ÉXODO 21 - Quichua Imbabura 2016

Gañan causajcunamanda caicunatami mandashca(Deut. 15:12-18)

1Israelcunamanga caicunata mandangui:

2“Hebreopuramanda gañan cachun can randishca runaca, sucta huatatallami cambajta rurashpa causanga. Canchis huata chayajpica, imatapash na cushpa ri ushangallami.

3Pailla yaicushca cashpaca, paillami llujshinga. Huarmindi yaicushca cashpaca, ishcandimi llujshishpa ri ushanga.

4Gañan runapaj mandaj, paita cazarachishca cajpi, chai huarmihuan churicunata, ushicunata charishca cashpaca, paipaj huarmipash huahuacunapashmi, paipaj mandaj runapaj saquiringa. Chai gañan runaca, paillami llujshishpa ri ushanga.

5Chai gañan runa: ‘Ñucata mandajtapash, ñuca huarmita, ñuca huahuacunatapash juyanimi, na saquishpa llujshishachu’ nijpica,

6paipaj mandajca, juezcunapajman pushashpami, paitaca pungupi cashpa, pilarpi cashpapash marcachishpa jirruhuan rinrita utujunga. Chashna rurajpimi paica, huañungacaman paipajta rurashpa causajunga.

7Maijan cashpapash, gañan causachun paipaj ushita jatujpica paica, jari gañanshnaca na llujshishpa ri ushangachu.

8Gañan cuitsata, mandaj runa na alicachishpa, paipaj huarmi cachun na japijpica, chai cuitsataca paipaj ayllucunami culquita cushpa llujchishpa apai ushanga. Paitaca, na rijsishca gentecunamanga na jatui ushangachu.

9Ashtahuangarin, paipaj churihuan cazarachishca cashpaca, chai mandaj runaca paipaj ushitashnami juyashpa charinga.

10Chai mandaj runa, shuj huarmita japishpaca, chashnallatami micunatapash, churajunatapash cushpa, chai gañan huarmihuanga tucuita pactachinga.

11Cai quimsa mandashcacunata, maijandapash na pactachijpica, chai gañan huarmica, ima culquitapash na cushpa llujshishpa ri ushangallami” nishpa villangui nihuarcami.

Na alita rurashpa causajcunata, imashna llaquichinamanda

12Maijan cashpapash, pitapash macashpa huañuchishpaca, paipashmi huañuchi tucunga.

13Maijan cashpapash, na huañuchina yuyaihuan llaquichishca cajpi, Taita Diosllata chashna huañuchun saquishca cajpica, ñucami pai maipi pacajugrinatapash ricuchisha.

14Ashtahuangarin, maijan cashpapash, huañuchishapacha yashpa, ninanda fiñashpa huañuchishca cajpica, Ñuca altarpi pacajungapa shamushpapash, huañunapachami canga.

15Maijan cashpapash, paipaj taitata, paipaj mamata macashpaca, huañuchi tucungapachami.

16Shinallata, shuj runata shuhuashpa jatushca cajpi, nara jatushpa pai charijushcata tarishpapash, chai shuhua runataca huañuchingapachami.

17Shinallata, maijan cashpapash paipaj taitata, paipaj mamata na ali shimicunahuan rimajca, huañuchi tucungapachami.

18Shinallata, maijangunapash fiñanajushpa macanajushpami, shujca rumihuan cashpa, maquihuan cashpapash huactashpa chugrichijpi, na jatari ushashpa sirijunga.

19Shina cashpapash, cutin jatarishpa tauna caspihuan purijujpica, chugrichij runaca na huañuchi tucungachu. Shina cashpapash, chai runa imatapash na rurai ushashpa sirijushcamandaca, culquita cushpami, jambichinga.

20Maijan cashpapash, paipajta ruraj jarita cashpa, huarmita cashpapash caspihuan huactashpa huañuchishpaca, llaquichi tucungapachami.

21Ashtahuangarin shuj punllata, ishcai punllata causajushpa huañujpica, paipajta ruraj cashcamandami, chai mandaj runaca na llaquichi tucunga.

22Jaripura macanajunajushpa, shuj vijsayu huarmitara chugrichijpi, huahuata urmachishpapash chai huarmica na huañungachu. Shina cajpipash, chai macanajuj runacunaca, chai huarmipaj cusa mashna culquita cuchun mañajpipash, juezcuna imashna mandashcatami cunga.

23Ashtahuangarin chai huarmi huañujpica, paicunapashmi huañuchi tucunga.

24Ñavita llujchijpica, ñavitallatami llujchina. Quiruta llujchijpica, quirutallatami llujchina. Maquita faquijpica, maquitallatami faquina. Chaquita faquijpica, chaquitallatami faquina.

25Rupachijpipash, randimi rupachina. Chugrichijpipash, randimi chugrichina. Huactajpipash, randimi huactana.

Mandaj runamandapash, gañan runamandapash

26Maijan cashpapash gañan jaripaj ñavita, gañan huarmipaj ñavita tugyachishca cajpica, chai gañanga llujshishpa ri ushangallami.

27Shinallata, gañan jarita cashpa, gañan huarmita cashpapash, quiruta llujchishca cajpica, chai gañanga llujshishpa ri ushangallami.

28Jarita cashpapash, huarmita cashpapash, shuj huagra tupajpi huañujpica, chai huagrataca rumicunahuanmi huañuchinga. Chai aichataca, na micunachu canga. Ashtahuangarin, chai huagrata charijtaca na imatapash rurangachu.

29Shinallata, pundamandallata tupanata yachaj cashcata, huagrata charijman villashca cajpipash, chai huagrataca na huatashca cajpi, jarita cashpa, huarmita cashpapash huañuchijpica, huagrataca rumicunahuanmi huañuchinga. Shinallata, chai huagrata charijpashmi huañuchi tucunga.

30Paipaj huagra huañuchishcamanda, paita ama huañuchingapa mashna culquita cuhuai nijpi, chai culquita cushpaca na huañungachu.

31Shinallata, pipaj churita cashpa, ushita cashpa, tupashpa huañuchishca cajpica, imashna mandashcashnami, chai huagrata charijtaca llaquichinga.

32Shuj gañan jarita cashpa, gañan huarmita cashpapash huagra tupashpa huañuchijpica, chai huagrata charijmi, quimsa chunga culquita chai gañanbaj amuman cunga. Shinallata, huagrataca, rumicunahuanmi huañuchinga.

33Shinallata, maijan cashpapash, yacuta llujchina jatun utujuta, yacuta tandachina jatun utujutami allashca canga. Chai utujuta na quilpajpi, chaipica huagra cashpa, burru cashpapash urmajpica,

34utujuta allachishca runami, chai animalmandaca culquita cushpa, chai huañushca animaltaca pai japinga.

35Maijambaj huagra cashpapash, shujpaj huagrata tupashpa huañuchijpica, huañuchij huagrata jatushpami, chai huagra jatushca culquitaca chaupiringa. Shinallata, huañushca huagratapashmi chaupiringa.

36Ashtahuangarin, pundamandallata chai huagra tupanata yachaj cajpipash, chai huagrata charij na huatashca cajpica, chai huañushca huagramandaca shuj huagratami cuna canga. Chai huañushca huagrataca, huañuchij huagrata charijmi japinga.