2 CRÓNICAS 13 - Quichua Imbabura 2016

Abías shuti runa mandajushcamanda(1 Rey. 15:1-8)

1Jeroboam shuti runaca, chunga pusaj huatata Israelcunata mandajujpimi, Abías shuti runaca Judá llactata mandai callarirca.

2Paica, quimsa huatatami Jerusalenbi mandajurca. Paipaj mamaca, Gabaa pueblomanda, Uriel shuti runapaj ushi Micaías shutimi carca.

Abías shuti runahuan, Jeroboam runahuanga macanajushpallami causanajurca.

3Chaimandami Abías shuti runaca, agllai tucushca, ninan shinlli, macanajunata ali yachaj, 400.000 runacunata tandachishpa, macanajungapa alichirirca. Shinallata, Jeroboam runapashmi, 800.000 agllai tucushca, ninan shinlli, macanajunata ali yachaj runacunata tandachishpa, Abías shuti runahuan macanajungapa alichirirca.

4Abías shuti runaca, Efraín shuti urcu alpacunapi tiyaj, Zemaraim shuti lomapi shayarishpami, cashna nijurca: “Jeroboam runapash, tucui Israelcunapash, uyahuaichi.

5Israelcunata Mandaj Taita Diosca, Davidmambash, paipaj miraicunamambash Israelcunata mandanataca, tucui causaipaj cungapa ari nijushcata ricuchij cachihuan sellashcashna cajtaca, ¿nachu yachanguichi?

6Shina cajpipash, Davidpaj churi Salomonbajta ruraj, Nabat shuti runapaj churi Jeroboam runami, jatarishpa, paita mandajtaca na cazurca.

7Paihuanga yanga purij, jatun na alita ruraj runacunami tandanajurca. Shina tandanajushpami, Salomonbaj churi Roboam runata mishanajurca. Roboam runaca, chairalla runa cashpa, ninan manllaita charishpami, paicunataca na cazuchi usharca.

8Cunanga, cangunaca ashtacacuna cashpa, cangunapaj dioscuna cachun Jeroboam runa rurachishca curi shicucunata charishpami, Davidpaj miraicuna mandachun Mandaj Dios cushcataca, na cazungapa munanguichi.

9¿Nachu Mandaj Diospaj sacerdotecunata, sacerdote Aaronbaj miraicunata, levitacunataca, canguna llujchishpa cacharcanguichi? Chashna rurashpami, sacerdotecuna cachunga, shuj llactacunapi causajcunashna, pitapash churashcanguichi. Shuj shicuta, canchis jari llamata cushpami, maijambash sacerdotecuna tucushca. Chashnami napash dioscunapaj sacerdotecuna tucushca.

10Ashtahuangarin ñucanchipajca, Mandaj Diosmi ñucanchi Taita Dios. Paitaca na saquishpami catishcanchi. Mandaj Diospaj ñaupajpica, sacerdote Aaronbaj miraicunami Diospajta rurashpa causanajun. Tucui imatalla ruranacunataca, levitacunami ruranajun.

11Paicunami tutamandapash, chishipash Mandaj Diosman animalcunata cushpa tucuillata rupachinajun. Mishquilla ashnajun inciensotapash, paicunami cushnichinajun. Shinallata, ima mapapash illaj mezapipashmi tandata churanajun. Curi candeleropi lamparacunapipash, tucui chishicuna rupachunmi, michata japichinajun. Ñucanchica, ñucanchita Mandaj Taita Dios mandashcatami pactachinajunchi. Ashtahuangarin cangunaca, Paitami saquishcanguichi.

12Taita Diosca ñucanchihuan cashpami, ñucanchitaca mandajun. Paipaj sacerdotecunapash, cangunahuan ñucanchi macanajugrichunmi, trompetata ninanda huacachinajun. Israelcunalla, cangunapaj ñaupa taitacunata Mandaj Taita Dioshuanga na macanajunachu canguichi. Paitaca, maitata mishai ushanguichiyari” nijurcami.

13Ashtahuangarin Jeroboam runaca, huashata shamushpa macanajungapami, huaquin runacunata pacalla cacharca. Jeroboam runaca, paicunapaj ñaupajpi shayajujpimi, pacalla shamuj runacunaca, Judá llacta runacunapaj huashata shamunajurca.

14Judá llacta runacuna tigrarishpa ricushpaca huashatapash, ñaupatapash macanajungapa shamunajujtami ricurca. Paicunaca, Mandaj Diosta caparishpa mañanajujpimi, sacerdotecunapash trompetata huacachinajurca.

15Chai jipami, Judá llacta runacunaca shinllita caparinajurca. Chashna ninanda caparijhuanmi Taita Diosca, Abías shuti runapaj ñaupajmandapash, Judá llacta runacunapaj ñaupajmandapash, Jeroboam runataca tucui Israelcunandi, caita chaita cacharca.

16Taita Diosllata, Judá llacta runacunapaj maquipi churajpimi Israelcunaca, pacajushpa calpanajurca.

17Chai macanajuipica, Abías shuti runahuan, paita catijcunahuanga ninandapachami huañuchinajurca. Israelcunamandaca, picha patsaj huaranga agllashca runacunami huañurca.

18Chashnami Israelcunaca, chai huatacunapica llaquichi tucunajurca. Ashtahuangarin, Judá llactapi causajcunaca, paicunapaj ñaupa taitacunata Mandaj Taita Diosta mañashpa, shinlli tucushpami mishanajurca.

19Abías shuti runaca, Jeroboam runata catishpa rishpami, Bet-el, Jesana pueblocunata, Efraín shuti llactapi tiyaj uchilla pueblocunatapash quichurca.

20Jeroboam runaca, Abías shuti runa mandajui punllacunapica, cutinga na mandai usharcachu. Mandaj Dios llaquichijpimi, Jeroboam runaca huañurca.

21Ashtahuangarin Abías shuti runaca, ashtahuan shinllitapachami mandajurca. Paica, chunga chuscu huarmicunatami japirca. Paicunahuanmi, ishcai chunga ishcai churicunata, chunga sucta ushicunata charirca.

22Abías shuti runa, ashtahuan imatalla rurashcacunapash, pai imatalla rurashpa causashcapash, profeta Iddo shuti runa villashpa quilcashcapimi tiyajun.