diospaj Espirituca, ¿nachu ushaita charin?
Cashna llaquicunataca, ¿nachu Pai cachamun?
Ñuca rimashca shimicunaca, alitalla rurashpa causajuj runataca, ¿nachu alitallata ruran?
8Pundaca, Ñuca agllashca gentecunami carca.
Cunanga, Ñucata fiñajcunami tucushca.
Ñanda yalijcunata na ricunayachishpami,
macanajuj runacunashna jahualla churajunatapash na llaquishpa quichurcanguichi.
9Ñuca llactapi causaj huarmicunatapash,
paicuna cushijushpa causanajuj huasicunamandami, llujchishpa cacharcanguichi.
Paicunapaj huahuacuna tucui causaipi alicachi tucunatapashmi quichurcanguichi.
10Jatarishpa richilla, caipica na samana tiyangachu.
Caipica, ninanda huaglishca, napacha alimanmi tigrashca.
11Llullachij espirituhuan cashpami, llullashpa:
“Vinopash, sidrapash tiyangami nishpa llullashpa villanga”
Paitami gentecunaca, alitalla villajmi yashpa alicachinga.
12Shinallata: “Jacobpaj miraicunalla,
cangunataca tucuillata tandachishapachami.
Huaquin puchushca Israelcunatapash tandachishapachami.
Bosra shuti pueblomanda llamacunata, corralman tandachijshnami tandachisha.
Ashtacapacha cashcamandami, ashtaca llamacuna jihuata micunajushpa huacanshna uyarinajunga.
13Taita Dios ñanda pascashpa ñaupajpimi, paicunaca catishpa rinajunga.
Puebloman yaicuna pungutami llujshishpa rinajunga.
Paicunata jatun mandaj ñaupashpa rijujpipash,
Mandaj Diosmi ñaupashpa ringa” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
