1 CORINTIOS 10 - Quichua Imbabura 2016

Yanga dioscunata ama mañachunmi shinllita rimashca

1Juyashca crijcuna, ñucanchi ñaupa taitacuna imashna cashcatapash yachachunmi munani. Paicunataca, tucuicunata fuyu quilpashpa rijujpimi, Puca Cuchatapash tucuicuna chimbanajushca.

2Paicunaca, Moisesta catishpami fuyupipash, mama cuchapipash tucuilla bautizai tucushca.

3Dios carashca micunatapash tucuicunami micunajushca.

4Shinallata tucuicunami, Dios carashca yacutallata ufianajushca. Chai yacutaca, paicunata catishpa purijuj, Diospaj jatun Rumimandami tucuicuna ufianajushca. Chai jatun Rumica, Cristomi carca.

5Shina cajpipash, paicunapuramanda chaupi yali gentecunahuanmi, Taita Diosca na cushijushca carca. Chaimandami jichushca pambapillata, huañushpa tucurinajurca.

6Paicuna na alita ruranata ninandapacha munashcashna, ñucanchipash ama munachun ricuchingapami chashna tucushca.

7Paicunapurapi huaquingunaca, yanga dioscunata mañajcunami carca. Cangunaca, na chashna mañanachu canguichi. Quilcachishcapica cashnami nijun: “Tucuillami micungapa, ufiangapa tiyarirca. Chai jipaca, pujllangapami jatarirca” nijunmi.

8Paicunapurapi huaquinguna huainayashcashnaca, na ñucanchipash huainayanachu canchi. Chashnacunaca, shuj punllapillami, ishcai chunga quimsa huarangacuna huañushca.

9Paicunapurapi huaquinguna, Jatun Diosta fiñachishcashnaca, ñucanchica na fiñachinachu canchi. Chashnacunaca, culebracuna canijpimi huañushca.

10Paicunapurapi huaquingunaca, Diosta fiñashpami na alicachishpa rimashca. Chashnaca, napacha rimanachu canchi. Chashnacunataca, huañuchij angelmi huañuchishca.

11Chashnataca ñucanchi ama catichunmi, ñucanchi ñaupa taitacuna imashna tucushcatapash, tucurimui punllacunapi causanajuj ñucanchita yachachingapa quilcachishcapica, chashna villajun.

12Maijambash, shinllipacha crijmi cani yajushpaca, aliguta yaringuichi, pactara urmanguichiman.

13Tucuicunata japij na ali munaicunallatami, cangunatapash japijun. Shina cajpipash, Taita Diosca, canguna apai ushanacamanllami japichun saquinga. Ashtahuangarin, chai na ali munaicuna shamujpica, Paillatami imashna mishanata ricuchinga, shinami shinlli tucushpa mishai ushanguichi.

14Shina cajpi, ñuca juyashca crijcuna, cangunaca yanga dioscunata mañanamandaca anchurinami canguichi.

15Aliguta yachajushca gentecunamanshnami cangunaman rimani. Ñuca imata nijujtapash, cangunallata aliguta yaripanguichi.

16Bendiciashca copamanda Diosta pashi ninajushpaca, ¿nachu Cristopaj yahuarmanda caishuj chaishuj tandanajunchi? Tandata ñucanchi chaupinajushpaca, ¿nachu Cristopaj cuerpomanda caishuj chaishuj tandanajunchi?

17Shujlla tanda cajpimi, ñucanchica ashtacacuna cashpapash, shujlla cuerposhna canchi. Tucuicuna tandanajushpami, chai tandatallata micunajunchi.

18Israelcuna imata rurajtapash aliguta yarichi. Diosman carashpa huañuchishca animalcunata micushpaca, ¿nachu tandanajushpa, chai altarmandallata micunajun?

19¿Imashpata caita nijuni? ¿Yanga diosca imata? Na cashpaca, yanga dioscunaman animalta cushpa huañuchishca aichaca, ¿ali cajpichu chashnaca nijuni?

20Na crijcunaca, ayacunamanmi animalcunata cushpa huañuchinajun. Paicunaca, Taita Diosman carangapaca na huañuchinajunllu. Shinamandami cangunapash, ayacunahuan tandanajuchunga na munani.

21Cangunaca, Apunchi Jesús carashca copatapash, ayacunaman carashca copatapash ishcandita ufiaitaca, na ushanachu canguichi. Apunchi Jesús carashca micunatapash, ayacunaman carashca micunata micungapa cangunapash tandanajushpa micuitaca, na ushanachu canguichi.

22Ñucanchica ishcandita rurashpa, ¿Apunchi Jesusta ninandapacha fiñachingapachu munanchi? ¿Ñucanchica, Paitapash yali shinllichu canchi?

Taita Diosta jatunyachingapa tucuita ruraichi

23Tucui imatapash rurai ushanillami, ashtahuangarin napacha tucuilla alichu. Tucui imatapash rurai ushanillami, ashtahuangarin na tucuilla shinllichi ushanllu.

24Pipash na cambajlla ali cachun, imatapash ruranachu. Ashtahuangarin, shujpajpash ali cachunmi tucuita rurana.

25Aichata jatujuj pushtupi randishpaca, shungupi imatapash na yarishpa, na tapushpa micunguichilla.

26Cai pachapash, cai pachapi ima tiyashcapash, Jatun Diospajmi.

27Maijan na crijpash, cangunahuan micungapa cayajpi rishpaca, imatapash na tapushpa, imata carajpipash micunguichilla. Imatapash ama yarijungapami na tapuna canguichi.

28Ashtahuangarin maijambash: “Cai aichataca, yanga dioscunaman carashcami” nishpa villajpica, na micunachu canguichi. Chai villajpash, paipaj yuyaihuan ama pandachunmi, na micuna canguichi. (Cai pachapash, cai pachapi tucui ima tiyashcapash, Jatun Diospajmi).

29Cambaj yuyaitaca, na shina ninichu. Ashtahuangarin, shujpaj yuyaitami shina nini. Ñuca imatapash rurai ushanalla cajpipash, ¿imashpata shujpaj yuyaimandalla na alicachishca canga?

30Imata cashpapash, Diosta pashi nishpa micushpaca, ¿imashpata Diosta pashi nishpa micujushcamandaca na alicachi tucusha?

31Shina cajpimi canguna imata micushpa, ufiashpa, imata rurashpapash, Taita Diosta jatunyachingapa, tucuita rurana canguichi.

32Imata rurashpapash, judiocunatapash, na crijcunatapash, Taita Diospajlla tandanajuj crijcunatapash, nitijachijshna urmachingapaca na ruranachu canguichi.

33Ñucapash, tucuita imata rurajushpapash, tucuicunapaj ali cachunmi rurani. Na ñucapajlla ali cachun imatapash rurashpami, tucuicuna quishpirichun tucuita rurajuni.