1Tucui shunguhuanmi, ñuca juyashcagutaca tutacunapash mascajurcani.
Mascajushpapash, na tarircanichu.
2Chaimandami: “Cunanga jatarishpa, cai pueblo muyundita mascagrishalla,
tucui shunguhuan ñuca juyashcagutaca,
ñangunapi, plazacunapi mascagrishalla” yajurcanimi.
Mascajushpapash, na tarircanichu.
3Ashtahuangarin pueblota muyushpa ricujcunarami tuparihuarca.
Paicunatami: “Ñuca tucui shunguhuan juyashcagutaca, ¿nachu ricuparcanguichi?” nishpa tapurcani.
4Paicunata tapushca jipallami,
ñuca juyashcagutaca tuparircani.
Paita tuparishpaca, na cacharircanichu.
Ashtahuangarin paitaca, ñuca mamapaj huasimanmi pusharcani.
Ñuca huacharishca huasi ucumanmi pusharcani.
Jari candashcami5Jerusalenbi causaj cuitsacunalla,
cangunataca, gacela, huarmi venado animalcunapaj shutipimi mañani.
Ñuca juyashcagutaca,
paillata rijcharingacaman, ama rijchachishpa saquipanguichilla.
Cazarangapa yaicunapi candashcami6Jichushca pambata, pilar shayajujshna shamujuj cushnica ¿imata canga?
Inciensota, mirrata, mishquillagu ashnajuncunata churarishca shamujujca ¿imata canga?
7Chaica, Salomón purina quilpashca carretami.
Chaitaca, Israelpuramanda ninan shinlli,
sucta chunga runacunami, catishpa shamunajun.
8Paicunaca, espadacunahuan ali macanajunata yachajcunami.
Paicunaca, espadata huatarishcami tucuicuna shamunajun.
Tutayajpi manllashpami, chashna shamunajun.
9Jatun mandaj Salomonga, shuj carretatami rurachirca.
Chaitaca, Líbano caspicunahuanmi rurachirca.
10Chai carretataca, culqui pilarcunahuanmi rurachirca.
Huasha marcarinataca, curihuanmi rurachirca.
Pai tiyarinataca, yana puca fachahuanmi quilpachirca.
Chai ucutaca, juyaillagutapachami rurarca.
Chaitaca, Jerusalenmanda cuitsacunami, juyaillagutapacha rurarca.
11¡Sionbi causaj, cuitsacunalla!,
jatun mandaj Salomonda ricungapa llujshimuichiyari.
Pai cazarajujpi, paipaj mama churachishca coronata churajushcami shamujun.
Chai punllapica, paica tucui shungumi cushijushca carca.
Who We AreWhat We EelieveWhat We Do
2025 by iamachristian.org,Inc All rights reserved.
