MATEO 24 - Quichua Imbabura 2016

Diospaj huasita tucuchinata, Jesús villashcamanda(Mar. 13:1-2; Luc. 21:5-6)

1Diospaj huasimanda Jesús llujshishpa rijujpimi, Paipaj yachajujcunaca quimirishpa, chai jatun huasicuna imashna cajta ricuchinajurca.

2Shina cajpimi Jesusca, cashna nirca:

“¿Tucui chai huasicunatachu ricunajunguichi? Na llullashpami, cangunataca cashna nini: Caipica, shuj rumillapash, shuj rumi jahuapi na saquiringachu. Tucuillami urmachi tucunga” nircami.

Tucurimui punlla nara chayamujpillatami ninan llaquicunaca tiyanga(Mar. 13:3-23; Luc. 21:7-24; 17:22-24)

3Chai jipalla Olivo lomapi Jesus tiyajujpimi, Paipaj yachajujcunaca cashna nishpa tapunajurca:

“¿Ima punllapita chaicunaca pactanga? ¿Imata ricushpata, Can shamuna punlla chayamujujtapash, cai pacha tucurinatapash yachashun? Chaitaca ñucanchiman villayari” ninajurcami.

4Shina nijpimi Jesusca cashna nirca:

“Ricuichi, pipash cangunatara umachinman.

5Ashtacacunami: ‘Ñucami Cristo cani’ nishpa, Ñuca shutipi shamunajunga. Paicunaca, ashtaca gentecunatami umachinajunga.

6‘Jatun macanajuicunami tiyan, shuj llactacunapipash macanajui callarigrinmi’ ninajujta uyashpapash na manllarishpa musparinachu canguichi. Chashna llaquicunaca tiyanapachami. Shina cashpapash, tucurimui punllapachaca nara chayamungachu.

7Shuj llactahuan, caishuj llactahuanmi macanajunga. Shinallata, millai ungüicunapash, ninan yarjaipash, alpa mama cuyushpa tucuchijuipash, shuj shuj llactacunapimi tiyanga.

8Chai tucui llaquicunaca callarillami canga.

9Chai punllacunapimi, cangunataca ninanda llaquichishpa huañuchichun japichinajunga. Ñuca shutipi catinajujpimi, cangunataca tucui gentecuna na ricunayachinga.

10Chai punllacunapica, ashtacacunami Ñucata crishpa catinataca saquinajunga. Paicunapura na ricunayachirishpami, shujmanda shujmanda llaquichinajuchun japichinga.

11Ashtaca llulla profetacuna jatarishpami, ashtaca gentecunata umachinajunga.

12Chashna imapash na alilla ninanda mirajpimi, juyarishpa causanaca chiriyashpa catinga.

13Ashtahuangarin, tucurimui punllacunacaman llaquicunata mishajcunallami quishpiringa.

14Jahua pachamanda Dios quishpichijujtaca, tucui cai pachapi causajcunamanmi villanajunga. Shinami, tucuicunapacha quishpirinamandaca uyashca canga. Chai jipami, cai pacha tucurinaca chayamunga.

15Shinallata: ‘Diospajlla huasi ucupimi ninan mapatapacha ruranajunga’ nishpa profeta Daniel quilcashcapashmi pactanga (caita quilcacatishpami aliguta yarina canguichi).

16Chashnata ricushpaca, Judea llactapi causajcunaca, urcucunapi pacajungapa richun ninimi.

17Huasi jahuapi cashpapash, huasi ucumandaca ama imatapash apagrichun ninimi.

18Pambapi purijushpapash, paipaj jahualla churajunata apangapa ama tigrachun ninimi.

19Chai punllacunapica, vijsayu huarmicunapash, llullu huahuata viñachijuj huarmicunapash, ¡aij imachari tucunga!

20Canguna pacajushpa calpana punllacunaca, ama tamia punllacuna cachun, ama samana punlla cachunmi, Diosta ninanda mañariana canguichi.

21Chai punllacunapica, ninan manllanayai llaquimi tiyanga. Cai pacha callari punllamandapacha cunangaman, chashna jatun llaquica nara tiyarcachu, jipamambash na tiyangachu.

22Chai punllacuna ama unaicaman cachun, na ucha saquichijpica, pipash na quishpirinmanllu. Ashtahuangarin, Pai agllashcacunata ninanda juyashpallami, chai llaqui punllacuna na unaicaman cachun, ucha saquichinga.

23Shina cashcamanda, maijambash: ‘Ricuichi Cristoca caipimi, chaipimi’ ninajujpipash napacha crinachu canguichi.

24Shinallata: ‘Cristomi cani’ nishpa llullajcunapash, llullashpa villaj profetacunapashmi tiyanga. Paicunaca, pipash na rurai ushanallacunata, jatun manllarinacunatami rurashpa ricuchinajunga. Chashna rurashpami, paicuna ushashpaca, Dios agllashcacunatapash umachinajunga.

25Chaicuna tiyanataca ñami pundallata cangunaman villarcani.

26Shina cashcamanda: ‘Ricuichi, Paica jichushca pambapimi nijpipash’ na rinachu canguichi. Na cashpaca: ‘Ricuichi, cai tandanajuna huasipimi nijpipash’ napacha crinachu canguichi.

27Runa Aichayuj tucushca Ñuca shamushpaca, indi llujshimujmanda, indi huashajuncaman punchapamba shitamujshnami shamusha.

28Maipi huañushca sirijujpipash, chaipimi angacunaca jundanga.

Runa Aichayuj tucushca Jesús tigramunatami villashca(Mar. 13:24-37; Luc. 21:25-36; 17:25-36; 12:41-48)

29Chashna ninan llaqui punllacuna yalijhuanmi, indipash yana yana tucunga, lunapash na punchayachingachu, luzerocunapash urmamungami. Shinallata, jahua pachapi ninan ushaihuan tiyanajujcunapash cuyungami.

30Shina tucujpimi, Runa Aichayuj tucushca Ñuca shamunata ricuchinaca, jahua pachapi ricuringa. Runa Aichayuj tucushca Ñuca fuyu jahuapi punchapamba ninan ushaihuan shamujujta ricushpami, cai pachapi tiyaj tucui llacta ayllucunaca ninanda huacanajunga.

31Chai jipaca, Ñuca angelcunatami trompetata ninanda huacachishpa, Ñuca agllashcacunata cai pacha chuscundi suyucunamanda tandachinajuchun cachamusha.

32Higo yuramanda yarichishpa yachachishcatami, aliguta yachajuna canguichi: Chai yurapi malquicuna viñashpa, llullu fangacuna jundajta ricushpami, rupai punllacuna chayamuntaca yachanguichi.

33Chashnallatami chai tucuita ricushpaca, Ñuca shamunaca ñapacha pungupi cajta yachana canguichi.

34Na llullashpami cashna nini: Cunan viñaicuna nara huañujpillatami, Ñuca villajushca shimicunaca pactanga.

35Jahua pachapash, cai pachapash tucuringami. Ashtahuangarin, Ñuca rimashca shimicunaca, napacha tucuringachu.

36Ashtahuangarin ima punlla, ima horas Ñuca tigramunataca, pipash na yachanllu. Jahua pachapi tiyaj angelcunapash na yachanllu. Chaitaca, Ñuca Taitallami yachan.

37Runa Aichayuj tucushca Ñuca shamui punllapica, Noé causajui punllacunapi tucushcashnami canga.

38Chai punllacunapica micushpa, ufiashpa, cazarashpa, cazarachishpami gentecunaca causanajurca. Yacuhuan Dios nara tucuchijpica, jatun huambuna huasiman Noé yaicungacamanmi, chashna causanajurca.

39Chashna causashpami, yacuhuan tucuilla tucuchina punlla chayamungacaman, gentecunaca na yuyaipi japirca. Chashnallatami, Runa Aichayuj tucushca Ñuca shamuna punllapipash canga.

40Chai punllapica, ishcaipurami pambapi purinajunga. Paicunataca, shujtallami apanga, shujtaca saquingami.

41Shinallata, ishcai huarmicunami, cutana rumipi cutanajunga. Paicunatapash shujtallami apanga, shujtaca saquingami.

42Cangunata Mandaj Ñuca, ima punlla tigramunata na yachaimandami, rijchariaj shuyana canguichi.

43Ashtahuan cashnatapash yarichi: Shuhua shamunata huasiyuj yachashpaca, paipaj huasita utujushpa ama shuhuachunmi rijchariaj pacarinman.

44Shinallatami, Runa Aichayuj tucushca Ñucapash, cungashcapi ñapash shamusha. Cangunaca alichirishcalla, rinallami shuyana canguichi.

45¿Maijanda chai aliguta cazushpa, aliguta yarishpa pactachij mayordomo canga? Paitami ‘Ñuca huasita ricupangui. Micuna chayajpipash, ñucapajta rurajcunaman carapangui’ nishpami, paita Mandajca mingashpa saquin.

46Chashna tucuita rurashpa pactachijujta mandaj japij shamujpimi, chai runaca ninanda cushijunga.

47Na llullashpami cashna nini: Chai runamanmi, pai imata charishcatapash, tucuilla minganga

48Ashtahuangarin, na pactachij runaca, paipaj shungupica: ‘Ñuca mandajca, na ucha shamunllu’ nijungami.

49Shina nijushpami, mandajpajta rurashpa causaj jaricunatapash, huarmicunatapash macai callaringa. Shinallata micushpa, ufiashpa, machashpami purijunga.

50Ima punlla, ima pacha shamunatapash na yachashca chashna purijujpillatami, paita mandajca ñapash shamunga.

51Shina shamushpami, chai runataca mishqui shimi, jayaj shungu runacunahuan pacta ninanda llaquichi tucuchun cachanga. Chaipimi paica huacashpa, quirutapash canirijunga.