Psalms 110 - Quichua Imbabura 2016

Mandaj Diosca, jatun mandajman ushaita cushcamandaDavid rurashca Salmomi.

1Mandaj Diosmi, ñucata Mandajtaca:

“Canga Ñuca ali maquiman tiyajuilla,

Canda fiñajcunata, Cambaj chaquihuan saruchun,

Ñuca churangacaman tiyajuilla” nircami.

2Mandaj Diosca, Can ninan ushaihuan mandana varataca,

Sion pueblomandami cachamunga.

Chaihuanmi Canda fiñajcunataca mandangui.

3Can agllashca gentecunaca, Can shamuna punllapica, paicunallatami Cambajman shamunga.

Jucha illaj Cambaj pueblomanmi shamunajunga.

Tutamandata indi ña punchayachimujpi,

tamia yacu shutushca punchayachijunshnami, Cambaj ushaica ricurimunga.

4Mandaj Diosca, cashna nishpami juramenturca:

“Canga, causaita causaicamanmi sacerdote cangui.

Melquisedec sacerdoteshnami, Cambash cangui” nircami.

5Jatun Diosmi, Canhuanga pacta purijun.

Paica ninanda fiñarishpami,

Pai llaquichina punllapica, jatun mandajcunata tucuchinga.

6Paimi, cai pachapi causajcunataca tapuchinga.

Ashtacatapachami chai punllapica huañuchinga.

Tauca llactacunapi mandajcunatami tucuchinga.

7Ñanda rijushpa larca yacuta ufiashpami,

Paica cutin ninan ushaita japinga.